«Ilaq ad taruḍ cfawat-im mebla lxetyar gar wayen tebɣa ṭbiɛa-m d wayen d-tessuli cfaya-m. D leεtab meqqṛen maca xemmem a yemma-inu d akken ur ilaq ara ad truḥ temẓi-m d tirmit d-teggiḍ seg tmurt n leqbayel, d tamusni tameqqṛant i nezmer ad d-nekkes seg-sent, ad ilint ɣur-i d agerruj ur nesɛi ssuma, di laεnaya-m a yemma efk amkan deg tqaṛṛuyt-im i usuter-iw»; wi, d awalen n Jean Lmuhub di tebrat yura i yemma-s akken ad taru tudert-is ara d-yilin deg 1968, deg Histoire de ma vie.
« Azul fellam , Faḍma tilemzit n udrum-iw, ɣur-neɣ ur temmuteḍ ara! Ad nɣar deg tuddar ayen turiḍ ad t-tenɣar deg tesnawiyin, ad naxdem ayen iwumi nezmer i wakken ad ɣren medden ayen turiḍ.» i yenna Kateb Yacine i Faḍma Iεemrucen.
Marguerite Faḍma At Mensur Σemruc tlul di 1882, yemma-s Σayna at Lεarbi u Saεid tlul deg Tizi Hibel, yefka-tt gma-s ad tezwej d umɣar ɣas meẓẓiyet, tesεa-d ɣur-s sin warrac. Mi yemmut wergaz-is, Σayna tugi ad teddu d gma-s, imi ur ilaq ara ad teqqim iman-is deg uxxam. Yerfa, dɣa iffeɣ-itt ula d lmut n yemma-s ur d-as teḥdir ara.
Temḥemmal d yilemẓi n twacult n urgaz-is, terfed s tadist maca ilemẓi-nni yugi ad yeqqiṛ belli tadist-ines acku yaxḍeb yiwet n teqcict d tamarkantit dɣa Ɛayna teffeɣ-itt taddart. Amzun ur ixuṣ ara akk wanect-a Ɛayna terbu iman-is, tegzem «amrar-is» s tuɣmas-is yiwen ur d-yerzi ɣur-s siwa yiwwet n temɣart i as-d-yewwin cwiṭ n umεic.
Tlul-d Faḍma izwar-itt-id lḥif imi taddart akk tɣuc-itt, yiwet n tikkelt teḍfeṛ sin watmaten-is ad ksen lmal nettat meẓẓiyet tettazzal tessawal a dadda ! Dɣa kra warrac n taddart demren-tt ɣer daxel n ukarmus… tikkelt nniḍen ddaw leḥris n lmiziriya d lḥif teqsed yemma-s ad terr taqcict taleqqaqt daxel n ubassal n waman di ccetwa maca tekkes-itt-id di dqiqa taneggarut, Σayna tebɣa kan ad tessarwel yelli-s seg accaren tmetti-is ɣef aya tewwi-tt ɣer temrabḍin n yirumyen maca ula dinna ur temniε ara seg tyita, terra-tt-id yemma-s s axxam. Deg 1886 tekcem ɣer uxxam n yigujilen n taddart Ufella, ad tekk dinna ɛecra n yiseggassen ara d- yeldin tiwwura n tsekla tarumit i teqcict yesɛan lemḥan d ticrurin n yijifar-is.
Tuɣal-d deg 1897 ɣer taddart anda tettidir am teqbayliyin akk almi i as-d-tussa tegnit n uxeddim deg sbitar n At Mengellat anda tuɣal Faḍma d tamasiḥit s yisem n Marguerite. Ad temlil d yiwen n yilemẓi n Yiɣil Ɛli, Antoine Belkacem Σemruc ad jewjen ass n 24 Yuct 1899. Ad sεun, Paul-Muḥend Saεid (1900-1940), Henri-Σacur (1903-1958), Jean-Lmuhub (1906-1962), Louise-Marie (1908-1909), Louis-Muḥend Sɣir (1910-1939), Marie-Louise Ṭawes (1913-1976), Noël-Saεdi (1916-1940) akked René-Malek (1922-) .
Tawacult truḥ-d ɣer Yiɣil Ɛli tamurt n Belkasem Σemruc maca yedda-d lḥif d aɛeggal yid-s seg Larebεa n At Yiraten imi ula dinna ur temniε ara Faḍma seg ddɣel d uεayaṛ ladɣa imi teḍfer taṣret nniḍen (tamasiḥit), ayen yeǧǧan Faḍma d twacult-is ad inigen ɣer Tunes m lḥif deg 1953 tuɣal-d ɣer Yiɣil Σli maca ddaw leḥris n lgirra d usegged n yimasiḥiyen unagen tikkelt nniḍen ɣer Fransa .
Deg 1930 tebda akked Marie-Louise Ṭawes d Jean Lmuhub tira n cnawi teḥrez deg alllaɣ-is, tura isefra ɣef arraw-is Louis, Paul, Noël wid-nni yemmuten amzun akken ur terwi ara asawen tmaɣbunt. Marguerite Faḍma At Menṣuṛ Σemruc teḍfeṛ arraw-is ass n 9 Yulyu 1967 deg La Bretagne seg Larebɛa ɣer Yiɣil Ɛli seg lḥif ɣer lḥif seg yimi ɣer tira Faḍma tbedd-as i lḥif d tinigit werǧin tekni mačči kan tbedd maca tura yerna teǧǧa-d snat n tgejda icudd yisem-nsen ɣer tmurt n Leqbayel.
« Ilaq ad taruḍ cfawat-im mebla lxetyar gar wayen tebɣa ṭbiɛa-m d wayen d-tessuli cfaya-m. D leεtab meqqṛen maca xemmem a yemma-inu d akken ur ilaq ara ad truḥ temẓi-m d tirmit d-teggiḍ seg tmurt n leqbayel, d tamusni tameqqṛant i nezmer ad d-nekkes seg-sent, ad ilint ɣur-i d agerruj ur nesɛi ssuma, di laεnaya-m a yemma efk amkan deg tqaṛṛuyt-im i usuter-iw » wi d awalen n Jean Lmuhub di tebrat yura i yemma-s akken ad taru tudert-is ara d-yefɣen di 1968, deg udlis Histoire de ma vie tettales-d tudert-is, lḥif-is n tmettut, taqbaylit, tamasiḥit,tazzayrit ur nesεi baba-s, Faḍma tunṭict-id deg ddunit d lmeḥna.
Marie-Louise Tawes Σemruc tura ɣef yemma-s deg Le grain magique « i kemm iyi-d-yettbanen am ttejra n lfakiya u ɣur d-ttasen yefrax icennun tiqsiḍin d cnawi-ya d-yufraren seg uẓar n zzman wḍent-d seg yimi ɣer yimi almi d ticenfirin-im tefkiḍ-iyi-tent-id akken ad-tent-aruɣ s tutlayt tafṛansist neṭṭeḍ ɣur-m akken neṭṭeḍ tinna-nneɣ, inzan-nni amzun d iwudam yettsaɛaden tira-inem, ccnawi-nni d-tettawiḍ s ssut-im ttmettatent ass-a deg tmurt-nni anda d-lulent.»
