Malek Houd d yiwen seg wid iwumi qqaren les anciens. Xas ulamma yeɣra pétrochimie di INH n Boumerdès deg iseggasen 70, dayen ara s-yeldin tiwwura n rbeḥ, maca yesmenyaf ad yefk tazmert-is i uselmed akked yidles n tmaziɣt. Yekki daɣen di terbaɛt-nni n Tazmalt (le groupe de Tazmalt) ideg yella Smail Oulebsir akked Abdelaziz Yesad, yewweḍen leɛfu n Rebbi. Malek Houd d amedyaz i yal d adlis, testeq-at Tangalt :
Tangalt: Azul ay amedyaz. Ma ulac aɣilif, ad aɣ-d-tiniḍ anwa i d kečč ?
Nekk d amdan
Yeẓbubin d iḥulfan
D Amlikec akka i d-nnan
Tira tezdeɣ iɣsan
A wi yufan kan
Ad neqsen yiɣeblan
Tessefruyeḍ, teqqareḍ-d. Ayen d-teqqareḍ d awal, d asefru neɣ d tamedyazt ?
Nefka awal
Ara nseggem d awal
D asefru ara t-nebnu
Tamedyezt d tin i d ḥellu
Ma nniɣ-ak Lunis ?
Tayri mi tt-yecna
Yeǧǧa-tt ɛeryan
Tasertit mi tt-yenna
Tessakay amdan
Lunis d amɣar azemni
Mazal aṭas ad d-yini…
Ma nniɣ-ak Lwennas ?
Itri deg (yi)genni ittreqriq
Tafat-is tessemɣi-d tismin
Tettaweḍ ɣer yal amḍiq
Tessaki-d akk tiɣaltin
Aɛdaysi yeggra-d di ṭṭiq
Yedder amzun ddaw n tmedlin
D tafekka n Lwennas i nɣan
Tiktiwin-is ttcalint
Lemmwal-is yiwen i d-sɛan
S tmettant tura seftin-t
Yuɣal deg-neɣ d win yellan
Deg wul dima nettawi-t
Ma nniɣ-ak Si Muḥend u Mḥend ?
Ihi mi ara d-nebder awal-agi n tmedyezt amedyaz amezwaru i d-irezzun s aqerruy d Si Muḥend u Mḥend. D yiwen i iεerken awal akken i as-yehwa, ad t-yemsel neɣ ad t-yesker, lxersum ad k-id-issiweḍ akken i t-tebɣiḍ ama d win yelhan ama d win n diri, win i t-yuwin yuklal-it mebla ccek. Mačči d yiwen usentel iɣef d-yuwi awal maca win i yeǧǧa akken i t-id-tesεa yemma-s d « Tayri » ulac d acu ur d-yenni ara fell-as.
Deg yiberdan yewwi asurif
Yedda ur yengif
Asebsi-ines d amwanes
A-t-an iɛedda i Sṭif
Ɛennaba n lḥif
Tefka-t akkin ɣer Tunes
D asemmiḍ, d azɣal kif-kif
Yezdi d uɣilif
Akka i tga tudert-ines
Amzun yettawi-t wasif
Yeṭṭafar rrif
Deg waluḍ n zzman yexnunes
Asebsi yeččur d lkif
S wawal yeshetrif
Imi-s yettarew-d times.
Argaz ?
Argaz yettwaṭṭaf deg yiles
Ayen yelhan d wayen n diri ines
Ma teḍra-d tegnit tekres
Win iweḥlen ad t-id-yekkes
Ad t-tafeḍ dima yebges
Win i t-yeḥlaǧen ad t-yaf sdat-s
Tameṭṭut ?
D nettat i d yemma-s n ddunit
D nettat i yessidiren awal
D nettat i d Taqbaylit
D nettat i d tamurt, i d akal
Ma tebra i ṭṭbel d tawaɣit
Deg tiɛiggent ad nagar lmal
Tayri ?
D tafsut m yijeǧǧigen
D tizegzewt n yigenni
D timerqemt mm yal ini
D ccbaḥa-nni ijeggḥen
Akkagi i tga tayri
D tinebgiwt n wulawen
Taseftit n umyag « ḥemmel »
Imqimen d « nekk » d « kemm »
Tayri deg-sen tettellem
Iḥemmel wul ad as-isel
Agama iɣucc ilem
Yyaɣ kan ad neddukel.
Bɣiɣ ad aruɣ ɣef tayri
Tin ay izedɣen ulawen
Ad yeffeɣ wayen n diri
I yelhan ad d-yeqqimen
Timura ad awḍent s itri
Imal d win ara iseggmen.
Tagmat ?
Tagmat, ttliwi-tt
Seqwu ifadden-is
Deg yigenni Sali-tt
Ad yali ccan-is
Ur ttaǧǧa ara nnif
Ad k-yeffeɣ afus
Ad k-yali wammus
Ma ur k-yuwi wasif
Azal n tegmat d ameqqran
Dduklen yiḍudan n ufus
Bedden ɣef wayen i d-yusan
D azeddgan dima ubernus
Iɛedda wass d wussan
Adrar yefsi-as wagus
Azzayri ? 11- Amaziɣ ?
Ulac d acu i yewɛren
Am win iɣuccen iman-is
Ad ifessi am ugris
Ad yuɣal d win-nniḍen
Ad yettu ula d isem-is
Yedgedgen ddaw n ufḍis
N win akken i t-yuɣen
Iɛemmed yeqleb idis
Yebbelttex am ubexsis
Iɛreq-as jedd n jeddi-s
Yedda d win i t-iɣurren
Yettu taqbaylit
Tin i t-id-yurwen
Yefren tabaɛtit
D tin i t-iseḥren
Tesdderɣel-as allen
Yeggra-d deg twaɣit.
Azalen, zegren-d leqrun
Tura, nezzi-asen aɛrur
Nessuɣel nerra agennur
Iqerray akken ur ceffun
Acḥal i neǧǧa d amur
Tibḥirt yečča-tt umermur
D tidet , mačči d amezgun
Undin ma d kra d ugur
S uɣerbal ttɣummun aggur
Lekteb yeggam yettuzur
Yerra amdan d aɛeggun.
Yettu iman-is
Yedda d aqeffaf
Issenz nnif-is
Uraren-t d alqaf
Yezzi-as-d uglaf
Yečča-as iles-is
Aqbayli ? 13-taqbaylit ?
D agdud yettagin ddel
Nugi ad nbeddel
Seg zik akka i nella
Anida yella lbaṭel
Ntett-it d asgel
Tgerri-d d tilemt lḥila
Tidet d temlel n udfel
Ḥemmlen-tt Leqbayel
Ḥerzen-tt amzuni d ayla
Akud qerriḥ d ifelfel
Azref yettwagdel
Ttnadin ad nɛiwed ccetla
Inuda abeddel
Yettnadi ɣef laṣel
Yenfan tilisa
Tehmej tlafsa.
Tcerreg tasa
N merra Leqbayel
I yerwan asgel
Ɣas tella lmerqa
Yesteqsa-t Tahar Ould Amar
