Ma nenna: d awalen i d amawal; ahat, ula d yal amawal d awal ma yettwaqqen ɣer yiles n yidles. Ula ara s-nernu i tmagit n umezruy mi s-nerra timedlin i tlelli-ines. Mačči d ixf n targit i d targit mi nessaɣzef iḍes-nneɣ. Aṭas i d-nelḥa s tmawit (oralité) almi d-nufa iman-nneɣ deg temsislit (phonétique) war ma nerra-yas azal i tesnaslit (phonologie). Ccwi kan jebbun-d ɣur-neɣ yigenwan n tira-nneɣ; simmal nesnulfay-iten-id, simmal ssidiren-aɣ. Awi-d kan nettemyagar nettmeslay s tutlayt-nneɣ! A tumert-nneɣ, nerra-yas-d asirem i usirem…
Serreḥ-as i tlelli ad tcali
Terra-yaɣ tili;
Skud yeqqim-d usekkud…
ꓩas teğğa-yaɣ temẓi n tayri, nettleqqim-itt d afud i temɣer-is. Ur yettili wadeg war akud-is, neɣ s tinna-nneɣ; ur yettili wemkan mebla lweqt-is. Mačči d ayen ur nessin i d yir tamussni, neɣ d ayen nessen i tussna. D awezɣi ad asent-neg tilisa i tektiwin: ay ul yessnen allaɣ i teddem tfekka-nwen!
Temɣer tessakay temẓi
Ilem ur d awezɣi
Issin ay uzzal uffal…
Zegreɣ tirga n tnnumi
Tezḥel tsusmi
Ay awal ay amawal
Ula d illel n tẓuri,
D iriz n tṛuẓi;
Anda-k ay ass amellal?
Tikkwal d inɣi-w i d imi
Neɣ d iles i d inɣi
Sif awal ay aɣerbal!
Ay asdukkel n tudkkli
Ay ifer n tili:
Tilelli-nwen tessawal
Anda-k a yiswi n tiɣri?
Teṭṭef-aɣ tziri;
Af asiwel-ik ay awal
Steqsaɣ tirɣi n tikti
Ufiɣ-tt d tigzi
Ur yessewham uḥemmal
Axemmem, nuɣ-it d tikli
Neɣ d tamuɣli
Zger akkin i wegrakal
Nettḥuffu targit-nni
Amzun d iḍelli;
Ffɣen-aɣ akk yizumal…
Mi ara d-nemmekti, nettaf-d asmekti-nneɣ d ayen nniḍen, d ayen-nni-nniḍen; yettenququl war ma yessen amezruy-is. Ili-kun, d inigi d tinigit, a wid yessawalen i yimsejjayen n tujjya n umezruy n yidles!
Moh Laid Deflaoui
