Sin n wawalen. D inemgalen. Azɣal. Agris. Sin n wawalen kan, sawḍen ad sendun udem n tudert, udem n tmurt, udem n tmetti, udem n zik, udem n tura. Wissen kan win n uzekka… D udem ideg azɣal yegres, d udem ideg tikerkas d tatut d nnekran d yissiḍ sgersen azɣal.
Azwel n wungal n Amin Zzawi, s tefransist Canicule glaciale, ɣas ur iban εinani wassaɣ-ines d uḍris, d ameɛɛen kan i d-yettmeɛɛin, iga am yireggen yettalin ɣef lemri ; udem ur iban, iɣunfa-t lemri ; tamuɣli ur tban, tefsex s lefwar n yireggen.
D ungal ibedden ɣef usefxes n umezruy, ɣef rekku n tmidwa d yissiḍ n tesnekta i yedhen ddin. D ungal ideg tizeɣzeɣt tesseɣres tiẓedwa n umezruy.
D ungal yebnan ɣef umsami n teḥkayin, n tlata n teḥkayin : tin n ufransis amasiḥi Augustin Girer, tin n uwday Lévy Al N’qaoua d tin uzayri ineslem Afulay (yettbeddil usem… am tata… neɣ akken i t-bɣan wiyeḍ : tikkelt d Mohamed, tikkelt d Younes, tikkelt d Kenzi).
Aɣanib n wungal-agi d amaynut…
D ungal n tɣersi, d ungal n uḥemmal itetten tiɣezza iǧuǧgen, aḥemmal-nni yettbeddilen tilisa. Tamurt, tdebbel udem, azekka yekcem di wissen…
Ungal-agi n Amin Zzawi, Canicule glaciale, d tafelwit tameqqrant ideg arekti ur yuli ara, aɣrum-is, yecweḍ, yeqqur ur bnin, am wudem n tmurt.
Ungal Canicule glaciale n Amin Zzawi, ack-it. Mennaɣ-awen-t…
Muḥend Akli Salḥi
Amin Zaoui
Canicule glaciale
Ungal
Tiẓrigin Dalimen, 2020, Lzayer
233 isebtaren
