Tikkwal ttaruɣ iwakken ad qaḍεeɣ axemmem-iw, tikkwal ttaruɣ iwakken ad t-ttuɣ. Tikkwal ttaruɣ akken ad iyi-tissin tira-w, tikkwal ttaruɣ acku ttuɣ tutlayt-iw… tikkwal ttaruɣ, ur d-qqimen yimeslayen. Necna ɣef temẓi, tewser leqqaqet; necna tilelli, teffeɣ-itt tilawt-is, nesnulfa-d ″tugdut″ ur nessin talsa-s. Nessuget asiwel mi yejla wawal: ah lemmer tettzehhir tira!
Ttaruɣ iwakken ad ṭṭfeɣ tasusmi-w; ttaruɣ akken ad rreɣ dderz d tasusmi: ttaruɣ ɣef tmeslayt n tira-nneɣ. Nekkukra lefwaṛ n waman asmi ara yejlu yiṭij-nsen…ɣer yimiren, amezruy ad yessiwel tasekla. Yettuɣal-aɣ yizri d imal: mačči d ayen yezrin kan i d amezruy; ahat ula d ayen-nni d-iteddun, ma nessen ad t-nessenfali ad t-naru, ad yuɣal d amezruy i yimal, d tigawt i usirem, d awal zeddigen i tira.
Ur yezmir ad yeddem yiwen aɣbel weḥd-s: ar d as-yelhu kan -ma yezmer lebɣi n wul n wallaɣ- ma yessiwil i westeqsi d uciweṛ. Ulac tikli war tamuɣli…ur d-yettlal umeslay ma yeffeɣ awal. Tudert n tutlayt, d igenwan n tsekla-ines. D tira i d ul n tmeslayt. U dɣa ttaruɣ iwakken ad tedder tudert-iw…
Lhant akk tutlayin skud nettmeslay ɣas neḍḥa-d d igugamen. Ula d iɣeṛsiwen s tutlayin-nsen; ḥṣan s ugama-nsen…ttemsefhamen, yella lmizan gar-asen. I nekkni s yimdanen, d acu i ɣ-yeblan? Tikkwal yettiɣzif yiḍes, nettaf targit d amwanes; tikkwal d targit i d aɣbel, nettaf iḍes-is d asgunfu. Awi-d kan ma deg yiḍes-nneɣ i nettargu! Skud nettaru, nettutlay. Azul.
Moh Laid Deflaoui
