L’histoire de ma vie n Faḍma Amrouche s Teqbaylit.

Taqsiḍt n tudert-iw, d tasuqilt n Histoire de ma vie, tura s tefransist Faḍma At Menṣur, i d-terra Katia Touat. Di Taqsiḍt n tudert-iw, Faḍma tenna-d ayen ddrent nettat d yemma-s. Tules-aɣ-d ccama d-yeddan di twenza-s, baba-s yugi ad as-yefk isem-is, yugi ad tt-yeqbel d yelli-s, timetti tɣunfa-tt. Tɣunza-tt… d yelli-s leḥram…

Yemmut wargaz n yemma-s n Faḍma, nettat d tilemẓit, ala 22 n yiseggasen di lɛemer-is, sin yigardan ɣer yiri-s. Tlul-d tayri gar-as d yiwen n yilemẓi n lḥara n wargaz-is, tarfed tadist, asmi d-ilul llufan d taqcict i wumi tefka isem Faḍma, ilemẓi-ni yenkar acu yellan gar-as yid-s, yugi ad as-yefk isem-is.

Tesɛedda-d temsalt di ccraɛ n Iṛumyen n talit-nni, gar at uxxam-is i yebɣan ad tt-ssufɣen seg uxxam-is, ad ḥarmen arraw-is seg wayla n babat-sen akked yilemẓi-ni yugin ad yeqbel yelli-is, yeṣah-i-tt-id ur tetteffeɣ ara.

Tkemmel yemma-s n Faḍma tudert-ines, teɛreḍ amek ara d-teskker arraw-is, s yiḍudan yessewɛaden ar ɣur-s ɣef tecmat bubbent nettat d yelli-s tamecṭuḥt, tebbed ur tekni i ddel, tqubel tucḍa n temẓi-s, tugi lbaṭel ad iɛeddi ama fell-as ama ɣef tmaẓuẓt-is d warraw-is. Tezga teqqar-as : « Ticraḍ inu ifent timira n yirgazen ».

Akken i aɣ-d-tulles daɣen Faḍma At Menṣur temẓi-ines qessiḥen tesɛedda gar yifassen n Temrabḍin tiṛumyin n Yiwaḍiyen d tid Larebɛa n At Yiraten, d warwaḥ d tuɣalin-ines ar Tizi Hibel (axxam n yemma-s) d kra twala tiṭṭ-is, tmesslay-d fell-as, ula d isekla, ijeǧǧigen, tibexsisin, asisnu, tagrest, aɣurar, tewwi-aɣ ɣer ccbaḥa n ugama di tmurt n leqbayel… tenna-d fell-asen awal.

Temmeslay-d daɣen ɣef tugdi tt-icarwen mi tewweḍ d tilemẓit, amek ara tqabel tameddurt-is yakkan ma yella teṭṭaxer-d deg uɣarbaz, tuɣal-d ɣer taddart tt-yettwalin s tmuḥqranit d lemɣiḍat, acu kan twaṛet-d daɣen nettat tabɣest d t wafud n yemma-s, truḥ ar sbiṭar n Micli, ad texdem anda temlal Belqasem…

Gar-as d Belqasem tlul-d tayri icebḥen, tenna-d amek tekcem ɣer twacult n At Ɛemruc, amek tt-id-qublen; teḥka-d amek acimi unagen ɣer Tunes deg-i sɛeddan 40 iseggasen. Talalit n Jean Muhub Ɛamruc d Tawes Ɛamruc. Amek ẓewren di tɣuri…, atg.

Taqsiḍt n tudert-iw, i-d-terra Katia Touat ar teqbaylit terna-yas cbaḥa i weḍris n Faḍma armi ma teqqareḍ-tt tessessuy i ymeɣri d tasuqilt ! Terra-d awal n Faḍma s aẓar-is.

Katia Touat d tamedyazt. Tessufɣ-d yakan amud n yisefra Ijeɣlalen n Tudert (2017) deg i-d-tesken tazmert meqqren n umeslay-is s teqbaylit. Tira-s tettnerni, tasuqilt-a tesfrar-itt-id ugar.