Annie Ernaux d taselmadt tamarut tafransist n 83 n yiseggasen, tuwi arraz Nobel n tsekla aseggas yezrin 2022.
D tigejdit n tsekla tafransist. Isem-is yufrar deg umaḍal n tira. Di teɣzi n umecwar-is aseklan n 50 yiseggasen n tira, tura azal n 20 yidlisen, ttwasuqlen ɣer 40 tutlayin di ddunit.
Seg wungal-is amezwaru Les armoires vides (Tixzanin tilmawin*) 1974, ɣer wungal La Place (Tamḍiqt*) 1984, Passion simple (Tayri taḥerfit*) 1992, Les années (Iseggasen*) 2008, Mémoire de fille (Ccfawat n teqcict*) 2016,… ɣer Le jeune homme (Ilemẓi*) 2022, Annie Ernaux tefka-d ttbut n leḥmala-s i tira d ljehd n yisekkilen-is i igezzmen am lmus.
Tira-s terfed-itt d leɛnaya, d amennuɣ ɣef tlelli n tmeṭṭut d yizerfan n yigellilen akken i tefka lɛahed i yiman-is, s wayen akk i tura tebɣa ad d-terr ttar n ccetla-s: écrire pour venger ma race! I teqqar deg wawal-is.
Tira n Annie Ernaux d tamxaleft. Ungalen-is akk s umata d aglam n wayen akk i tettwali d wayen i tettidir deg tmetti-s. Tettales-it-id akken i yella deg tilawt. D tira tusridt war iḥulfan; d ayen i yeǧǧan imusnawen n tsekla semman-as: tira tasemmaḍt (écriture froide, sans émotions).
Gay wayen tura :
-La Place, 1984
Ungal-a ilul-d s ssebba n tmettant n baba-s. Yis-s tra ad as-terr tajmilt. Deg-s tettales-d temẓi-s, tudert n baba-s d waktayen i tt-icerken yid-s s yiwen n uɣanib d afessas war iḥulfan war iwenniten.
– L’Evenement, 2000
D ungal ameddurman (auto-biographie), d ungal yettcerrigen ideg d-tules tadyant-is asmi i tebɣa ad d-tesseɣḍel tadist-is (avortement) deg yiseggasen n 1960. D ungal ideg d-tessebgen maḥyaf n tmetti mgal tilawin tilelliyin.
– Les Années, 2008
Deg wungal-a, tuwi-d amaynut i wungal ameddurman ideg tezdi iman-is akked wiyiḍ. Seg tewlafin-is (photos) n temẓi gar 1941 d 2006, tettales-d u tgellem-d tudert-is d tudert n yimdanen deg tmetti tafransist send tagrawla. Seg waktayen i tedder nettat, tettarra-ten d ayla n medden akk yeddren tallit-nni, tettales-iten-id s wudem wis krad. Seg ccfawat-is n tmeṭṭut, di teɣzi n kra n yisebtar, ttuɣalent d ccfawat n yimeɣri.
-Le jeune homme, 2022
D adlis aneggaru n Annie Ernaux. S talɣa n tullist, tettales-d taqsiṭ-is n tayri nettat d yiwen n yilemẓi i tugar s 30 yiseggasen. Nettat i yesɛan 50 n yiseggasen imir-nni, tḥulfa amzun tuɣal d tacawrart. Taqsiṭ-a n tayri tella-as d inig deg wakud n temẓi-s akken ad twali assaɣ-is ɣer tayri akked tira.
Akken i t-id-tura deg yisebtar imezwura n tullist-a:
“Zrin xemsa n yiseggasen, asmi i sɛeddaɣ yiwen yiḍ d amxalef akked yiwen n yilemẓi i yellan yettaru-yi-d aseggas aya, yerna yebɣa ad yemlil yid-i.
Am yal tikkelt, zgiɣ xeddmeɣ tuzzuft (tayri) akken ad aruɣ. Bɣiɣ ad afeɣ deg ɛeggu d nnehtat ara d-iḍefren, ssebbat iwakken ur ttrajuɣ kra seg ddunit. Ttmenniɣ ad tili taggara n uraju akk qerriḥen, mi ara yi-d-tas; imi qqdeɣ ccehwat-iw, ad yi-d-tefk ttbut dakken ulac akk ccehwa yugaren ccehwa n tira n udlis.”
Larbi Yahioun
_____
* Ungalen-a mazal ur d-ttwasuqlen ara ar tmaziɣt.
G.T : Tasuqilt tamtwalit n yizwalen
(Traduction approximative des titres).
