Tigi mačči d timucuha, akka i as-tsemma Djidji Nait (neɣ Nait Djidji) i udlis-ines. Deg-s 06 n yiḍrisen. Wissen d acu-ten. Nettat ad teqqar mačči d timucuha. Am win ara ad k-yinin tigi ur llint d timsal i d-yesrusuyen nadam. D ayen nniḍen akk ; ma ur k-id-sakint, ur k-sganayent.
Iḍrisen-a, d tiḥkayin i d-yettawin ɣef temsal n ddunit, tid-nni akken itteqsen amdan am tneggas deg uberḍi akken ad yettkaki, akken kan ur yeggan ɣef sin n yimeẓẓuɣen. Timsal am tigi, mačči d timucuha… ur asent-zmirent tmucuha, la tid n uwaɣzen d tteryel, la tid n Mḥend Uccen, la tid n dadda-k Inisi…
Tigi mačči d timucuha d ṣṣda i as-yuɣalen i « teɣri taneggarut n tsuta ur neẓri ma tedder neɣ tesselqaf » (sb.03), d tiɣri, d tamaynut, yettsuɣun deg umeẓẓuɣ n win yebɣan ad yili d netta (« win yugin ad yili d menwala »(sb. 04)), win akken ileqmen tudert, yekkaten mgal nnger (« win yugin bellu » (04)), ad as-teqqar tmarut, ma ur yesɛuzzeg ara : « d asnulfu i d ddwa ḥellu » (sb. 04).
Akka…
Nekk, walaɣ deg yiḍrisen-a, ɣas ur d-yettban ɛinani tikwal (am deg uḍris-nni wis sin d wis 03), d aḍad isewɛaden ɣer tseḍsa n zzman (ironie du sort) neɣ maḍi d timenna n tzulal n tudert (absurdité de la vie). Annect-a, walaɣ-t deg waṭas n yiḍrisen, am wi :
Aneɣrim, d aḍris amenzu (sb. 05-17) deg udlis-a. Asmi akken i d-yeffeɣ, waqila d tikkelt tamenzut, deg wadeg Imyura.net, ittusemma d tullist. Awadem deg uḍris-a, ur t-yemsil wallaɣ s umakun (merveilleux). Γas tsekcem-it tmarut (-temsawalt = narratrice) deg lqaleb n uferriɣ (fiction), tessels-as talaba n tilawt. D ayen i yerran taḥkayt d taknilawt (vraisemblable), tezmer ad teḍru.
Imi ḍrant ddeqs akka teḥkayin am tigi, tid-nni iqerḥen, am tin n umɣar-nni i umi tessawal temsawalt (narratrice) Aneɣrim : yufa-d iman-is deg yiberdan, texleḍ-as tidi d yimeṭṭi d ugeffur, akken i as-texleḍ ccemma d yimetman… tedduḍ akkin ar k-id-yerr lḥiḍ n lḥif.
Mina, d aḍris wis 05 (sb.130-150) deg udlis-a. Ula d netta d tullist, ur yelli d tamacahut. D tilawt n uḥulfu n umdan ɣer wid iḥemmel, wid-is ; d tilawt n uḥulfu n umdan ɣer uɣersiw (da d tagmert), d tilawt diɣen n uḥulfu n temsetla (solidarité) mi ara yecceḍ umdan deg uderbuz n yir ussan. Anda akken i tugadeḍ nnger a amdan i tetterḍeq teskert.
Tuɣal-d tefsut (sb. 151-163), d aḍris wis 06, d aneggaru deg wammud-a n yiḍrisen ur nelli d timucuha. Akka i t-tebɣa tmarut Nait Djidji ; ula d wa, mačči d tamacahut. Wa d tidmi n uwadem yettxemmimen s leɛyaḍ. Γef tefsut… ɣef tefsut-nni… tin akken yeddan gar usirem n temẓi d tebrek n yigli…
Yir aḍar (sb. 86-129), d aḍris wis 04. Seg uzɣal yesɛiqiren tira ɣer tergit i d-yesmektayen tilawt, yezga usteqsi d usirem : « Wissen kan ma ad yezger wayen yettwarun « s tagi-nneɣ » akud akken ad yidir kra n yiseggasen, sdeffir bab n tira, wissen ma ad yezmir ad yemɛebbar d Krunus iɛussen asaku yettawin akkin i wasif n tatut ?
Tuget n wid yettarun ahat ɣef wannect-a i la ttarun : ad ssiwḍen tafekkact-nni, akken tuɣ, i wid-nneɣ ara izdɣen azekka » (sb.88-89).
Muḥend Akli Salḥi
