Acḥal aya ur d-rziɣ s Amkan-a n wis d acu-t. Mačči d lebɣi-w. Ur yeksan ḥedd i t-wuɣen. Mačči d yiwet neɣ d snat i yeḍran seg asmi i baɣ seg umkan-a n wis d acu-t. Ddurt-a rziɣ-d ɣur-s. Ulac i ibeddlen deg-s. Imezdaɣ-is zgan cerhen, cmumḥen. Talwit tɛum. Ṭṭfeɣ abrid-nni kan i yuɣeɣ tannumi taɣeɣ. Lḥiɣ acemma sliɣ i yiwwet n taɣect, ulac win ur tt-nessin ara di tmurt : « Eǧǧet-aɣ abrid ad nɛeddi… »
Qerbeɣ. Ɛeqleɣ Zahir Adjou, Termoul Ali akked Ali Ideflawen. Neṭqeɣ ɣur-sen
Tangalt : Azul fell-awen les anciens!
Ali Ideflawen : (Yemmuqel-iyi-d, yecmumeḥ) Ihuh, d kem aya, d Tangalt ! Alih, qerreb-d a tumɛint, tiniḍ-aɣ-d amek llan les Ǧerǧerois.
Tangalt : (qerbeɣ, ɛeqleɣ Zahir Adjou) Azul a Zahir !
Zahir Adjou : (yecmumeḥ, inṭeq-d am télégrramme) Azul, labas ?
Ali Termoul : Asuf yis-m a yelli. Zahir-nneɣ ur yestuqqut ara awal, ladɣa mara yeṭṭef tagiṭart
Tangalt : Azul a dda Ali. Amek akka telliḍ.
Ali Termoul : Qrib akken yebɣu wul.
Tangalt : Acimi qrib ?
Ali Termoul : Acku nejjem tamurt. Maca nefreḥ imi nemlal akked Ali-nneɣ, xas ulamma ẓriɣ belli di Tmurt yeǧǧa-awen-d leḥzen.
Ali Ideflawen : Ula d nekk akka .
Tangalt : Amek ?
Ali Ideflawen : Si tama, ferḥeɣ s les anciens akked talwit d-ufiɣ da, deg umkan-a n wis d acu-t. Si tama nniḍen, tejreḥ acemma tasa ɣef watma akked widen ḥemleɣ n-ǧǧiɣ di Tmurt.
Tangalt : A tezreḍ i tejreḥ tasa-nnsen nutni !
Ali Ideflawen : Ẓriɣ. Yewweḍ-iyi-d lhiwaḍ n ljerḥ-nni-nnsen. Mais akka i d ddunit, « yal ass, s Rebbi-s ».
Tangalt : Akka, yak d keč i d as-yeqqaren « lmut rẓget am lili… »
Ali Ideflawen : Ḥbes kan din, ur s-ttkemmil ara !
Tangalt : Acimi ?
Ali Ideflawen :Tamezwarut, rẓaget, ussan-nni imezwura n lfiraq. Tis-snat ur d-teǧǧa ara ilem deffir-s.
Tangalt : Waqila fehmeɣ acu tebɣiḍ ad d-tiniḍ. D lawan ad ruḥeɣ ma yella kra tebɣam ad t-siwḍeɣ i wat tmurt.
I meṛṛa :Siweḍ-assen slam.
Ali Ideflawen : Arǧu kan !
Tangalt : Anɛem !
Ali Ideflawen : Ini-as i Leḥsen : n ḥemmel-ik. Ini-as i Muḥ at Burenna, gma ur d-turiw yemma : sfeḍ imettawen-ik a l’ancien. Am ass-a, ad as-nemlil, ad as-d-nestaf i Muḥend amarcheur.
« Yesteqsa-ten » Tahar Ould Amar
