Ma newwi-d awal ɣef Maɛṭub Lwennas, ayen ara d-nini, drus fell-as. Lwennas bu tissas, Lwennas ur neqbil tikerkas, Lwennas ur nuggad leḥbas, mačči d yiwet, lḥasul.Lwennas, am ddeqs n Yiqbayliyen, i ilulen di tallit-is, yekker-d di lḥif, ijeṛṛeb aɣilif, yessasen-d si qeḍran. D aya, ahat, i t-yessawḍen ad yefren ccna d uẓawan. D ul-is, i yeččuren d afrayen, akked tasa-s, i la ineddfen s yiḥulfan, i t-yeǧǧan ad yennaɣ ɣef ddeqs n tmental.
Tamedyazt, ɣur-s, d allal ; yis-s, i la yettqabal timsal d wayen akk i yebɣa ad d-yessuffeɣ. S tayri, i ileqqem ifyar ; yis-sen, i la yessexsay ccwal d wayen akk i yerzan iɣeblan n ddunit. Tilelli n umeslay, tella-as di lbal, fell-as, yuzzel acḥal, armi i t-tewwi sanda ur d-yettuɣal. Seg wass-nni, i aɣ-yekcem facal; mi nqerreb, ad d-nuɣal acḥal. Seg wasmi i aɣ-yeǧǧa, i aɣ-yewwi uḥemmal, ur d-iggri gar-aneɣ ttkal ; yal wa, ijebbed akkin-a.
Tamagit, ɣur-s, tesɛa azal, ddeqs n tɣawsiwin, i tezwar; fell-as tudert, fell-as lmut. Ur yuggad ara bu učamar ; itteddu deg yiḍ deg uzal, yerna ur d-yettezzi ara timendeffirt. I tiktiwin-nsen, yella-d mgal; ɣer ɣur-s, leḥṛam d leḥlal, d ayen i tezwar talsawt. Am nutni, am udabu aderɣal, iqubel talafsa s wuffal. S tedmert, i iqubel uzzal d ssnasel, i yurzen awal. S wulac, i yerẓa cckal, d kra swayes i aɣ-cudden.
Yesqerdec xilla n temsal, tamuɣli-s, tezga ɣer yimal. D amdan ur d-ḥbisent tlisa n wallaɣ d wakal. Yesdukkel deg Yiqbayliyen, yeɛreḍ ad d-yeslal deg-sen asirem, akken ad ddun ɣer sdat. Ur yessin ara facal, ɣer deffir, ur yettuɣal ; tudert-is, mačči d amagnu.
Lwennas, d cwiṭ-nni seg-nneɣ, aɣ-id-yeǧǧan aṭas. Lwennas, d amdan-nni uɣur nettaf kra i la nettnadi deg-nneɣ. D win i iḥemmlen tudert, akken i nebɣa ad tt-nidir. Lwennas, d win i iḥulfan i tayri, akken i nebɣa ad as-nḥus. D win i ijeṛṛben tilelli, akken i nessaram ad tili…
A Lwennas, tuklaleḍ tijmilin ; am yirgazen, am tlawin, ar ass-a, nettru fell-ak. A Lwennas, tuklal asmekti ; am yirgazen, am tlawin, ar ass-a, nettaru fell-ak. A Lwennas, lefṛaq-ik yewɛeṛ; kečč, yewwi-k uẓekka, ma d nekkni, d iɣẓeṛ. Ar ass-a, neggumma ad neṣber, ar ass-a, mazal nenṭeṛ. Ar ass-a, tettedduḍ-d mi ara d-nehḍeṛ, ar ass-a, nḥemmel ad k-nẓeṛ. Xas akka ɛeddan leɛwam, xas akka jemɛen-k yiẓekwan, nezga nettmuqul ɣer yigenwan, neqqaṛ-as ahat ad d-tebɛezqeḍ!
Ǧamal Maḥrug
