Ussan-a yezrin, ɣriɣ yiwen n uwennit deg FB yessewhem-iyi ! Amzun akken d ababat i la yettnadin amek ara d-yerr ɣef yisteqsiyen n yelli-s tamecṭuḥt yerzan kra n temsal n tutlayt tafransit ; dɣa mmektaɣ-d tamaziɣt, tajerrumt-is, amawal-is akked yilugann tira-s… Isteqsiyen n teqcict d ṣṣwab, ma d tiririt ur aɣ-tt-id-yenni ara ubabat.
* * *Attan ihi temsalt i wid iẓewren deg tutlayt-a icebḥen yellan d asalel, d allal agraɣlan i tsekla, i tussna, i tmussni akked taywalt :
Comment expliquer à ma fille pourquoi « la foi », qui est féminin, ne prend pas de (E), « le foie », qui est masculin, lui, prend un (E), « une fois », qui est au singulier, prend un (S) ?
Dɣa tberreq deg wallaɣ-iw ! Nniɣ-as lemmer ad nadiɣ, ad afeɣ ugar n waya axaṭer d Ifransiyen s timmad-nsen i la d-yesrusun timsal-a n tjerrumt n tutlayt-nsen deg Internet. Mi nudaɣ ufiɣ. D tukkist seg yiwen n usaru awezzlan n uhanay n taḍsa akked nnecraḥa ideg d-fkan sin n yiwudam-nni yellan ɣef usayes kra n tamawin yerzan tutlayt-nsen tafransit, nnan :
Nettaru « credit » s (T) deg taggara-s iwakken ad d-nessuddem amyag « crediter » ; « édit » i « éditer » ; « bruit » i « bruiter ». MACA « abri » war (T) deg taggara-s, amyag-is d « abriter » !
Ḍsan yimeshanayen, llan ula d widen i asen-yewwten afus… aslilew ur as-sliɣ ara !
Yendeh wis sin yenna daɣen :
Nettaru « dix » s (X) deg taggara-s, maca deg ususru (X) yettuɣal d (S) : « dis ». (X)-nni yettuɣal d (Z) deg « dizaine », akken i yettwaru i yettwanṭaq. Ma deg « dixième », (X) yeṭṭef amkan-is anaṣli, ma d asusru-s d (Z) !
I tikkelt-iḍen, ḍsan yimeshanayen… yerna seg wul.
Tidet kan, cmumḥeɣ ula d nekk, nniɣ ahat ad ilin yilugan i wayen yecban aya deg tutlayt tafransit, d nekk kan ideg yella uɣbel, ur ten-ssineɣ ara. Neɣ ahat ulac ilugan i waya, imawlan n tutlayt-a akka i ten-uran, akka i ten-bɣan, akka i ten-ḥettmen i « wiyaḍ », ma yella win ur teɛǧib ara liḥala-ya n tefransit, ad yewwet aqerru-s ɣer lḥiḍ ! D tutlayt-nsen, akken i asen-yehwa ad as-xedmen ! Ahat yella waya deg tutlayin n ddunit merra, ula d tagi-nneɣ tettalas, ɣas ma idelsan mgaraden.
Dɣa steqsaɣ iman-iw, ulamma d isteqsiyen yerzan ddeqs n yimeddukkal : ma neqbel « timeckukal-a » deg tefransit, acuɣer ur tent-nqebbel ara deg tmaziɣt ?! Ma neqbel « asnulfu » deg tefransit, acuɣer ur t-nqebbel ara deg tmaziɣt ?! D tutlayt am tiyaḍ, akken tteddunt ara teddu ula d nettat : deg tesdawit ara yefken imussnawen i tkadimit, deg « laboratoire » neɣ ahat deg tmetti ! Dɣa wissen amek ara d-nini « laboratoire » s teqbaylit timserreḥt neɣ s teqbaylit taqurant… neɣ s tleqqaqt ?
Tugget n wawalen-nni i yellan deg « Amawal » n Dda Lmulud akked yimeddukkal-is, deg « laboratoire-nsen » i d-lulen, ulac-iten deg teqbaylit, la timserreḥt la taqurant la taleqqaqt, d asnulfu, d asuddem, d ireṭṭalen neɣ seg tantaliwin-iḍen i d-kkan. Nudaɣ ɣef kra n wawalen ɣileɣ sqedcen-ten yiserdasen akked yipapasen n Fransa yecban Dallet, G. Huyghe, J. Delheure, A. Hanoteau, A. Mouliéras, B. Bensdira, A. Boulifa, A. Picard… ulac !
Ur cukkeɣ ara ad yili Victor Hugo, De Lamartine neɣ Balzac ssnen awalen-a n « protons » akked « neutrons »… ur llin deg tallit-nni-nsen axaṭer ur ɛad i ten-ufin yimnuda yellan deg wannar-a n tussna lawan-nni ; ihi ulac-iten deg tefransit ! D ismawen i d-yekkan seg « laboratoire » ideg ttnadin yimussnawen, mi ten-ufan, fkan-asen ismawen i la nessemras ass-a. D awalen imaynuten am « abelkam » i « atome » deg Umawal-nneɣ.
Tikkwal nettɛanad widen ur aɣ-nwulem. Tikkwal neṭṭafar ayen ur aɣ-nwulem. Tikkwal nesnulfuy-d ayen ur aɣ-nwulem. « Uraw » n wawalen neggumma ad asen-d-nernu wiyaḍ, widen iss ara nqabel taɣulin n lawan-a ; atrar d umaynut. Awalen iqburen sɛan tilisa ɣas s usuddem d usuddes, ma ur d-nnulfan yimaynuten ur tettnerni ara tutlayt-nni : ur ilaq ara ad sɛunt rebɛa tɣawsiwin yiwen n yisem : aẓar = racine / veine / artère / vaiseau.
Am wakken i nnumeɣ, ad d-iniɣ ihi aya d tikti kan !
Surfem kan ma myekcament tutlayin ta di ta, tikkelt-a ggten wawalen n tefransit axaṭer d tutlayt-a s timmad-is i d asentel n uḍris-a.
Ramdane Abdenbi
Amaru
