Yekker-as Djamal Arezki i usuqqel n « Nuit de noces » n Abdelaziz Yessad. Yuzen-aɣ-d abruy si tsuqqilt. Yebɣa-tt, nebɣa-tt, d tajmilt i Lɛaziz
« Akud yezri deg ugani n usrad d talwit ur nemlal ara. Din ara naki belli asrad d talwit d iseggasen-nni n zzhu n temzi d ugani irekden : d agani i wumi ur nfaq ara, ur aγ-icegglen ara… Aqfufi, tikwal, γur-s ssqew n layas, n uγunfu…Asrad ihi d iseggasen izrin deg ugani ines.
Qqimen-d ihi yektayen.
Tallit tamezyant, ddqiqa i yes-s ur nḥulfa, awal ssnen akk medden ; ayen akk i nedder qrib kan akka s ugacur, uγur ur ngir ara tummal, d wid-nni akk i d asrad d talwit mi ara ten-id-nmekti…
Maca werǧin nceffu : afaṛes n tallit i deg neţţidir, tin ara yuγalen d asrad n uzekka.
***
Γer uzal, terked tegnit deg taddart. Anaγur n γuct-nni, ikbel ass yerna medden azal n tsaεţ neγ snat.
Smaεil n At Yizem, akken yuγ tannumi deg unebdu-agi, ifures talwit d-yeγlin akken ad d-yali deg ubrid n tliwa iţţawin γer taddart…Tagniţ d ţin i γef izdel Buberrak, yuεer ula d asnuffes. Iṭij amzun iεeqqer deg tlemmast n yigenni. Igenni yerwan tafat alamri yeqqel d amellal. Amzun akken teẓqef tudert deg unaγur-nni, cwiṭ n unḥerrek ma yella-d ad d-iban d ţadyant.
Adrar n Uzzu d ţaddart ickenteḍen γef ubrid issawnen gar sin icerfan iseddeden. Smaεil, ur issin ara amek i as-qqaren i uẓru-nni, maca icuba-t γer lǧir, acku mazal εad deg taddart lekwanen n unres, yerna yiwen yiḍ akken mi yestufa, iddem-d amawal, mi t-imuqel yufa-d belli anres, iţţas-d deg usewwi n lǧir…Acruf-nni leggwaγ, iţbin-d kan deg kra n yimeḍqan, kan akken d ilwiḥen slewγent lǧerrat n yemdanen. Taddart tennejbad alamma d ţaqacuct n wecruf, nnig n lkaf, abrid ikemmel amzun iḥnunceḍ gar yexxamen ihruran, iffeγ akkin idreg γef tiṭ. »
Djamal Arezki
