Acimi assaɣ-nneɣ d wakud yezzi kan ɣer yizri ?
Acimi nezga neqqar : »ya ḥeṣra ɣef zik-nni » ?
Acimi nezga nesḥissif ɣef wussan yezrin, amzun akken ussan imiranen d imessasen ?
Acimi i nerra tamagit-nneɣ deg yizri kan, amzun akken ur nettemṣada nekkni d yimal ?
Acimi ntettru ɣef yiḍelli ?
Acimi ntettu ass-a ?
Acimi nettaggad azekka ?
Acimi igli n llhu, nsemma-t kan deg wayen iεeddan ?
Acimi neqqar kan : « nekkni zik-nni… » ? Ɛni ur as-yezmir ara wass-a neɣ uzekka i « nekkni-agi » ? Neɣ εad d « Nekkni-agi » ur nezmir i wass-a d uzekka ?
Steqsi iman-ik/im kan…
Acimi tizlatin-nneɣ ččurent d :
« Iɣurr-aɣ zzman… »
« Ibeddel zzman… »
« Yexser zzman… »
« La smaḥ i zzman la smaḥ… »
« A wi k-id-yerran a zzman… »
Acimi isefra-nneɣ, yezdeɣ deg-s :
« Zzman n tura yefḍeḥ… »
« W’ara k-id-yerren a zzman… »
« Asmi nella… »
« Zik-nni… »
Win ara aɣ-d-yeslen, ad as-yini : « wigi, weḥlen deg zik. Zik, d adif-nsen ». Neɣ ad as-yini : « ziɣ wigi, deg zik kan i zedɣen ; tansa-nsen d amezruy, imir-a d yimal ur ssinen abrid ɣur-s !!! »
Steqsi iman-ik/im san…
Annect-a akk i neḥsel deg yizri ?
Nettwaɣ ur neẓri !
Annect-a akk ur d-necliε deg tudert-nneɣ n wass-a ?
Nettu nella !
Annect-a akk i nuggad akud i d-iteddun ?
Nuggad azekka !
Aha san, steqsi iman-ik/im…
Muḥend Akli Salḥi
