Deffir yal amennuɣ, tanekra, tagrawla…amdan ixeddem lehsab : d acu i as-d-yuwi ccɣel-nni, d lafayda neɣ d lexsara ; ad ikemmel neɣ ad yerr taqejjart.
Deg umussu id-yekkren deg useggas 2019, win umi semman « HIRAK », Leqbayel ttekkan deg-s ur cuḥen, am imenɣan akk id-yekkren  deg tmurt-a.
Ma nsuk-d tiṭ ɣef imenɣan i deg ttekkan , anida amennuɣ ɣef wakal, ad naf deffir yal amennuɣ, igellu-asen-d s lexsara ; ttafen-d akal-nsen ikemmec, yettenqas ; amdan ifeccel, yettnejli…

Deg yimenɣan anida i nnuɣen ɣef tutlayt-nsen, ɣef tmagit, ffɣen-d s lfayda, ɣas mačči d tameqqrant, maca tella lfayda.
Fiḥel ad d-nefk imedyaten seg umezruy d wayen iεeddan.
Llan imusnawen id-yemmeslayen ɣef tlufa igan am tiyi ; d imusnawen i yessnen timettiyin icban timetti-nneɣ, id-yennan belli acemma ur yettseggim ma yella yettwaɣ umdan. Amezwru d Mehdi Elmandjra id-yuwin amedya seg umezruy, yenna:

“Asmi i bɣan “Icinwaten” ad εicen deg talwit, bnan “Ssur n Ccin Ameqqran”. Imarren, ɣilen yiwen ur izemmer ad t-yali seg laεli i εlay.
Deg mya iseggasen segmi bnan ssur-nni, ẓedmen, kecmen ɣer tmurt n Ccin tlata iberdan mebla ma ulin ssuṛ neɣ ssdermen-t!…Amek xedmen? Ttxelliṣen aεessas n tebburt, keccmen seg tebburt! Icinwaten xemmemen i lebni n ssuṛ, ur xemmemen ara i lebni n umdan. Lebni n umdan yezwar lebni n kra yellan.”

Said Nachid seg tama-s, yesban-d amek lexsra iss id-gellunt tegrawliwin, meqqert nnig lfeyda id-ttawint. Yenna:

“  Widak ɣef yeṭra lbaṭṭel, wissen ma d tigrawliwin i yuḥwajen i mi dunnit i tt-iḥekkmen: d imcumen, d imesbaṭliyen, d cwaṭen(akken qqaren kra medden). Tuget tegrawliwin deg umezruy n umaḍal, sseɣlint lbaṭṭel, ssulint-d lbaṭṭel nnig win i sseɣlint akken. Tamsirt deg wakka, d ta: ma yella ur yessaweṭ ara umdan ad yeṭṭef deg yiman-is sdat lebɣi-s, ayen akk ara yexdem mara yefqeε, d amesbaṭli-nni yeffren, yegnen deg lbir n wallaɣ-is ara d-yekkren. Axaṭer tilleli ur telli d tuttra i tettwattar, am ugellil umi ttlaḥaqent tkemsin ; ur telli d azref yettwakkas-d. Tilelli, d aɣrab yettwabnay s kra kra ;  ibeddu s lebni yiman.
Amek i yezmer Epicteteus(afiluẓuf-akli) ad d-yekkes tilelli-ines gar ifassen usewwaṭ win umi yeqqur uqerruy? Ur iṛuja ara i Ṛebbi ad iger lqedra-s ; ur iṛuja ara i urgaz iḥeqqi, win ara iḥekkmen s lḥeqq ; ur iṛuja ara i tegrawliwin n waklan…ukan iṛuja waya , tilaq yeqqim yettṛaju tallit n tafatin, ad yayes u ad yemmet d ameɣbun.
Ih, ur iṛuja i kra. Ibna-d iman-is , yessedda iman-is s yiman-is ; yerra amesbaṭli-nni asewwaṭ ad yeεyu deg lbaṭṭel-is, yessefcel-it alami i t-yerra lḥal ad as-isserreḥ.

Mačči ma yella yiwen weḥd-s, maεna-s ur izemmer ara ad iqabel ayen yeqwan fell-as ; mačči ma yiwen weḥd-s, maεna-s yuḥwaj lɣaci…Maca, ayen iεeddan fell-aɣ yesbanay-d belli yella rrbeḥ yettawi-t-id “yiwen”, ma yella ur t-sseɣlin ara “lɣaci.
Amen s yiman-ik, amen yiwen ur yelli nnig-k. Yiwen ur issebbeṛ i wakken.
Amen s yiman-ik, ad as-inin akk: WA D ILELLI.”

I nekni amek?…
Akken kan i as-yenna Sayyed Al Qimni: “Bɣiɣ ad iniɣ awal qerriḥen i medden mebla ma jerḥeɣ-ten, mebla ma ssfeqεeɣ-ten…xemmemeɣ xemmemeɣ, ufiɣ-d yiwen wawal kan: Eɣret!

 

 

Post Views: 83