Tamagit, tilelli, uγent aẓar deg wul n tidmi. Ad nessawel tamagit tilelli ; ad asent-nlaεi ma dγa stafent ad d-rzunt γur-neγ. Yes-sent kan i nettaf iman-nneγ, i nettissin lehmum-nneγ, i nettemyagar d yisteqsiyen-nneγ. Wissen ahat, akken kan i ddukulent: Tamagit n tlelli d tlelli n tmagit. Yal wa amek ikerrez iteẓẓu, imegger isserwat…yal anamek s wawal-is. Tamagit d tlelli, d timiḍranin lqayen; γezzifit wawalen n yinumak-sent akken i hrawit yinumak n wawalen-nsent. Γef waya dγa i d-gren ameslay d awal amezgunan, Tukyist d Sirem, yemyussanen nezzeh deg tmedwin-a n usteqsi.
Tukyist: Azul azul…anda akka i tesdurrqeḍ iman-ik a Sirem?
Sirem: Ur tufiḍ s anda rriγ a tumert; aql-in da kan deffir taddart a Tukyist!
Tukyist: Wah tella taddart d wayen illan deffir-is?
Sirem: Akin ah! Γer lexlawi-nni-nneγ i γ-yeğğan mi tent-neğğa.
Tukyist: Yella waya…maca i wexxam-nni!
Sirem: Axxam d axxam-nneγ; akin deffir nnig n taddart, d axxam-nneγ.
Tukyist: Ihi, akin deffir nnig… n wexxam, n taddart, d tamagit!?
Sirem: Kemm d tamcumt tukyist a Tukyist! Teγγazeḍ ddaw n tγuzi.
Tukyist: Ƹni tamagit tessawal i tγuzi iwakken ad tt-nissin?
Sirem: Tal ta, Yal wa, qqaren: Wi γ-ilan, d acu-yaγ, wansa-yaγ? Meqqret γezzifet tmiḍrant-a n tmagit a Tukyist!
Tukyist: Mi ara k-iniγ nekk d taqbaylit, d tamaziγt, d tameṭṭut talsant, d yelli-s n baba-s d yemma-s yefkan tayet i yiẓawiliyen; tella tmagit nnig ta?
Sirem: Nniγ-am, kemm d taṛuḥanit! Tamagit-im d tilelli.
Tukyist: Ahat d tilelli-inu i yi-yerran d tilellit akken ad issineγ tamagit-iw!
Sirem: Anta tilelli a Tukyist? Ma teffeγ-aγ tlelli taḥeqqanit, ur cukkeγ ad ttaf tmagit-inem tilelli n tlelli-s.
Tukyist: Ur d aγbel waya ay itbir, a Sirem! Ma neddem newwi yezdeγ lebγi gar-aneγ, ulac tilelli d tmagit nnig waya. Iwumi dderz uxemmem?
Sirem: Ula ara m-iniγ. Din tura i teqqim; ddrewzen akk yixemmimen-a-nneγ, nesnuzgum kan γef wayen yezrin i d-iteddun: Tamagit war tilelli ur d tamagit; tilelli ur d tilelli war tamagit-is.
Tukyist: Win ur nesεi tilelli, ad as-d-ağwen tamagit nniḍen. Gziγ ayen akka i d-teqqared! D ayen nettidir deg tiram-a tigugamin tiderγalin. Tixer-aγ tura i tmidṛanin-a a Sirem, d nnayer ah! Ulac tilelli da , d tamagit kan!
Sirem: Nniγ-am kemm d tamnayt n tlelli!
Tukyist: D tamnayt n nnayer-a-nneγ. Aql-aγ di 2975, zuğ alaf u tesεemya…amek akkenni i t-nessawal s tmaziγt a Sirem?
Sirem: Ad am-d-iniγ tidet, ttuγ maca cfiγ akka ciṭṭuḥ. 2975: Sin igiman tẓa n twinas ṣa n tmerwin d semmus. Ad asent-nṛuḥ kan s ttawil i tmagit d tlelli ara yessemlil wawal alsan ussnan…ayen nniḍen d tagmat d timdukkelt.
Tukyist: Tamagit tezdi-yaγ, tilelli mačči yiwet. Mi d-dḥiγ dγa d tameṭṭut di tmetti-ya ur nessin; anda ara d-afeγ azref-iw? Anda ara d-afeγ abeḥri-w, tilelli-w? D annect-a i d iyi-iceγben ugar a Sirem!
Sirem: Ula ara m-d-iniγ a tiṭ yuγen ulawen d allaγen!
Tukyist: Ad asent-kseγ tilas i tillas. Tasentel-a d asentel wayeḍ…aredqal ad as-nkemmel a lbaz!
Sirem: D ayen iwatan a tamilla! Ar tufat a tucbiḥt.
Tamiḍṛant, timiḍṛanin: Concept (s)
Amezgun : Théâtre; amezgunan: Théâtral
Aseklan : Littéraire
Tamagit: Identité
Tasentelt: Thématique; asentel : Thème
Moh Laid Deflaoui
