S anda akken tunag Tangalt, wis dɣa d acu-t wemkan-nni, temlal d Si Mḥend Umḥend. Si lbaɛd i d as-d-yedheṛ umedyaz icax akked telmeẓyin deg urti yejuǧǧeg dayen kan. Tqerreb ɣur-sen Tangalt, tesla i Si Mhend yessefruy i teḥdayin i d as-d-yezzin:
« Lǧuher d Faḍma
Rnu Dehbiya
Akken ay jebdent ṣṣef
Sut tecraḍ timmi teɣma
Lexyar n tidma
Kulci-nnsent yedda s lḥerf
Ay atma akken i d ṣṣifa
Rnant lhiba
Rant-aɣ am ẓerẓur s taɣf »
Akken kan ifuk asefru, yesferfec di lǧib-is, yeddem-d agirru, yesmar daxel-is yiwen n uɛeqqar. Akken i iruḥ ad t-yecεel, n luɛa-t.
Tangalt : Azul a Si Mḥend Umḥend !
S.M.U.H : Eeuh… mmreḥba yis-m a tukyist, a llal n webzim, a ticraḍ ddaw zenda. Qerreb-d, ad am-d-nawi asefru neɣ sin. Maɛna d acu i d azul ?
Tangalt : Nekkini d tasɣunt. Azul d taqbaylit n tura. Lmaɛna-s : alxir fell-awen.
S.M.U.H : Taqbaylit n tura ? Ɛni tbeddel tmeslayt ? ma yella tecbeḥ akken tcebḥeḍ, akken yecbeḥ yisem-m, wicqa a Tasɣunt.
Tangalt : tasɣunt d… revue s tefransist.
S.M.U.H : ur ẓwireɣ ara di tefransisit
Tangalt : tasɣunt d… taktabt yettmeslayen i widen ara yeɣren ɣef waya d uya. Dɣa, bɣiɣ ad mmeslayeɣ yid-k ɣef kra n temsal, ad aɣ-d-niḍ…
S.M.U.H : Ad d-iniɣ ? ihi ini-as :
« In(i)-as i mm tiṭ zerqaqen
Mm timi rqaqen
Lḥeǧla ḥebsen leqfus
Teǧǧiḍ-iyi deg iɛewwiqen
Mm lecfur zeynen
Mm tebbucin n lkabus
D lqahwa i bɣiɣ wissen
Ad tt-nsew akken
Deg ufenǧal s ddaw waggus »
Tangalt : Ihuh ; bezaf hard asefru-agi ! ini-yi-d, amek d ak-d-ban, tmurt d Leqbayel n wass-a ?
S.M.U.H : Ayen ara m-d-iniɣ yenna-t-id yiwen n ucennay ttɛuzuɣ mliḥ.
Tangalt : Anwa-t ?
S.M.UH : d Lunis At Mengelat. Yecrew-tt-id deg yiwen usefru anda d as-yeqqar : « ntezzi, n tenneḍ, nettuɣal ansi d-nekka »
Tangalt : I keč amek d ak-d-ban liḥala n Tmurt
S.M.U.H : akka :
« Leɛlam cudden iqelqal
I ssugten awal
I tteɛicen di llyali
Sibus yelsa-d aserwal
Yuɣal d bab n wawal
Ar iferri deg ddɛawi
Awtul yuɣal d abulis
Abeckiḍ deg idis
Ara ixeddem deg bṛusi
Lbaz cudden ifer-is
Nnfan-t deg tmurt-is
Llah, llah a Rebbi »
Tangalt : Aṭas n wawal d-yellan ɣef wasmi temlaleḍ akked Cix Miḥend Ulḥusin…
S.M.U.H : Zriɣ. Yehwa-yawen kan tesṭuqtem awal ɣef wayen ur nemɛin. Yiwen d ṭṭaleb, wayeḍ d aṭelbub. Yiwen yesserwa-t swawal n Rebbi, wayeḍ yeslaẓ-it wawal n tudert. Ur nuklal ara maḍi ayen la tettarum fell-aɣ. Γurwat ad awen-teḍru am wAɛraben, yejguglen di Cenfara akked Ɛenṭer Ibnu Ceddad. Aha mmel-iyi-d d acu d-nesnulfa ? Ulac. Yiwen yessefra ɣef tmecacin, wayeḍ yufa rbeḥ deg wawal n Rebbi. Aha ; mmel-iyi-d acu akka i d-nesnulfa yenfeɛ luma ? Ulac.
Tangalt : Ala, ur k-wafqeɣ ara.
S.M.U.H : Aha kan ad d-yas wass, ad iyi-twafqem. Si sya ar ass-nni, aɣet awal n win i d awen-d-yennan :
« lqum-nni n zik yeceḍ
Tawacḍa tseffeḍ
Muqelt ar sdat tura
Tiɣri nesla mi nteṭṭeḍ
Tezwar kul tayeḍ
ɣurwat ad as-tebrum ass-a
zik waihedder-itt i wayeḍ
ass-a d lkaɣeḍ
ad tt-id-afen ineggura »
ma ulac, tḍul tefsut-nnwen a Leqbayel.
Yesteqsa-t Tahar Ould Amar
