Gar wungalen imaynuten i d-yeffɣen tineggura-a, ad naf “Akud i tudert, tagnit i tayri”. D ungal wis sin i yura Djamal Benaouf, yeffeɣ-d ɣer teẓrigin Imtidad, taggara n useggas 2025.
Win yeɣran yakan ungal-is amezwaru “Timlilit n tɣermiwin”, 2022, ad yeḥsu s ccbaḥa d tisukla n uɣanib-is. Maca ungal n tikkelt-a yufrar ugar deg waṭas n tulmisin.
Ungal-a deg teɣzi n 210 n yisebtar, yebḍa ɣef 72 n yixfawen wezzilen. Azwel n yal ixef, ad t-naf d inzi neɣ d abruy n tezlit gar tezlatin n Lwennes neɣ n Ayt Manguellet neɣ n kra n unaẓur-nniḍen. Izwal-a d igzulen n teqsiḍin d tedyanin i d-ttalsen. Yeṭṭef aẓar, iɛudd d aḍar (ixef 9): Iniɣ n yizem yiwwas, iniɣ n yizi yal ass (ixef 11); Adrar ay uccen (ixef 12); Win i k-id-yesbezgen, ad aɣ-d-iruc (L.A.M, ixef 25)…
Tamacahut, lxiḍ yeqqnen gar timawit d tira
Xas ulamma taqsiṭ n wungal tbedd ɣef teqsiṭ n tayri i yezdin Ageswaḥ d tgeswaḥt, ad naf tamacahut tuɣ s telqay deg wul n wungal. Azal n 60 n yisebtar, ttalsen-d timucuha yemgaraden i d-yugem seg tgemmi tansayt n Leqbayel, amzun akken d lxiḍ i yeqqnen gar timawit d tira, gar zik d tura. Amedya n tmucuha : Afuḥan d uqerḥan (sb.84); neɣ Win i d-ineṭqen ad yeqqen aɣyul (sb. 86), Bibb-iyi neɣ ad k-bibbeɣ (sb. 104)…
Tira yerẓan imnaren
Ungal “Akud i tudert, tagnit i tayri” d ungal i d-yettalsen tayri i yezdin Ageswaḥ akked Tgeswaḥt. Dɣa ameskar yefsi leqyud n tmeslayt, yerẓa imnaren akken ad d-yessenfal tayri, lebɣi d ccehwat i ttḥulfun yiwudam. Aya, yenna-t-id s wudem usrid yerna s tutlayt icebḥen i as-yernan sser i wungal. Yeɣza ugeswaḥ, amek ara d-tessenfaliḍ tayri mebla tayri ?
“Akken ara teldi tawwurt, ad tt-jeɣmeɣ seg tqemmuct, ad tt-id-ẓemḍeɣ ɣur-i, ad greɣ afus-iw ad asent-selfeɣ i tedmarin-ines. Seg wakken, mačči akken i tt-tenwa, ad tt-taf d tamuffirt ideg ur terǧi. Dɣa ad d-sakiɣ iḥulfan d wafrayen-is, ad d-taki deg-s tayri, ad fsunt tjeǧǧigin-is. Ad tt-ẓuɣreɣ s amaḍal-nniḍen alamma tekcem ɛemrayen! Alamma tufa-d iman-is tefsi…”
Gar tilawt d targit
Tira n wungal-a d tamxaleft. Tidyanin ttemyekcament deg way-gar-asent alarmi ur tferrẓeḍ ara gar wayen i yellan d tilawt d wayen i yellan d asugen. Simal ad teqqareḍ, ad ak-yeɛreq lewhi. Anda akken tɣilleḍ taqsiṭ ad teffeɣ akka, ziɣ ad teffeɣ akken nniḍen, anda akken ur tegmineḍ ara akk. Amedya deg yixef (65, sb. 175), Tageswaḥt temmut. Yufa-tt tettwaxneq deg texxamt n usensu yerna, ttbutat akk qqaren-d d Ageswaḥ i tt-yenɣan. Ad yeṛwu timseḥsal, ad d-yaf iman-is d anekraf deg ssbiṭer n yimesluben. Maca ɣer taggara n wungal, iban-d ziɣ kra din akk d targit. Tageswaḥt ur temmut ara, netta ur yettwaḥbes ara, tudert mazal ad tkemmel… Dagi ara idubbez yimeɣri, ad as-yini deg wul-is: ha-tt-a tcerket, yundi-tt, teṭṭef-iyi … D wa ay d ungal neɣ ɛeddi ad teqqimeḍ!
Ihi win yebɣan ad yinig gar tilawt d targit, ad iɣer ungal-a, ḥsiɣ ur ineddem ara.
Larbi Yahioun
