Ddurt-agi yezrin, Tangalt teqber mebla sseba. Win tt-id-iluɛan, ad tecɛel deg-s, ad t-ter d cɣel. Cwi kan tfaq d yiman-is. Dɣa tenna-as : awah, ilaq ad ẓreɣ albaɛḍ seg widen i ireqqun s wawal n Rebbi. Dɣa nemmekta-d yewin n umedyaz yesteftuf deg waman. Newwi Tangalt, nerra s At Leqser. Naf-n Ali Menas, yesteftuf di tfenǧalt n lqahwa. Mi d as-nenna d acu d aɣ-d-yecqan, yeṭerḍeq d taḍsa. Dɣa n fures tagnit, nemmeslay ɣef wayen nniḍen :
Tangalt : Azul ay amedyaz. Ma ulac aɣilif, ad aɣ-d-tiniḍ anwa i d kečč ?
Yesԑa useqsi tiririt
Tezga thegga ɣef yimi
Tura di twenza twaɣit
D amnay urnesԑi iɣimi
Tudert-inu d taqbaylit
ԑemdeɣ timest d twaɣit
iles izlez tasusmi
Nekk d win yebɣan talwit
Ttnadiɣ i wugur tifrat
Fkiɣ idis i twaɣit
Asmi d-ssutreɣ tafat
Rriɣ tacmat i wucmit
ɣilen ad neddmeɣ di tlalit
wid akk iwumi ẓẓayit tuyat
Tangalt : Tessefruyeḍ, teqqareḍ-d ? Ayen i d-teqqareḍ, d awal, d asefru… ?
D amedyaz ay d-qqaren
Nekk d awal kan i d-nniɣ
Uǧweɣ-t-id ɣer yimɣaren
Tikta-w yis-s ad tt-sseftiɣ
Sdukkuleɣ-t d ifyiren
D asefru ad t-iniɣ
Tikkwal yessekfal-d ayen yeffren
Tikkwal d tid-nni ttԑiciɣ
Ihi fiḥel ad t-nesṭuqqet
Ma ulac ad as-yeɣli wazal
Neḥwaǧ-it yis-s ad newwet
Wid i aɣ-d-yettheggin timsal
D tamedyazt neɣ d asefru fernet
Nekk ɣur-i llsas-is d awal
Ad t-iniɣ uqbel ad nemmet
Skud nettidir mazal
Ma nniɣ-ak Lewnis ?
D aɣerbaz n win ur neɣri
I wid yeɣran d tamkerḍit
D taqbaylit yesԑan leɣri
Abrid-nni ttun medden
Leḥcic yellan deg-s yekkes-it
« D ameqqran imeqqranen, d amecṭuḥ ddaw Rebbi »
Ma nniɣ-ak Lwennas ?
Lwennas d tabɣest, d afud
I kra n win yesԑan tissas
Ṣṣut-ines d lbarud
Isem-is icudd ɣer ṛṛsas
Si Muḥend Umḥend ?
Tasuta-is :
Yenger d ayen yettwattu
S kra n win ḥesben d lbaz
Yeggra-d umcum d amezru
Yeqqel i tsuta-s d aɣerbaz
Argaz ?
D awal.
Tameṭṭut ?
D tudert.
Tayri ?
D aṭṭan ur nḥellu.
Azzayri ?
Yeԑreq yixef-is
D tisegnit deg walim
Tagmat ?
Gar yifassen n umejjay n tnefsit
Amaziɣ ?
Iḍul ubrid-is.
Aqbayli ?
Win yeṭṭfen taqbaylit.
Taqbaylit ?
Tettnaɣ d tatut.
Yesteqsa-t Tahar Ould Amar
