Ginzat, Amezruy Iles d Yidles, d adlis i d-yeffɣen deg mayu 2024 di teẓrigin Boussekine (Bgayet). D taynarayt ɣef tɣiwant-a i d-yezgan deg It Yaεla, di tama tamalut n ugafa n ugezdu n Sṭif. Zzint-as-d tɣiwanin n Ḥarbil (n waɣir n Ginzat), Ԑin Legraj (Sṭif), d tɣiwanin n ugezdu n Burǧ Buεrarij : Ilmayen, Tasammart, Zemmura, Tefreg.
Akken ad yissin umdan kra n tmurt iɣer ara yerzu, yestefk ad yeldi tiwwura yessekcamen s ul n tmetti. Amerray n tidet ur yestekfay s ugama d thuski n lebni n tmurt-nni ; yettnadi ad yissin s telqeyt udmawen-nniḍen, ma mačči di tirza tamezwarut, di tirza tis snat niɣ tis krad…
Wid ur nesεi tagnit i unekcum ɣer Ginzat n It Yaεla, adlis-a d ayen ara sen-yeṭṭfen afus alama d tawwurt n unekcum. Yewwi-d tugniwin n temnaḍt-a yeččuren d igerrujen. Adlis-a d tiwwura yeldin ɣef Ginzat n wassa, ɣef umezruy-is akked tikkin-is deg tegrawliwin i tedder tmurt n Leqbayel.
Tamurt tesselḥuy-itt daɣen tmeslayt niɣ tutlayt. Anect-a yedda-d deg yiwen uḥric ; yewwi-d kra seg umawal itteddun ad yenger niɣ inegren yakan di temnaḍin-nniḍen. Tawwurt-a teldi tayeḍ ɣef yismidgen n tudrin n tɣiwant n Ginzat. Awal Ginzat s timmad-is, llan yimusnawen i t-id-yessegzan dakken talɣa-s taneṣlit d Tagenza > Tawenza, ilmend n yiwen n uɣrab n udrar i as-d-yezgan amzun d tawenza. Maca, tagi d turda gar turdiwin, imi deg yinadiyen-nneɣ, nufa-d ayen i tt-id-yessegzan akken-nniḍen. Tismidegt ɣur-s azal, ismideg yesεa tadra d unamek, yeqqen ɣer tudert n umdan d tmetti s umata i t-id-yeslalen. Awi-d kan ad yessiweḍ umnadi ad t-id-yessegzi s wudem ilaw mačči s wudem ibaw. Deg udlis-a, ad naf anamek n yismidgen n tudrin am Tizi Mejber, Tawrirt Tamellalt, Ginzat, It Qerri, atg. Ismawen n yidgan d llsas n yal tamurt, n yal timetti.
Tiwwura n udlis-a mačči yiwet ; yal tawwurt s yisem-is, teskan ɣer wanda tessekcam ; ta, ɣer yizri lqayen n Ginzat, tallit n tgeldunin timaziɣin, taqṣiḍt n ujaddi Yaεla swayes tettwasemma temnaḍt-a n Ginzat iwmi qqaren It Yaεla / Bni Yaεla, akked tuddsa tamensayt, d usedwel, atg ; ta ɣer umaḍal n kra n yiwudam izamulen n Ginzat (Lawliya, imeɣrasen, imusnawen, atg), dɣa ula d anaẓur-acennay Brahim Bellali i ɣ-yeǧǧan di ɣuct 2024, tettunefk-as tesga deg udlis ; tawwurt-iḍnin tessekcam ɣer lḥirfat timensayin n Ginzat (tinḍi n usɣar, talaxt, azeṭṭa, axxam n zik, tanwalt, tafellaḥt, atg.) ; tayeḍ-nniḍen, tessekcam s amaḍal n wuraren n zik yettwassnen di temnaḍt-a, tura jlan ; tawwurt taneggarut, ɣer uɣerbaz amensay n tsekla timawit : icewwiqen, inzan, timḥuǧa d tmucuha. Ma yella tasekla tatrart niɣ tirawit yecban ungal niɣ tullist – d tewsatin-nniḍen –, d ayla n wallaɣ n yiwen n umdan i yessenfaεen aɣref, tasekla timawit nettat, d ayla n tmetti, d ayla n uɣref-nni, tezdi-ten ama deg usugen ama di tudert tilawt. Snat-a n tsekliwin ttemyesmadent. Tasekla timawit i d-ilulen d tamenzut, d igiman d yigiman n yiseggasen aya seg mi d-tennulfa, tura tesra tira, iwakken ad tuɣal d tasekla s yisekkilen ara s-yefken tudert ass-a d uzekka.
Ginzat, Amezruy Iles d Yidles, d adlis yettkanzin axxam s 9 n tewwura ; tin yeldi yimeɣri, ad t-tessekcem ɣer texxamin yeččuren yal ta s ugerruj-is uzzig. Ur d-itteffeɣ syinna d ilem, maca, ad d-yeččar allaɣ-is, ad yeldi wul-is ara s-yernun aḥemmel n wayen i d-ǧǧan yimenza ; ad yaf iɣbula n tmussni yettaken tudert i wallaɣ s umezruy d yiles, d tsekla.
Nacer MEDJDOUB
