Tasekla taqbaylit s imal tettnerni ladɣa imi d-tban tsuta-a tamaynut i d-yernan s annar n tira. Ussan-a yezrin d massa Taqurrabt Racida, d taselmadt deg tesnawit deg tɣiwant n Tmizar, di Tizi Wezzu i aɣ-d-yuwin amaynut deg tewsit n tullisin i wumi tsemma « Aẓru n Ugni ».
Aẓru n Ugni, d tadlist n 80 n yisebtar, tegber 11 n tullisin i d-yuwin ɣef yisental yemgaraden i yerzan timetti taqbaylit. Xas tuget n tullisin uɣent-d aẓar seg tillawt tanmettit, maca tiqsiḍin d yineḍruyen ttwameslen s usugen i as-yernan ljehd d ccbaḥa i tira-s.
Iẓra d yisekla zgan d inagan ɣef wayen i iḍerrun deg tudert n yimdanen d tudrin, maca ur zmiren ara ad d-siwlen neɣ ad d-alsen ayen slan d wayen i walan, daymi i tekker massa Taqurrabt akken ad aɣ-d-tales tidyanin-a n « Uẓru n Ugni », d azwel n tullist taneggarut n wammud n 11 n tullisin : Tabaẓiẓt, Salas, Targit, Tirza n yiḍ, Zlezla n tudert, Madame Leblanc deg tiɣilt, Azrem bu tcebbubt, Afḍis n taddart, Tala n waman Izewwaɣen, Aqerrif.
I wid i yettrajun ad ɣren tullisin-a, ha-tt-a tukkist seg tullist tis snat 02 «Salas» : di lxaṭer n yimeɣriyen n Tangalt.
« Seg wass-nni ideg yezger Salas ɣer Fransa ur d-yezzi, ur yelli win i t-iẓerren. Yezga yeggar aqerruy-is deg yidlisen d yimagraden n tesnujjya, neɣ deg sbiṭar yettqabal imuḍan, yettnaɣ mgal aṭṭan, mgal lmut, neɣ yettmaggar iziɣer ara d-yasen ɣer tudert d aleqqaq. Yal mi ara d-ilal ugrud, amzun d mmi-s i iqubel; yettḥadar-iten, yetteɛraḍ ad yessifses leɛtab ɣef tyemmat, ur yeggan, ur yesteɛfay alamma yekkes aɣbel ɣef tyemmat d mmi-s. Mi yewweḍ s axxam, kkawen yifadden-is seg ɛeyyu d naddam, allaɣ-is amzun yeḥbes ; ur yettxemmim, ur yettḥebbir, ur d-yeǧǧi tagnit i ccfawat neɣ acedhi.
Armi zrin sin n yiseggasen, tuḍen uletma-s, tekcem sbiṭar, ɣilen-tt akk ad temmet, sawlen-as yusa-d ; din, amzun seg umeɣrud i d-yekker, yeǧǧa kullec deg tama, yeṭṭef timesriffegt tamezwarut, yerra srid ɣer sbiṭar n Tizi-Wezzu.
Ass-nni n yennayer, asemmiḍ igezzem, aḍu yettsuḍu, yettawi yid-s kra yellan. Ɣef wudem n ssbeḥ, mi d-tuki temɣart ad teẓẓal lefjer, tesla i unazeɛ ɣer texxamt n Tlelli, Tella deg wayyur-is wis tesɛa, argaz-is ulac-it. Yuɣ lḥal tessawal, tessawal, ulac win i as-d-yeslan. Mi tekcem ɣur-s temɣart-is, tufa-tt teẓẓel deg wagens, tafekka-s tezzegzew am nnila, ifassen-is ɣef uɛebbuḍ-is, imeṭṭawen ttezririgen am yiɣzer, ur tezmir ad d-tekker. Wwin-tt ɣer sbiṭar, rran-tt srid ɣer tzeqqa n ucelleḥ. Amejjay yellan deg yiḍ-nni, ur yestehza, ur yesmeɛḍel. Akken kan iwala udem n tmeṭṭut amek yuɣal, yessawel i yimejjayen i d-yufraren deg tarwa, maca adfel yergel iberdan, gguman ad d-awḍen. Imi yeɛweq amek ara iqabel, yewwi-d ameddakkel-is, ɣas mačči din i ixeddem ; yusa-d kan ɣer uletma-s. Tameṭṭut d ugrud-is gar tudert d lmut, tettektili deg-sen. Idammen ugin ad ḥebsen tazzla, tameṭṭut ur tesɛi ifadden swayes ara d-terfed ula d ccfer. Tilezda n umeččim ɣellint-d, tessunt ɣef tmurt talaba mellulen, ters-d tsusmi ɣef leḥnaḍ, tewwi-d rrehba d tuggdi. Iberdan reglen, yal wa yeqqim anda i t-yuɣ lḥal. Lḥala n Tlelli tenṭer, ur zmiren ara ad tt-awin ɣer sbiṭar-nniḍen. Imejjayen d lqiblat zzin-as, tteɛraḍen ad ten-sellken deg sin, am tyemmat, am ugrud.
