Asebbaɣ d ungal wis sin n Ḥusin Luni, i-d-yerna ɣef Tfuk ur tfuk ara . Ungal-a yegla-d s umaynut i tsekla taqbaylit s wamek i yebna unagal tasiwelt-is. Amsawal n teḥkayt-a ur yelli ara d awadem ; ur aɣ-d-yettales ara ɣef yiman-is d wayen icudden ɣur-s neɣ ɣer tudert-is, akken ur d-yettales ara ɣef yiwen-nniḍen « netta », maca yeẓra, iwala yerna yessen akk kra yellan ɣef wasaḍ d yiwudam-nniḍen acu yeḍran d wacu ara yeḍrun yid-sen.
Yessemres amqim ilelli i yellan deg wudem wis sin asuf « kečč » di teɣzi n ugar n twinest n yisebtaren, amzun akken yettmeslay-as i « kečč » yettuɣalen ɣef yiwen n yilemẓi i d-ilulen akken kan ad yedder d anaẓur, d asebbaɣ ilemẓi mi qqaren Yuba II. Amsawal-a mačči d aniri naɣ d azɣaray maca d imezgi « omniprésent » imi yessen iḥulfan, ttexmamat n yiwudam-is yakkan Yuba II iwumi i d-yessawel taḥkayt-is.
Yuba II, am yilmeẓyen mi tezher tefsut deg wul, widak i yessaramen ɣer wayen yelhan yezmer ad t-yewweḍ umdan. Iḥemmel tudert, yessaram abeddel, yettḥulf i wuguren d wayen ixuṣen tmetti-ines amek ala netta yellan d anaẓur ; yax qqaren-d «anaẓur yettḥulfun ugar n wiyaḍ» ! Yuba II yemmal d acu i d tudert n tayri, tin sin yimdanen d-ilulen, yeddren di snat n tmettiyin yemgarraden am Yuba d Nathalie; tayri i d-yusan txulef ttexmamat n tmetti anda yettidir Yuba, d tayri izeddin tifekkiwin, tayri n ccihwan. Acu kan xas yemgarad uxemmem d tmuɣli n tmetti-ines maca yedder-itt ulama drus i tdum.
D almud tayri-is d-ilulen si tmuɣli-s tamezwarut ar Tseɛdit, i iḥemmel seg ul, yerra deg-s laman, acu «laman yedda d waman», imi tayri n lexdeɛ, n tikerkas. Tuker Taseɛdit i tidet, isxef-itt cci d tkerrust n Xaled.
Timetti n Yuba II, ur tt-tɛawen-it ara ad d-yifrir, ad d-iban akken xeddmen di tmura-yufraren i unaẓur. Tamurt-a, awi-d kan win ara tḥuc seg yiḍarren, naœ tundi taqerract deg ara yeɣli, wa ad tegdel fell-as abrid yettawin ɣer tafat « Timura refdent anaẓur d tẓuri, akken refdent imussnawen d yimnadiyen d wallaɣen yettxemmimen. Γur-neɣ nenneq-iten, neɣ nettruẓ-ten mi nenɣa taẓuri-nsen, nenneq imussnawen d wid yettxemmimen, imnadiyen ; wa nenɣa-t, wa nesseḥbes-it, wa nenfa-t anda-nniḍen. Di tmurt-nneɣ taẓuri tsuffuɣ rruḥ ɣef umeṭreḥ n tmettant, nekkni ncennu yuli-d waggur fell-aneɣ » (Sb.111). Ur illi wazal i tmussni wani i tẓuri, nnumen di ṭṭlam, di timḍellas i teddun, ugin ad siɣen taftilt xas i yiwen n wass, almi yuɣal unaẓur neɣ umussnaw yettwali amzun d netta i-yxuṣen. D ayen yeḍran d Yuba II, xas d anaẓur d asebbaɣ ifazen maca imi ulac afus yuɣal ixeddem kan taklut i yiman-is, yeggul ur tt-yezziken i mmi-s n tmeṭṭut « Ifukk wasmi sebbɣeɣ i medden a Ɛetman, ayagi d nekk iwumi t-xeddmeɣ. Ayen akk ddreɣ, d awezɣi ad as-zzikneɣ i mmi-s n tmeṭṭut, melmi mmuteɣ, ma bɣan ad zziknen ayen ara d-ǧǧeɣ d ccɣel-nsen » (Sb110). Yuɣal ynuda abrid i t-id-irefden di ṭṭjara i d-yeslal, simmal yettnerni di cci. Taẓuri sani tessawwaḍ, d aqerruy-is kan ara tettenṭal deg wakal, cwiṭ cwiṭ ara yettmettat yes-s, imi werǧin i-s-yettunefk wazal.
« Di tmura yettqadaren taẓuri, anaẓur yettidir s tẓuri-s, tessidir-it rnu tessidir iman-is ɣef ufus-is. Maca di tmurt-nneɣ, anaẓur ixeddem akken ad yessider iman-is deg wayen yexḍan taẓuri, imi yessidir taẓuri s uxeddim-is »(Sb.109). Iɛdawen n tudert ddurin yal tama, am irrebraben-nni i ineqqen wid yeɣran d wid yesɛan, ara yeglun ula s iziɣer n Yuba II amettjar ! Limer i t-teǧǧi tmurt d tmetti ad yidir d asebbaɣ, talti ur yettmettat ara, imi ilul-ed ad yili d anaẓur, maca asmi i as-tenǧer targa-nniḍen yemmut s kra n tersasin rebrab mi t-ṭṭfen ufan-t yesɛa idrimen aṭas.
Netta yenna-d : « Cwi taẓuri d nettat i ifernen imdanen » (Sb.109), nekk ad d-iniɣ : « Limer yedder, i tẓuri iwumi d-ilul, imi yedder i wayen-nniḍen, tudert ur telli d ayla-s ». Ungal-a, d ttbut n wayen yedder, yettidir unaẓur s umata deg tmurt-nneɣ : am usebbaɣ, am umedyaz…
BELLAL Tilelli
