Inebgawen n Sadiya n l’euro ččan Maẓ s tmuɣli. D Belqa i t-yeprizuntin i Rezqi Dezdeg akked Dda Miltant : « Wagi d ameddakul-nneɣ Maẓ si …euh…tmurt n Ṛa ». Dindin, iḍal Dda Militant ɣef Google, ad iẓer anda tella tmurt-agi n Ṛa. « Fiḥel ur tettafeḍ ara Ra di google maps » s-yenna s wecmumeḥ Maẓ. Qrib d-yeɣli upurṭabl seg ufus n Dda Militant, yeggugem amecwaṛ, yuɣal yenna :
– Ihuh, amek tezrḍ d Ra i ttnadiɣ ?
-Aṭas i zriɣ : isem-ik Sliman Ucaban, qqaren-ak Dda Militant. Ugar n 15 n yiseggasen i tesɛeddaḍ di tesdawit n Tizi-ouzou. I k-yettawin s akabar i k-yettaran ɣer wayeḍ…tuɣaleḍ almi dayen teɛyiḍ deg-sen. Dɣa terriḍ ddehn-i ɣer tdukkliwin. Teqqareḍ-as ala tidukliwin ara ɣ-yemlen abrid n tifrat. Tura, tegriḍ-ddi Tdukla « Iḍaq wul ad awen-iḥku »….Ad ak-d-rnuɣ ?.
Niqal yewhem Dda Militant di compte-rendu n Maz, yuɣal yenna i yiman-is « Ya ddin Rebb, DRS-agi de plus en plus performant »
-Ala, mačči d DRS, s-d-yenna Maz
-Icaṭ ! Aha tura, iniyi-d anwak, acu k-id-yewwin ɣer Tiɣlit Useksut, anda tella Ra ?
Ula d Rezqi Dezdeg yewhem deg Maẓ d wayen yesla. Lbacir ɛjeb-it lḥal,yettmuqul di Rezqi Dezdeg d Dda Militant yecmumuḥ di tekwat-is. Amecwaṛ akka inṭeq-d, yenna-aysen anwa-t Maẓ, la Planète seg i d-ruḥ akked tmacint n zman i d asen-d-yewwi. Ur uminen ara ayen isellen.
– Aha tura, anda akka tella caméra invisible ?, d-yeggufa Rezqi Dezdeg .
– Ulac caméra a Dda Rezqi . Ayen d-yenna Lbacir d tidet. Maẓ d lxelq i iɛacen deg planète nniḍen. D nukni i icegɛen ɣur-s, d inebgi-nneɣ, d inebgi n temcerret n udlis i ɣef ara nemeslay ticki. Zriɣ belli mačči dayen ara yamen wemdan, maɛna Maẓ d… extraterrestre.
Iɛiwed tamuɣli Dda Militant di Maz, yekunsuntri deg-s, iwala belli ɣas yesɛa lemlameḥ n wemdan, Maẓ mačč d « amdan ». Yuɣal iluɛa-t :
– Ini-yi-d a Maẓ, thedreḍ taqbaylit am uwasif n Mecrek. Ɛni at Ra d imaziɣen ? Tesɛam FLN ? D inselmen ? Tesɛam lluɣa lfusḥa ? Tettruḥu trisiti? Ttxasan waman ? Ixuṣ uyefki upuciḍ ? Tesɛm senǧaq n Falastin ? tekkatem lbira ? Ahat, rxiset ɣur-wen?….