D amennuɣ mgal akud, mgal tamettant, mgal tudert n tmara s tmara. Amejjay ilemẓi yugi ad yefk afus deg tmuḍint-is, yecqarrew i tudert s tebɣest d nnmara, yecqarrew i tmettant s temẓi yeččuren d asirem. Netta d ilemẓi n 28 n yiseggasen, tamuḍint-is ur terni ara nnig 22 d aseggas, udem-is d udem n lmalaykat. Ilemẓi yesbedd kra yellan d tamusni mgal tamettant i d-yeggunin amnar. Tameṭṭut, ɣas ma ur d-tecliɛ ara deg tudert-is nettat, tefka-d akk tazmert i as-id-yeggran akken ad yidir mmi-s, tasa-s uɣur teqqen asirem-is aneggaru.
Ilul-d uqcic, yezzegzew, ur d-yujjaq, ur d-yerri nnefs, ṭṭfen-t seg yiḍarren, kkaten-t gar tuyat. Yuyes umejjay, yenna-asen dayen yemmut ! Ilemẓi-nni amzun d mmi-s i d-ilulen, yugi, isuɣ : « Aha ! Rnu-as ! Ttxil-k ! ». Yuɣal yerfed-it netta, yewwet-it i tikkelt-nniḍen amzun s zzɛaf, aqcic yujjaq-d, yuɣ deg-s yimɣi n tudert, ɣas ma rqiq, yeckunṭeḍ deg-s. Amejjay-nni i t-id-yewwin, yewhem deg-s, maca yefreḥ yis-s, akkenni i t-yessen i t-mazal, ɣas ma ibeddel tamurt, ibeddel amkan n uxeddim, yefka-d tazmert-is d tmussni-s. Akken yebɣu yili, d iziɣer n umdan i yellan gar yifassen-nsen. Zrin kraḍ n wussan, Tilelli ur d-tuki, ur yenguga ula d ccfer-is. Argaz-is ur d-iban, ur d-yesteqsa, ula d mmi-s ur d-inuda fell-as. Sin-nni n yimejjayen ilmeẓyen zgan ɣer tama-s, ɛussen timacinin i as-yeṭṭfen tarwiḥt. Yiwen seg-sen yezga daxel n tzeqqa-nni n Tlelli neɣ sdat tewwurt. Ass-nni wis kraḍ, tameddit n wass, iwala yiwen seg yimejjayen-nni ccfer n tyemmat yettmermuc cwiṭ, iɣawel isawel i yimejjayen-nniḍen, usan-d. Mi d-teldi allen-is, reṣṣant deg wudem n umejjay ilemẓi, brant-d i tregwa n yimeṭṭi am tregwa-nni yettazzalen deg tefsut mi ifessi udfel deg yidurar. S taɣect yulwan, terẓa tudert iɣedren temẓi-s, tessuter-d mmi-s, wwin-as-t-id mebla leɛḍil, sersen-as-t ɣef yidmaren-is, tessuden-it, tessuṭeḍ-it cwiṭ. Tuɣal tessuter-d tamɣart-is, Imejjayen d tefremliyin msakaden gar-asen, susmen, netta iruḥ srid yewwi-tt-id. Ur gzin tigert, imi teẓẓel ifassen-is ɣer temɣart-is, tserreḥ i yimeṭṭi s usnexfet :
− Ha-tt-an tefzimt n setti, ɛzizet fell-i, efk-as-tt mi meqqer. Ttxil-m a nnah ! Nekk ad mmteɣ, ḥader-iyi mmi, ur t-ttaǧǧa ad iḍiɛ, ur t-ttaǧǧa ad iggujel am wakken ggujleɣ, rebbi-t-id am mmi-m ! Greɣ-am Rebbi d wid akk tḥemmleḍ, ɛahed-iyi ur t-teǧǧiḍ !
Tamɣart, tɛuhed-itt, teslufuy-as i wudem-is d tuyat-is, tettekkes-as aɣbel, nettat, mi tḥulfa s yiselfan n temɣart-is, temmekti-d setti-s, tessers aqerruy-is ɣef ufus n temɣart-is, teqqen allen-is, truḥ amzun teṭṭes. Kra yellan deg tzeqqa-nni run-d, am yirgazen, am tulawin. Mi tt-seggmen deg umeṭreḥ, tenna-as-id i yiwet n tefremlit ɣer umeẓẓuɣ s ssut d amecṭuḥ : « Semmi-as Salas ». Akken kan yesla umejjay-nni ilemẓi i yisem n Salas, amzun yewwet ujenwi deg tasa-s. Yuẓ ɣur-s ad as-yemmeslay, nettat terra-d nnehta annect-ila-tt am wakken ad d-tessuffeɣ akk urfan n tudert-is, tesselqef ! Yessenser yiziɣer-nni awlawli yettnadin talwit. Yemdel-as allen i tucbiḥt n ssifa yettwaɣedren, yemdel tawwurt ɣef tayri-nni yettwaqeccmen uqbel ad teǧǧuǧeg… »
Larbi YAHIOUN
