Anwa yettnadin ɣef tlelli? D win mi yurzen ifassen d yiḍarren. D win iwumi skerfen allaɣ, kksen-as axemmem d tektiwin. Mmlan-as anagar yiwen webrid, abrid-nnsen!
D ta i d tiyersi yettnadi ad yefsi Farid Gueslem deg ungal-is Tiɣri n tlelli. S uwadem n Saεid yenǧer abrid n temsalt, d asikel n tsekla. Saεid xas deg ugni n tlufa i-d-yekker acu yegma, yennerna. Fransa i ɣer yerza, tessed-as-d aεwin n tmussni, i terra d amejjay uɣdim. Yeǧǧa tamurt n tudert, yeknunef ɣef tsarut i as-d-yeǧǧa gma-s d ccan d sser. Iḍfer-tt-id armi d tamurt n Ṣumali.
D tamurt n fad d laẓ rnu rebrab, din i yeksa. Yeǧǧa tamurt n tudert yusa ɣer tin n lmut. Yekcem ɣer Tuddsa Tagreɣlant n yImejjayen war Tilas akken ad d-yeḥyu tudert n yimejraḥ ḥuzant teldunin, ad iseḥlu imuḍan yewwet lḥif d laẓ. Ula d ul-is i tenɣa tayri n temẓi ad t-yessilez s tin n Salimatu. Imeɣri n Tiɣri n tlelli ad yeqqed tiḍfi-ines s tetrarit n tira akked yisental imaynuten.
Cceḥna i ṛebban yIzzayriyen yeddan d Fransa mi tefra tegrawla: am Lina, d yiwet gar-asen, tilemẓit i d-yekkren di Fransa. Tekreh Saεid akken tekreh meṛṛa Izzayriyen yettassen ad idiren di Fransa xas ulama ula d nettat d Tazzayrit s tlalit. Trebba aɣulif d wurif i d-tewret seg yimawlan-is imi ssεaya-nsen akk ǧǧan-tt mi ffɣen tamurt ddan ar Fransa. Imejjayen war tillas, ahat d tikkelt tamenzut i d-tella tira deg ungal ɣef asentel-a n wid yettdawin di tmura n ddunit yakkan tid yennḥafen.
Saεid, yettekki di tiddukla-ya i t-yuznen ɣer tmurt n Ṣumali. Timlilit gar umejjay aqbayli akked tlemẓit taṣumalit: Salimatu, teslul-ed tayri. Salimatu, s imeṭṭi, teḥka-yas-d i Saεid lbaḍna n lextana n tlawin. Di tugett n tmettit n Ṣumal gezzmen i teqcicin aqbib-nsen akken ad sen-kksen-t ddunit. Linda taceṭṭaḥt, tasekkṛant texdeε Saεid. Teḍmeε lekwaɣeḍ, tbeddel-it s wayeḍ. Imi ur d-teɣli yara d wargaz n tmeddit tufa-d iman-is di beṛṛa rnu ur txeddem. Teggra-d deg ukabaṛi anda tessexdam tafekka-s, ad ttidir. Tekmen seg yir abrid i tewwi armi tsuk lḥedd i wussan-is, tenɣa iman-is.
Si tama niḍen, arebrab ameḥbus: yiwen n uwadem i yettεassan ɣef yimeḥbas ṭfen yirebraben. Deg yimeḥbas mi cudden ifassen d yiḍarren yettwali iman-is, am nutni d ameḥbus. Kerfen-as allaɣ wwin-t d webrid-nnsen, netta ulac-it. Seddayen-t am lmal. Tikkelt, iserreḥ i yimeḥbas d wi yedda. Ungal yemeslay-ed daɣen ɣef wassaɣ n tuzzuft gar Saεid aqbayli d Nasimatu taṣumalit…
S cwiṭ-a deg atas yefren, ungal Tiɣri n tlelli yuklal taɣuri lqayen, d abrid n Saεid yettnadin ɣef tsarut; amer kan ad tɣerqem deg wakud…
Lyes Belaidi
