Aḥric wis sin : …nnig lkanun
Ayen yewwet lmir n tɣiwant akked d yimḍebren n wexxam n yimǧuhad ad as-ɛelqen cciɛa wa tt-awin yid-sen anda yella ddifili n neǧma wehlal, ulac. Dɣa ass-nni, mi iḥetet lmir, yeqqar-as; “a nna Sadiya ilaq ad am-ner tajmilt, tuklaleḍ. ḥala kem i d-yegran, di temnaḍt, d tanagit ɣef lḥif n lgirra-nni.”, terra-yas: “a mmi mačči d nek i yuklalen tajmilt : d taddart. Xussen-tt iberdan, waman, trisiti, lakul…mačči d yiwet. Rnu, ɣef waya i nebuṭṭi fell-ak.” Seg was-nni, ur yezi lmir ɣer Sadiya n L’euro. Di taddart, ḥala Tayemmum (isem-is aḥeqqani Caban Uqasi) ur neḥmil ara Sadiya n l’Euro di taddart. Tikwal mara t-yeqsed yiwen ad t-isteqsi ɣef waya neɣ d waya, ad as-d-yer s uɛekki: “ruḥ ciweṛ dada-k Sadiya!” Yettwali d netta kan i yefka lḥal ad yili d ameqran n taddart.
Sawalen-as Tayemmum, imi werǧin yuɣ lwuḍ s waman. Caban Uqasi d amecḥaḥ, igezzem aksum ɣef yiɣes, tikkelt i useggas mara t-id-yaɣ. Ɣur-s taḥanut n tgella di tlemmast n taddart, segmi ara yeldi tafejrit, netta di tḥanut alamma yeɣli-d yiḍ. Din i yettaɣ luḍu s weẓru, i yezzala, i ifeṭṭer s tebṣelt neɣ taṭumaṭict. Mara t-laɛin ad taddart, sawalen-as: “a dda Lḥaǧ!” . Deg useggas-nni ideg ara iruḥ s axxam n Rebbi, taddart akked tuddar d as-d-yezzin meṛṛa slant belli ad d-iẓur axxam n Rebbi. Ugar n sin wagguren ur d-iban ara di taddart.
Ass-nni, sin wussan uqbel lɛid tameqrant, iwala-t Lbacir tama n wexxam-is i yeṭṭurfen acemma ɣef taddart. Niqal lbacir ur yumin ara ayen walant wallen-isa, yenna-as: “awah, d lmuḥal, mačči d netta, mačči d Tayemmum, deg wexxam n Rebbi i yella”. Akken ad yekkes ccek, azekka-nni, yuɣal iqerreb s leḥder s axxam n Tayemmum, yeddari deffir n tnuqult, ur d-yeṭṭaxer ara s-yin, almi d as-d-tban tcacit tazeggaɣt, tebluzt tazegzawt akked tqadumt n…lḥaǧ Tayemmum. ..
Yettkemmil
