Abedlhamid Benzine ilul ass n 27 ibrir aseggas 1926 deg taddart “Aqerruy-n- Wakli”, taɣiwant n It Wartiran. Yeɣra leqraya tamezwarut deg Bougaεa d Bgayet, leqraya talemmast deg Sṭif.
Jeddi-s d Lqayed, yettekka ɣer Fransa, yuɣ tabḥirt ɣef yiwen ukulun deg Lḥemmam Ugergur. Baba-s, d Lxuǧa. Yexdem deg Bgayet. Imukan i ṭṭfen imawlan-is yerra abrid ɣer uɣerbaz ur yuεir ara. Yekcem ad iɣer, deg uɣerbaz amezwaru, aseggas 1932 deg Lḥemmam Ugergur. Ikemmel leqraya deg Bgayet, yeqqim ɣer εemmi-s i illan d Lqayed ula d netta. Deg useggas 1938, yuwi-d agerdas “Certificat d’étude”, ceyyεen-t ad iɣer deg uɣerbas alemmas “Albertini” deg Sṭif.
Urεad izemm 14 iseggasen, yekcem ɣer wannar asertan, yella d ameɣnas deg upaṛti n uɣref azzayri (PPA)s wudem uffir, i mi akabar-a teḥbes-it Fransa deg useggas 1939.
Deg useggas 1945, yesεedda aseggas n lḥebs mi yettwaṭṭef deg tmesbaniyin n 08 mayu . Ṭṭfen-t sdaxel uɣerbaz alemmas Alberteni deg Sṭif. Deg lḥebs id-yessen Kateb Yacine i yeqqlen d ameddakel-is deg uǧernan “Alger républicain”.
Iruḥ ɣer Fransa deg useggas 1950, yuwi-t uɣrum, yexdem deg lebni. D netta i yellan yettmeslay s yisem n yixeddamen iɣriben deg sandika “CGT”.
Yeqqel-d ɣer Lezzayer aseggas 1952. Yeṭṭaxer seg PPA-MTLD, yextar tiẓelmeṭt, yekcem ɣer PCA (Parti Communiste Algerien). Yeṭfer rray n Agré Ruiz, amaray amatu n “CGT” deg Lezzayer, yeqqel aneɣmas deg uɣmis Alger républicain i yellan d anemhal-is Henri Alleg.
Fransa teḥbes aǧernan Alger républicain deg useggas 1956, Benzine, deffir umeslay deg unejmuε id-yellan gar-as d: Abane, Benkhedda, Hedjres…yuli adrar, yexdem lgerra deg tama n Tlemsan. Yettwajreḥ deg yiwen imenɣi, yettwaṭṭef ass 14.11.1956. Curεen-t aseggas 1957, ḥekmen fell-as 20 iseggasen.
Deffir lgerra n 54, amennuɣ ikemmel-t s tɣamsa deg uɣmis Alger-républicain. Mi id-yessuli iman-is Boumediène ɣer leḥkem aseggas 1956, yeḥbes asufeɣ n uǧernan.
Aseggas 1966, netta d yimeddukal-is, snulfan-d akabar PAGS i iqedcen s tuffra.
Yuweṭ-d 05.10.1988. Tella-d tnekra. Xemsa tuber d asawen ldint-d tebbura i yikabaren d yiɣmisen ad qedcen. Benzine d yimeddukal-is izelmaṭen rran-d akabar PAGS d uɣmis Alger républicain ad qedcen s ubrid n lqanun. D netta i sbedden d anemhal n uɣmis seg useggas 1989 alami d aseggas 1994.
Seg 1994 d asawen, Benzine sseɣlin-t aṭṭan d temɣer. Ikemmel amennuɣ s tira, alami d asmi yemmut ass 06 meɣres 2003.
Idlisen yura Abdelhamid Benzine:
- Le camp.1962
- Journal de marche. 1965
- La grande aventure d’ “Alger-républicain”. 1987
- Lambèse. 1989
- La montagne et la plaine. 1990
- 08 mai 45, le génocide. 2002
- Le sérgent. 2002
- De notre histoire au quotidien : Alger républicain 1989-1994. 2006
