Seg yiɣil ɣer usammer d adlis n Σellawa Rabḥi. D ammud n yisfra, n 130 n yisefra i d-ssufɣen-t tezrigin Imtitad, deg 2022. Wissen acimi ameskar-nsen i ten-yerra d « izunsefra »… ?
Adlis-a, am tebḥirt ɣef tebded tiṭ taɛessast ; teggar-as targa mi ara ikeččem ukerra di taɣart ; tessassay yir imɣi yeddarayen tili n tudert taleqqaqt. D tibḥirt n yisefra… Afus i tt-ineqcen d afus i as-yessnen i tqabact ; akal ideg yeẓẓa usefru iga-as ufus-nni leɣbar amaynut. Akal, akken i t-tneqceḍ ad yefk lɣella. Zerriɛa neɣ nneqla, akken i tent-teẓẓiḍ ad mɣint. Akken ula d isefra n Σellawa Rabḥi. Yehwa-as kan isemma-asen : d izunsefra. Nutni d imɣan yessefraḥen tamuɣli n yimsebriden iteddun seg yiɣil ɣer usammer.
130 d asefru. Aɣbalu, mačči yiwen, ma d tafenda seg yijeǧǧigen n tebḥirt-nni i d-ḥudden sin n yisaffen. Sin n yisaffen, ih ! Yiwen, yeffus, ssnen-t akk yimdanen (ɣas aṭas i t-isamsen s umalus). Seg zik i d-iḥemmel. Nnumen-t yiḍarren i t-izeggren, ssnen-as asaka. Wayeḍ, zelmeḍ, drus kan i t-izeggren. D asif amaynut ; tamda-s, tesseblaɛ, azraraf-is yettruẓu tiweṭẓin tileqqaqin, asaka-s urɛad iban. Mlalen yisaffen deg wallaɣ n uqcic n Yiɣil Wis mi d-isubb ɣer Teɣzuyt. Allaɣ, yeqqel d amizab ideg ttceṛcuren yisefra ; yettemjadal deg-sen unsay n tmawit (netta yeqqar-as timmaweyt) netta tetrarit n tira…
Isefra-a, ma yeɣra-ten yiwen asefru asefru, yezmer ad yezgel ddeqs deg-sen, ɣas ccbaḥa n yal yiwen deg-sen teḍmen deg yiman-is. D tidet, yal aḍris, nezmer ad t-nɣer iman-is, ya ad as-naf lbenna, ya ad nebded am win yettnadin abrid-is gar wawalen ideg inumak ffren deffir talɣiwin n yisekkilen. Meεna, ma neɣra-ten am win yettawin yettarra gar-asen ad nfiq amek ttemsawalen yiḍrisen n wammud-a deg waygar-asen… ad nwali amek i ten-isenna bab-tsen am umeεlaq n tizwal. Tadyizt-sen deg umsami-nsen, wa d tama n wa, am warraw n yiwet tεebbuḍt ɣas udmawen-nsen mxalafen.
Banent-iyi-d 3 n temsal uklalent yiwen ad d-yemmeslay fell-asent. Timsal-a akk, ttarrant ammud-a n Σellawa Rabḥi d amxalef.
Tamezwarut d tamsalt n wassaɣ gar ugbur n yisefra d tutlayt-nsen. Agbur, yeṭṭuqqet deg-s umaynut di tedmi ; yessekcem-it umedyaz di tɣanimt n usenfali n yifṣiḥen-nni n zik-nni. Γas ad yefhem deg-s umeɣri tullza i d-teslalay temɣer, ad yaf diɣen deg-s tinubga ɣer tedfi n tallit yesgugumen dderz n tewser. Yezmer ad iban wannect-a d tamsullest deg yinumak n waṭas n yisefra n wammud-a. D tamsullest-a i asen-yefkan telqey i tmuɣli n temɣer ɣer temẓi… d tamsullest-a i yessebdaden amjadel gar tullza deg wayen ttwalint wallen d usirem yessegmayen azekka… d tamsullest-a i as-igan irebbi i temlilit n reffu d usenqed s usqecmeε…
Tamsalt tis snat teqqen ɣer tutlayt n yisefra. Isefra-a, asedyez-nsen yuɣ-d aẓar seg tutlayt tudyizt tamensayt mezzeh nezzeh. Tummast n tutlayt-a d tadyizt-nni taqburt n yifṣiḥen-nni d wat yiles-nni ileqmen awal ineǧǧren ccbaḥa tudyizt. Ur teqqim deg tlisa iḍeyqen n tmeslayt n taddart neɣ n yiwet n temnaḍt ; tedda akken ddan yimedyazen ur ngi i umawal-nsen aḥebbas. Wissen kan acuɣer i asen-isemma bab-tsen i yisefra-s d « izunsefra » ? Amzun akken netta d « azunmedyaz » !
Tamsalt tis tlata d tin n lebni n yisefra. Talɣiwin-nsen, ddant s lqis (yerna zeεma d izunsefra !!!). Anda-t wafir ur neddi d gma-s ? Antayen-sen bnan akk ɣef yiwen n lmizan mi ara yilin yifyar d at 7 n tunṭiqin. D wigi i yeṭṭuqten. Tin yernan ɣer-s, llan wanyaten ibedden ɣef lmizan i ttun wat imir-a : bu 5 n tunṭiqin d bu 4 n tunṭiqin, sefḍen deg ccfawat n tmedyazt n teqbaylit. Σellawa Rabḥi, iḥettem-d asmekti-nsen. Gar yisefra i ten-irefden, walaɣ wid i d-yeddan deg yisebtar : 27, 28, 31, 33, 35, 42, 46, 54, 63, 65, 67, 71, 82. Llan ula d isefra yebnan s talɣa n tefransist i umi qqaren « le sonnet » am yisefra n yisebtar 78 d 100.
Taneggarut, d udem gar wudmawen n talɣa n yisefra n wammud-a, d tameɣrut. S umata, tameɣrut deg yisefra n Σellawa, tḍall akkin i wallus n ṣṣda gar yimesla ineggura n yifyar. Ma tuna-tt tmezzuɣt akken iwulem, ad as-d-tban tmeɣrut deg wallus n yiwet n talɣa ibedden ɣef snat n tunṭiqin ; snat-a n tunṭiqin d azenziɣ alɣawan i umi d-yettales umedyaz, tunṭiqt-nni taneggarut d ṣṣda kan gar yifyar, d amur kan deg uzenziɣ alɣawan… Yerna zeɛma d « izunsefra » !!!
Muḥend Akli Salḥi
