Ungal n Fahim Mesɛuden Izen yeffer wakal, d ungal i d-yeffɣen ɣer teẓrigin Ccix Muḥend Ulḥusin, deg wayyur n ctember 2023, d adlis wis sin ara d-yeffɣen deg useggas-a mbeɛd “Taɣuri s wuraren”. Ungal-a, d wis sin ara d-yessuffeɣ mbeɛd win yura deg useggas n 2016 s uzwel “Anza”. Acu kan, amaru-agi, ur yeqqim ara di tira n wungalen, imi yura “Tiyersi” d ammud n yisefra deg 2013, “Timsirin n ddunit” d ammud n tneqqisin d tullisin, “Izlan n tlawin”, d isefra n tlawin, “Iziran n temẓi” d ammud n tullisin d yiḍrisen i warrac imecṭaḥ akked tneffust “Izir deg yirebbi n teẓgi”.
Mi ara nuɣal ɣer tira tungalant n Fahim Mesɛuden, ad tt-naf temgarrad cwiṭ ɣef tewsir n wungalen i nuɣ tannumi neqqar-iten, imi ama deg wungal “Anza” neɣ ungal-a “Izen yeffer wakal” ad d-naf belli tira-s tungalant d tin i ikecmen di tewsit n wungal aberkan (roman noir), neɣ ungal imsulles am wakken ara t-naf di tduli n wungal-a aneggaru.
Ṣṣenf-a n wungal, yettili-d akken ad d-yini kra n tidet, akken ad yessenqed timetti, akken i as-tsemma Anisa Belhaɣin deg udlis-is “Le roman noir, le discontinu et la lecture noire”, d ṣṣenf n usenfali n uzɣan anmetti, yewwaḥsab d tasekla n tilawt neɣ tasekla n tsummelt (le genre de l’expression de la critique sociale, est considéré comme une littérature du réel, voire une littérature de la dénonciation). Daɣen yettuneḥsab d tasekla tameɣnast (littérature militante) imi tesummul (elle dénonce), meḥsub mačči d ullis amsaltu i tifin n tsestant, maca d tafada tanmettit n umaru (un engagement social de l’auteur).
Mi ara nuɣal ɣer wungal-a, ad d-naf tafada-agi tanmettit n umaru abeɛda ɣer wayen icudden ɣer Tira. Akken ad d-yessebgen aya, yewwi-d taqsiḍt yezzin ɣef Anir, ilemẓi aselmad i isellen i ṣṣut n teqcict ur ttwalin medden, ala netta i tt-yettwalin, almi i tḥesben d aderwic ama d yemma-s, taxḍibt-is Anya d yemma-s neɣ at taddart-is. Tidderwect-agi i walan medden, d tinna i t-yewwin ɣer Litteɛ n lxali, iwala-d ibaḍniyen, iwala-d Qebbaḍ lerwaḥ, i t-yessawḍen yessekfel-d tidet yeffren ɛecra n yiseggasen-aya. Meɛna, d tidet amdan yezmer ad d-iwali akk wigi? Amek i d-yewwi umaru annect-a? Acuɣer d “Izen yeffer wakal” mačči “Tafekka yeffer wakal”? Di tɣuri d yinig gar yijerriḍen n wungal-a, ad d-tban tririt.
BELLAL Tilelli
