Ha-tt-an gar ifassen-nwen/nkunt Tangalt, tasɣunt taseklant d-ilulen ass-a. Dɣa, deg wass yecban ass-a (28 di tuber) i igen i lebda umaru Kateb Yacine, aggag (l’intellectuel) ilelli. Aṭas n waggagen ilelliyen i d-tefka Tmurt n Lezzayer, kra deg-sen ruḥen d asfel (am Asfel n Rachid Alliche), ur ḥḍiren ara i tmaziɣt yuɣalen di lkaɣeḍ, tamaziɣt yuran ungal, yuran tullist, yuran amezgu, yuran aɣmis…
Lemzegga-nnsen meqqret!
Ass-a, tutlayin n tmaziɣt, ladɣa taqbaylit, ur tettunt ara lxir n yimenza i tent-yuran, asmi akken ur yettwasen ara ula d awal “tamaziɣt”, asmi akken ula d lakul ur d-isaḥ ara i les indigènes. Ihi, tajmilt i Boulifa, Bensdira, Bélaid At Ali.
Lemzegga-nnsen meqqret!
Ass-a, tutlayin n tmaziɣt ur tettunt ara leqdic n yimrabḍen iṛumyen d-ileqqḍen agerruj-nni n yiles, jemɛent-t, uran-t, ufant-t tsutiwin deg FDB (Fond de documentations berbères). Ihi, tajmilt i Père Degezelle (win akken s-yeṭṭfen afus i Bélaid At Ali, almi d-yurew Lwali n wedrar), Père Dallet, Marie Louise De Vincenne, Lucienne Brousse…
Lemzegga-nnsen meqqret !
Ass-a tutlayin n tmaziɣt ur tettunt ara, d awezɣi ad t-ttunt, win akken d-yellan d sseba n tefsut 80, mebla lɣerḍ-is. Win akken yennuɣen deg wannar n tusna, mebla dderz, mebla aɛeggeḍ. Win akken d-ifeṣlen tajerrumt i tmaziɣt, tantala taqbaylit, yerna icebbeḥ-itt-id s umawal.
Lemzegga n Mouloud Mammeri meqqret!
Ass-a, tutlayin n tmaziɣt, ladɣa taqbaylit, yuran ungal, tullist, taceqquft umezgun ur tettunt ara imezwura-nni : Bélaid At Ali, Mohia, Amer Mezdad, Said Sadi, Mokrane Chemim, Ramdane Achab, Djamal Benaouf, Mohand Ait Ighil…
Tajmilt-nnsen meqqret !
Tangalt ad teddu di lateṛ n yimezwura-ya i d aɣ-iwehhan abrid n tafat yessufuɣen ɣer tifrat.
Lebɣi-s agejdan d “aberreḥ” s yidles amaziɣ, ladɣa tasekla, i leǧnas nniḍen n wumaḍal.
Lebɣi-s agejdan d tawafɣa si “snat n tɣaltin d wezgen” i d aɣ-yettkellixen, i d aɣ-yesganayen xef yiwen yidis, almi qrib i numen “ḥala nukni i yellan deg ddunit, nnig-nneɣ ḥedd ur yelli”, almi qrib i d as-nufa lbenna di tciṭa i d aɣ-yesbuḥruyen , ad neṭṭes di lxir d lehna.
Lebɣi-s agejdan d aseqreb ɣer tewwurt n Nobel , ur d aɣ-tḍerru ara am waggagen-nneɣ n umezruy aqbuṛ (Apulée, Juba II, St Augustin, Ibn Kheldoun…), yeɣunzan tutlayt-nnsen, idles-nnsen, stenfɛen talsa, wweḍen taqacuct s tutlayin-nnḍen, tutlayin n yimnekcamen. Lḥasun mačči d yiwen n lebɣi ara yilin deg isebtar n Tangalt.
Tangalt ad tesseqdec tutlaiyn n tafransist akked tamaziɣt; taglizit (gar-aneɣ d kra n wagguren) akken ad tezikken “lbaḍna” n tsekla taqbaylit, akked yidles s umata, i yigduden-nniḍen, i umaḍal.
S tutlayin timaziɣin (taqbaylit di tazwara, simir ara d-leḥqent tiyaḍ) ara tezikken Tangalt “lbaḍnat” n tsekliwin n leǧnas-nniḍen i tmazɣa.
Yenna-yas umedyas : “Zik, wa ihedder-itt i wayeḍ, ass-a di lkaɣeḍ, ad tt-id-afen ineggura”
Tangalt teqqar-as : Zik, wa ihedder-itt i wayeḍ, ass-a tuklaleḍ ad d-ḥelliḍ amkan di tmura”
