Milmi kan d-yekcem si Lurup. Nenna-yas : awah, ur d-yettuɣal ara ugeswaḥ-nni. Yuɣal-d, ur yezmir ara ad ifareq Buzgan d… Ih d netta d « Ageswaḥ Kan ». Wid ur t-nessin ara ssawalen-as : Mass Yahia Sail, d amedyaz, d menwala… Lḥasun, tefreḥ Tangalt imi t-temlal, testeqsa-t.
Azul ay amedyaz. Ma ulac uɣlif, ad aɣ-d-iniḍ anwa i d kečč
Mačči d amedyaz
Nekk, d menwala
Seɣraseɣ snasel
Ttɛeddiɣ tilisa
Ur kennuɣ ara iddel
I d-yekkan sufella
Mara tt-id-yendel
Ttruzuɣ tiwwura
Mačči d aɛeqli
Mačči d aḥezaz
D amdan am kunwi
Ansi d-tekka d iyi-tḥaz
Qareɣ-d ayen yellan ur telli tufra
Mačči d amedyaz
yeddurin tira
Ul-iw d azedgan
Iles-iw d lfinga
Ttaruɣ tisselbi
Win i iselben yeẓra
Wis ma d ameddaḥ
Neɣ d bu isefra
Wis mad amedyaz
Neɣ d menwala
ɣur-i d awla kan
ɣur-wen d isefra
wis ma d amedyaz
wis ma d menwala ?
2- tessefruyeḍ ? Teqqareḍ-d ? Ayen d-teqqareḍ, d awal d asefru neɣ d tamedyazt ?
D nettat kan
Llan wid id yennan
Yal wa d amek it-id-yenna
Llan wid i s-yeslan
Timesla ur taɛdil ara
D taqbaylit i yennernan
Nekwni nezga-d sufella
D nettat id aɣ-yesɛan
Lemmer di nefhim kra
Tugar kra i d-yettilin
Mačči ad d-yebder yimi
Tugar akw wid i tt-yugin
Tekka-d nnig tsusmi
Tugar ḥsen d lḥusin
D tmeckukal n at nnbi
Tugar akw tidiyyanin
I d-zrurɛen at Ṛebbi
Deg iqerra n wid ur n ssin
Yerran talsa d agudi
Wid ɣ-i ttarran tikwmamin
I wakken ad ilin nutni
Tugar akw timusniwin
D nettat i ttamusni
Ulac nnig-s tiyiḍnin
Ulac din sidi zekri
Urwented teqbayliyin
Urwent- tt-id d aqbayli
Xas as terrem timedlin
Deg wakal ad iger imɣi
S Teqbaylit
Ma nniɣ-ak Lunis ?
Lunis, yessaweḍ asefru ar yetran, uɣalen-aɣ-id d tiziri.
Ma nniɣ-ak Lwennas ?
Lwennas, yessawel-d wanza-as wa yesla, wa yewwet nneḥ.
Ma nniɣ-ak S iMḥend Umḥend ?
Si Muhend Umḥend d aɛwin deg i ntekkes laẓ, d amezruy n lḥif, d tayri tabuhalt.
Argaz ?
Argaz mačči d bu sin iḍarren d bu wawal ur nettwexxir.
Tameṭṭut ?
D nettat iɣ-d-yurwen, d nekni i tt-yesɛan.
Tayri ?
D targit apipṛi kan hhh
Azzayri ?
Mazal yettnadi iman-is
Amaziɣ ?
Yettwessiɛ ur d-yattawi
Tagmatt ?
Tuḍen
Aqbayli
Yettaɣ-intent, xas iceffu.
Yesteqsa-t Tahar Ould Amar
