Yiwen wass, yuc Ayyur yeẓra yiwen ilemẓi iteddu deg yiḍ abrid abrid n yiwet n taddart. Yettbin-as werraɣ wudem-is.
Ayyur yenna d yiman-is : Ilemẓi-ayi atan sellaw wul-is, yeččur d iɣeblan. Yuc Ayyur yeẓra ilemẓi d agujil. Yeẓra imezdaɣ n taddart-is yiwen ur yettmeslay yid-s. Yuc Ayyur iɣaḍ-it ilemẓi, dɣa yerza ɣur-s, yenna-yas : « Nekk d yuc Ayyur, yuc n tziri. D nekk i d-yettaken tafat i tmurt, i wakken imezdaɣ-is ẓerren abrid ula deg yiḍ ».
Ilemẓi yessenta allen-is deg wallen n yuc Ayyur, yessusem. Yurc Ayyur yenna-as : « Ack ẓriɣ a mmi d acu i k-yuɣen. Ẓriɣ kečč d agujil i telliḍ. Ẓriɣ ɣur-k iɣeblan akk d yimezdaɣ n taddart. Atan wudem-ik yuɣal d awraɣ, ul-ik yuɣal sellaw.
Ihi, tura, yessefk ad d-tessufɣeḍ ayen i k-yerran ul-ik sellaw. Ttru, ttru, a mmi. Sufeɣ-d imeṭṭawen-ik, ad ires wallaɣ-ik, ad yecreh wul-ik. D acu kan gar tamawt, ur yessefk ara ad tesseɣliḍ imeṭṭawen-ik ɣef tmurt, ad tames. Tamurt yessefk ad tili tezga d tazedgant.
D nettat i d-yettaken i wayen akk yeddren deg-s, s wacu i teddren.
Ihi seɣli-d imeṭṭawen-ik ɣef yidmaren-iw, ad ten-awiɣ ɣer yigenni.
Ilemẓi, yerfed allen-is ɣur-s, yessusem. Ur yessin ara d acu i d imeṭṭawen. Ur yessin ara amek ara ten-d-yessufeɣ. Imir-nni, imdanen, ur ssinen ara d acu i d imeṭṭawen…
Aqcic, yenna-as i yuc Ayyur : « Ur zmireɣ ara ».
Dɣa Yuc Ayyur islef-as i yilemẓi aqerru-is, yessenta allen-is deg wallen-is. Dɣa ilemẓi yergagi drus kan, ɣlin-as-d imeṭṭawen ɣef yidmaren n yuc Ayyur.
Yuc Ayyur, yeǧǧa-t yettru almi i d-ffɣen akk imeṭṭawen-is.
Din din yezmumeg ilemẓi, iḥulfa i wul-is yecreh, yezha.
Yuc Ayyur, iger-as iɣallen, yenna-as : « Atan imi tettruḍ tura yuɣal wul-ik yecreh. Ihi seg wass-a d asawen atan ad k-ḥemmlen akk imezdaɣ n taddart-ik. Ad teddreḍ yid-sen di zzhu. Ur tettu ara d kečč i d amdan amezwaru deg umaḍal i yettrun… »
Ilemẓi- yenna i yuc Ayyur s uzmumeg : « Tanemmirt a baba Ayyur. Dɣa yeṭṭef abrid-is s taḍṣa. Anida yemlal amdan yezmumeg-as. Nutni daɣen ttezmumugen-as-d.
Yuc Ayyur yessenta allen-is deg ilemẓi, yezmumeg ula d netta, dɣa yuɣal ɣer yigenni.
Seg wass-nni imdanen ẓerren tiregwa imeṭṭawen n yilemẓi ɣef yuc Ayyur mi ara tili tziri.
Seg wass-nni zemren ad ttrun yimdanen, ma ḥulfan s kra iqreḥ-iten. Mi ara d-faken imeṭṭawen, ttḥulfayen d wulawen-nsen cerhen, allaɣen-nsen rsen.
Ilemẓiyen, tilemẓiyin n taddart tikwal, tikwal mi ara tili tziri ttalin ɣer yiwet n tiɣilt yellan sennig n taddart-nsen ceṭṭḥen i yuc Ayyur.
Akli Kebaili
Frankfurt/Main ass n 09.04.2025
