Murad Iḥeddaden, neɣ Murad At Ɛmer U Belɛid, mmi-s n taddart n Tqerbust. Yekker-d d agujil, d win ḥemmlen akk medden; ama d tawacult-is neɣ d arraw n taddart-is. Deg wass yecban ass n 17/05/1994, d imensi n lɛid tameqqrant, di Zberber, i yettwaɣḍer s yifassen n yiɛdawen n tudert ineqqen.
Aṭas i t-iɛawnen akken ad d-yeffeɣ d acennay, abeɛda asmi yeqqar ɣer uselmad-is Seɛdi Yusef i ten-yessebɣasen imi ula d netta d anaẓur. Seg wakken iḥemmel ccna ikemmel abrid-a, anda yemlal d unaẓur Ḥarkat Welɛid. D netta i as-yefkan tagnit akken ad yili deg terbeɛt n Yimnayen n Uɣbalu imi yesla i ssut-is. Dɣa seg wasmi yekcem ɣer terbeɛt-agi, i tuɣal tettban-d rnu tettwassen, yerna tetteɛǧab wid ad as-yeslen. Yuɣal yettɛawan-iten ula di tektiwin almi uɣalen xeddmen timeɣriwin meqqren. Dinna dɣa i walan belli zemren ad xedmen kra, dɣa yella ɣer tama n Welɛid ula d Brahimi Maǧid, d nutni meḥsub i as-yettarun isefra.
Sin n wagguren uqbel ad iruḥ ɣer lɛesker, yessekles tizlatin-is. Gar tezlatin i yecna « Numidya », « Tamurt », « Ttɛiciɣ s lexyal-im », « Sebreɣ dayen sebreɣ », « Amezruy » « Yemma » am wakken i llant tid ur d-yessuffeɣ ara akka am « Bɣiɣ ad d-iniɣ yemma »imi teccelqef-it lmut akken meẓẓi.
Yecna tugdut, yecna leḥmala n tmurt, yecna tagmat, yecna tayri, yecna ɣef tyemmat d wayen iceɣben amdan di tallit-nni. Wigi, d kra n yimeslayen i yura Belɛid Tamsawt, d tajmilt i as-yerra yes-sen:
“Ass amenzu i tkecmeḍ ɣer lkazirna, fkan-ak-d tamekḥelt nnan-ak: d tagi i d kečč, d tagi i d tudert-ik, d ta i d nnif-ik, d ta i d tameṭṭut-ik, d ta i d allal s-wayes ad trefdeḍ isseɣ n tmurt-ik. Ma d kečč, tettmuquleḍ-ten kan ɣer wallen, allen nsen yettawin anza n lmut, wamma allen-ik ssawalent kan i tayri d tudert.
Mi teṭṭfeḍ tamekḥelt gar yifassen-ik i tikkelt tamezwarut, temmektaḍ-d agambar-nni yezgan yedda yid-k am tili-k, win akken teskikideḍ s iḍuḍan-ik, win akken i d-yessenfalayen iḥulfan-ik, iḥulfan n win yettrun isaffen ɣef yemma-s yemmuten d taleqqat, iḥulfan n win akken icennun tuɣac n tayri, i tin iḥemmel, ur yufi abrid ɣur-s, iḥulfan n win akken yessaramen iger-is ad yif akk igran n medden, ad iwali tamurt-is tufrar-d gar leǧnas, iḥulfan n win akken yeddan di lǧeṛṛa n wid i d-yessekfalen aẓar n tmagit-nsen.
Mi mazal kra n wakud ad truḥeḍ ɣer lɛeṣker, tkecmeḍ ɣer ustudyu, teskelseḍ yiwet n tkasiṭ, takasiṭ-ik tamenzut-taneggarut, tefɣeḍ-d deg usudyu teddiḍ di tmacint truḥeḍ ɣer lkazirna, zun akken tḥulfad ad d- tuɣaleḍ deg usenduq, dɣa tezwareḍ deg usekles.
Tecniḍ ɣef tayri, tenniḍ i Nina tḥemmleḍ :
Ttɛiciɣ deg lexyal-im,
Kemmini tbeɛdeḍ fell-i
Deg wawal-iw yezga yisem-im
Ma ttuɣ ad iyi-d-yesmekti
Ḥemmleɣ ad sleɣ i ṣṣut-im
Yak dayen tmelkeḍ-iyi
Cedhaɣ ad waliɣ udem-im
A Nina teǧǧiḍ-iyi
Tecniḍ ɣef tyemmatt tenniḍ-as:
Yemma fell-am nettnadi
Mačči ass-a, acḥal n zman
Nettnadi anda ad kem-nwali
Qqaren-d truḥ di lemnam
Aha kan ay aqbayli, tnadiḍ ɣef iẓuran
Tecniḍ ɣef tmurt tenniḍ:
Anda akka tettedu tmurt
Nettwali leǧnas ulin
Ɣur-sen teǧǧuǧǧeg tefsut
Nekkni mazal-aɣ kan din
Tecniḍ ɣef tmagit, tewwiḍ-d tizlit ad yidiren i lebda, Numidya, tenniḍ di kra yefyar:
Tafriqt n Yifriqen
Yenna Masinisa
Tafriqt n Yifriqen
Yenna mmi-s n Gaya
Nekkni d imaziɣen
Ur nqebbel icenga
Numidya, Numidya
Tamurt n umaziɣ
Numidya, Numidya
Fell-am ad ɣenniɣ
Tecniḍ ɣef tlelliyin, tewwiḍ-d anza n Massinisa, Dihya d Faḍma. Tecniḍ i warrac, tasuta uzekka, tecniḍ i yimeqranen, tessakiḍ wid tewwi tnafa. Ur mmiden ara sin waguren i d-mazal i wakken ad terreḍ tamekḥelt-nsen, ad tezziḍ ɣer tudert-ik n unaẓur, wwin-k kečč d yemdukal-ik ɣer idurar n zberber, tkecmem tiẓegwa, tekkam-d isaffen, tulim ibubdar, tcuqqem icudax, aḍar-ik yedda d yimeddukal-ik, ma d allaɣ-ik iḥetteb, ass s wass, akud ik-d-yeqqimen akken ad truḥeḍ s axxam ad tesɛeddiḍ lɛid d twacult-ik… Nɣan-k yiɛdawen n tudert, zwaren deg-k, kečč yellan d asirem n tsuta s lekmal, imdukal-ik ddan deg ubrid id-tneǧrem jmiɛ, aṭas n yilmeẓyen n taddart-ik i yeqqlen ass-a d icennayen, s Numidya i d-sneṭqen i tikkelt tamezwarut agiṭar.
Deg wayen akk teddreḍ, ala 21 n tikkelt i d-tezzi lqaɛa i yiṭij, 21 n tefsuyin i twalaḍ, taneggarut tegla yes-k. ɣeḍmen-k d aleqqaq drus maḍi i teddreḍ, maca ad tidireḍ i lebda deg wulawen n wid yefkan azal i tmagit-nsen.
Suref-iyi, ur zmireɣ ara ad mmeslayeɣ ugar ɣef tmenɣiwt-ik, lmut qerriḥt, smenyifeɣ ad ruɣ ɣef lmut-ik, wala ad aruɣ fell-as”.
Tilelli BELLAL
