Yal tikkelt ara mlilen yinezzurfa n Warraz Berbère Télévision i wungal amaziɣ, ttmeslayen ɣef wamek ara d-sbedden imenzayen swayes ara seddun tiɣuriwin-nsen d wamek ara frun ungalen ideg sen-d-banent tulmisin yuklalen askasi ; syin ad fernen ungal i asen-d-ibanen d aḍris yemmden nnig wiyeḍ. Ameslay gar-asen, akken ɣezzif i lqay. Sawḍen mwatan (mtawan) ɣef tuget n tmuɣliwin. Amenzay agejdan yesduklen timuɣliwin-a, d amenzay ibedden ɣef tsemlilt n yisefranen imeslen tutlayt d tsekla d wassaɣen n usnulfu d wazalen n tmetti d temsal n umezruy. Yerna ɣer yisefranen-a win n tsenga n udlis (matérialité du livre).
Seg tmuɣliwin-a, ha-tenti tid d-yifraren.
Tira taseklant, drus aya segmi i d-tban. Tin n wungal d amedya ameqqran. Yuwi-as-d i win d tin yettarun ad iger afus deg usebded n tutlayt n tira. Iḍrisen-ines, akken i ttusemman d asemɣer n tira taseklant i ttuneḥsaben d areṣṣi n uswir aniraw n tutlayt. Tin yernan ɣer-s, akken i yessefk ad ttwaqadrent teɣbula n tutlayt i as-d-yuwi i umeskar ad yessiẓ tilisa n usnulfu. Taɣara d tilin n uḍris s tira, yessefk ad ilint d udem iwatan i yinaw s tutlayt-is. Acku ungal, am netta am tewsatin n tsekla tiyeḍ ibedden ɣef tira, ur yelli d aseskel n yinaw (transcription de discours). Tira n wungal, tessawal i ddeqs n yilugan, am wid yerzan tiɣessiwin n tutlayt, am wid yeqqnen ɣer wassaɣen n umdan d tutlayt-is d wayen izemren ad yili d amaynut deg usnulfu . Daɣ netta, ungal, deg tidet, akken i iga d yiwen n udem n twamda n tutlayt i iga daɣen d tasbeddit i tzemmar n usnulfu.
Deg uswir-niḍen, ayen i d-yesnulfuy bab n wungal, wissen ma yuwi-as-d ad iḍerref i wayen tettidir tmetti-s. Addud n umaru, ama deg wayen yeqqnen ɣer yinaw anmetti ama deg wayen yerzan timsal timeqqranin iceɣben imdanen, yemmal-d ibeddi-s d tmuɣli-s deg yiskasiyen yettilin di tmetti-s. Tasekla, da s wudem n wungal, akken i tettusemma d allal i waddud n umaru i tella daɣen d addud anusgan (posture éthique) irefden tamuɣli-s. Acku, tira d tamasit tameqqrant (responsabilité) ; ur tettili tira n wungal ilmend kan n tenfust yessedhuyen.
Ɣas akken, ad yeqqim umaynut swayes i d-yegla uḍris d netta i d udem agejdan n wungal i d-ikecmen ɣer timsizzelt n Warraz. Tasekla d iḍrisen yellan yakan rnu ɣer-sen iḍrisen ara d-yennulfun ɣer sdat, awi-d kan ad ttuneḥsaben akk di tmetti s wudem-nni i ten-yerran d iseklanen. Werǧin yekfi lebni n tsekla. Ungal d tawsit ideg tilelli n usnulfu meqqret, ɣas ini-d ur telli talast ara tt-id-yerren. Amaynut ara d-yawi uḍris, yessefk ad rrent ɣer-s wallen, ad as-gent azal ; yuwi-d ad t-yessemɣer uzɣan.
Amaynut-agi, yettban-d deg wassaɣen n (t)umesnulfuy(t) netta(t) d unsay aseklan d yidles-is d wamek i t-yebna. Aḍris n wungal d amedya n wayen izemren ad d-yeffeɣ seg wassaɣen-agi.
Tayeḍ, d taneggarut. Ungal, talaba-s d adlis. Adlis, akken iga d afaris n tdamsa i yella d afaris n tẓuri, yerna daɣen d taɣawsa n yidles. Ɣef waya, yessefk ad yettwamsel akken iwulem, ad as-fken azal i yuklal. D azal-agi ara as-yefken udem icebḥen. Mi ara t-yeṭṭef umeɣri, tasenga-ines (sa matérialité) ad t-alel di tɣuri-s.
S tikta-agi i as-kkren yinezzurfa, seg tazwara ar taggara, i tɣuri d ufran n wungalen.
Ramdane Achour – Hacene Halouane – Tahar Ould Amar – Allaoua Rabehi – Mohand Akli Salhi
