Yeṭṭuqqet wawal tineggura-agi ɣef tɣuri n tsekla yuran s teqbaylit. Yal yiwen amek i tt-yettwali. Yal tikkelt amek i as-bedden i temsalt. Yezmer yiwen ad d-isemḥalleq i temsalt-agi s snat n tmuɣliwin.
Imawlan n tmuɣli tamezwarut, walan ulac wid/tid yeqqaren s teqbaylit ; deg-sen llan ula d wid/tid yerran taneqqiḍt-agi deg uswir n uselqeb d uɛekki. « yugar wid yettarun s teqbaylit wala wid yeqqaren », « tasekla taqbaylit d yir tibḥirt, rnan-as lexyalat », « ur yezmir ad yili umeɣri ma ur telhi tsekla », « yehwa-asen kan i wid yettarun, wama ulac wid ara sen-yeɣren », « ulac wid yeqqaren, wid-nni zeɛma i d-yeqqaren llan imeɣriyen d akellex i ttkellixen iman-nsen, yerna bɣan ad glun s wiyeḍ », atg. Tigi d kra n tefyar i d-yeskanen amek i iga ṛṛay n wid yettwalin s tmuɣli-agi tamezwarut.
Tamuɣli tis snat, imawlan-is, la d-qqaren, imi tasekla (yuran s teqbaylit) drus ayagi segmi i tebda, iban kan ur tseɛɛu ara aṭas n wid ara tt-yeqqaren. « Llan wid yeqqaren s teqbaylit meɛna drus maḍi », simmal tettnerni tira s teqbaylit, simmal ttuqquten inermasen-is (ses récepteurs) ». Snat-agi n tefyar d imedyaten ɣef wamek ttwalin tamsalt-a n tɣuri.
Deg snat n tmuɣliwin-agi, yezmer ad yefhem yiwen kra n tɣawsiwin. Tamenzut : tamsalt n tɣuri qqnen-tt ɣer umḍan n yimeɣriyen (acḥal i yeqqaren s teqbaylit ?). Yiwen yeqqar : « ulac ». Wayeḍ, yeqqar : « llan cwiṭ ». Tis snat : tamuɣli n yal yiwen, temmal-d amek i as-ibedd yal agraw i temsalt-agi n tɣuri. Yiwen n ugraw (tamuɣli-nni tamezwarut), yettban-d amzun yeḥqer ayen yuran s teqbaylit. Agraw wayeḍ (tamuɣli tis snat), yettban-d amzun yekkat ɣef tira-agi d yinermasen-ines ; seg wakken yebɣa ad ilin wid yeqqaren, yezmer ad iwali tilawt akken i tt-yebɣa netta mačči akken tella s tidet. Tis tlata : imi yal agraw i d-yeqqar d ṛṛay-is kan, ur t-isebded ara ɣef kra n unadi (d tasastent neɣ d tazrawt/enquête ou étude), ad yeqqim kan d ṛṛay n bab-is, ur issefk ad t-yerr yiwen d tidet neɣ d udem n tilawt akken tella.
Annect-a, yeskan-d addad n wannar aseklan (champ littéraire) n teqbaylit. Seg yiwet n tama d annar yettbeddilen udem : tkeččem tsekla taqbaylit cwiṭ cwiṭ di tira akken i tkeččem tira cwiṭ cwiṭ di tsekla taqbaylit. Tin yernan ɣer-s, tasekla taqbaylit, akka imir-a, a-tt-an deg tlemmast n usaka : akken tettaǧǧa ansay (ɣas deg-s yedda am tili), akken tettqerrib ɣer tetrarit (ɣas udem-is tikwal ur iban). D ayen i d-yeglan s yibeddilen deg tsuddut taseklant (l’institution littéraire). Tasuddut-agi, tettbeddil udem, ula d nettat s timmad-is, tleḥḥu ilmend n tegnatin i d-yexlef umezruy amiran (histoire contemporaine) d yibeddilen i iḍerrun di tmetti d tdamsa, azal n lqern ayagi. Si tama tis snat, ur telli tsekla taqbaylit iman-is, ama deg wadeg (l’espace) aɣelnaw ama deg wadeg n temnaḍt n tmurt n Leqbayel. Adeg-agi, ama d wa ama d wayeḍ, tecrek-it tsekla taqbaylit d tsekliwin nniḍen (tin n tefransist d tin n teɛrabt). Assaɣen yellan gar tutlayin n tsekliwin-agi d assaɣen imeqqranen, akken meqqrit i kersen ; fell-asen i beddent ddeqs n temsal, gar-asent tamsalt n tɣuri. Akken kan ad yefk yiwen imedyaten ɣef wassaɣen-agi, zemreɣ ad d-smektiɣ s tɣawalt : iqbayliyen, ttarun s waṭas n tutlayin ; mačči kan daya : kra n yimura ttarun s teqbaylit, ttarun s teɛarabt, ttarun s tefransist. Nnig n wannect-a, deg tilawt n yal ass : tasekla s teqbaylit ma d « azɣan » s tefransist (cwiṭ s teɛrabt) ; aselmed n tsekla di tesdawit, amur deg-s s tefransist i yella. Taggara n wawal, aḍris n ddurt-agi, bɣiɣ-t d tazwert i uskasi ɣef tɣuri s teqbaylit ; yis-s, sarmeɣ ad d-iniɣ amek i d-tres temsalt ar tura. D tazwert ara d-yessun i usfruri n tilawt n temsalt-agi. Deg wayen i d-iteddun, ad yili wawal ɣef tinnukrest n temsalt-agi, syin akkin ɣef tesnarrayt (méthodologie) issefken deg usezrew-ines (son étude).
Muḥend Akli Salḥi
