Amek ara nsali amezruy n tsekla taqbaylit ma nettu wid d tid i t-ixedmen ? Tasekla d iḍrisen d tewsatin ; ur tettili ma ulac irgazen d tlawin ara tt-yinin, ara tt-yarun. Yal tallit s yiḍrisen-is d tewsatin-is. Akken diɣen : yal tallit s yimura-ines d tmura-ines. Amezruy aseklan d amusu n tsekla deg wakud ; ma nettu wid d tid ixeddmen tasekla ur yettili umezruy-agi.
Amek ara naru amezruy n tsekla-nneɣ ma nenker ayen xedmen yiserdasen n lɛesker d yineḍbalen n Fransa ? Amek ara t-naru ma nsader tiṭ ɣef wayen i d-jemɛen yimrabḍen irumiyen ? Ayen akk i rran deg yidlisen-nni i wumi sawalen Fichier de Documentation Berbère (i yuɣalen deg yiseggasen n 60 d Ficher Périodique) mačči d izli. Amek ara nwet fell-as nneḥ ?
Amek ara yili umezruy n tsekla-nneɣ ma ur as-nerri azal i tlawin yegren icewwiqen-nni n tmawit ɣer ṛṛadyu n teqbaylit ? Amek ara yali ma nɣunfa « rriwayat-nni » ? Amek ara t-nsali ma nerra tisgilin-nni ɣef tmucuha d yisefra, atg. d tisgilin n uqesser d unecraḥ kan neɣ n usezri n lewqat ?
Amek ara naru amezruy n tsekla-nneɣ ma nenna ɣef temsirin-nni n Lmulud At Mɛemmer d tignatin kan ideg ttemlilin yimeɣnasen ? Amek ara t-naru ma neḥseb tufɣiwin-nni n yinelmaden nitni d Lmulud At Mɛemmer ɣer tẓegwa d teftisin d tukksiwin n lxiq ?
Amek ara nsali amezruy n tsekla-nneɣ ma nenker timezgunin-nni, am tin ideg yeddem Muḥ tabalizt-is s teqbaylit, ma nenwa-tent d urar kan ɣef usayes ?
Amek ara yali umezruy n tsekla-nneɣ ma nenna-as ɣef ugraw-nni n tesdawit n Vincennes d Leqbayel ijaḥen di Lpari, d iɣriben msakit, ttekksen lxiq s yisefra d teqdimin d kra n tmezgunin ? Amek ara t-nsali ma yella tasɣunt-nni Bulletin d’Etudes Berbères, nerra-t amzun ur telli, ma yella nger tasɣunt-nni Tisuraf d yiḍrisen i d-yeddan deg-s deg yilem n tatut ? Amek ara yebded umezruy n teskla-nneɣ ma nettu idlisen-nni n Tdukla Imedyazen ?
Amek ara yebded umezruy n tsekla-nneɣ ma nettu isebtar-nni n Usqif n ṭṭmana di tesɣunt-nni Rivages i d-sufuɣen warrac n Tezmalt ? Amek ara t-nesbed ma nettu tisɣunin-nni : Iles n umaziɣ d ABC amazigh d Iles amaziɣ d Le Pays/Tamurt d Racines/Iẓuran, d Lebdo n tmurt d Uɣmis n Yimaziɣen. Amek ara t-naru ma nesfeḍ tirawin-nni n temzizzelt n warraz Lmud At Mɛemmer n Ugraw adelsan Amaziɣ ?
Amek ara yali umezruy n tsekla taqbaylit ma nettwali ayen i zelgen kan deg uselmed n tutlayt-nneɣ ? Amek ara yali ma nenna ɣef yidlisen i d-yessufeɣ Useqqamu Unnig n Timuzɣa d ilefḍan n tira ? Amek ara yali ma neqmec allen ɣef yidlisen-nni i d-yettefɣen deg wulac s wulac ? Amek ara yali ma nenker win yuran, ma nɣunfa win i d-isezrigen idlisen, ma nugad win yessezɣanen, ma… amek akken ur ngir ṣṣwab di lmizan ?
Amek ara naru amezruy n tsekla-nneɣ ma nenna ɣef yimura-nneɣ imeqqranen d iwusura, dayen yeǧǧa-ten zzman ? Ma nenna ɣef yimura imeẓyanen mazal-iten meẓẓiyit ?
Amek ara yebded umezruy n tsekla-nneɣ ?
Muḥend Akli Salḥi
