Tikkelt yezrin, uriɣ-d ɣef yimeskaren ur nettwassen, nniɣ-d deg uḍris-nni : ur ttwassnen ara acku ixuss mliḥ wassaɣ gar-asen d yinermasen (récepteurs) ; idlisen-nsen, ur uwiḍen ara akken i sarmen ɣer yimeɣriyen. Ssebba mačči yiwet. Nezmer ad d-nessewzel tamsalt s lexsas yellan deg usuddes aseklan (l’intitutionnalisation littéraire). D ayen i d-yeglan s tedrusi n tkada (manque de visibilité) n yimeskaren d tsekla-nsen. Gar yimeskaren ur nettwassen, yella Si Ɛmer Uḥemza.
Si Ɛmer Uḥemza gar yimengalen imenza s teqbaylit. D netta i yuran ungal Si tedyant ɣer tayeḍ. Yessufeɣ-t-id deg useggas n 1995, di Fransa. Ɣas akken yettban-d yisem n Editions Berbères ɣef tduli n udlis-is, d amaru i t-id-yessufɣen s tedrimt-is.
Si Ɛmer Uḥemza, isem-is di lekwaɣeḍ : Amar Hamaz (Ɛmer Ḥamaz). Isemma i yiman-is Si Ɛmer Uḥemza d tajmilt i baba-s (d baba-s iwumi sawalen akka). Illul deg wass wis 6 deg waggur n meɣres n useggas n 1942 di Tala n teɣrast (Mizrana). Yekker-d, am netta am tizyiwin-is, di lḥif n tudert d tegnatin n temharsa d tegrawla. Seg wakken yegget lḥif, imir-nni, yunag ɣef Fransa, deg furar 1961, akken ad yerfed tawacult-is. Kra n wagguren kan segmi yekcem Fransa, yebda yettnadi ad iɣer akken ad iqazem ddunit di lɣerba. Yekcem yeqqar, s lexlas, tutlayt tafransist di tdukla iwumi qqaren l’Alliance Francaise ; yeqqar snat n tsaɛtin deg wass, yettxellis tis tlata seg wayen yettaɣ deg waggur ; ixeddem deg yiḍ, yeqqar deg wass. Yeqqim akken qrib kraḍ n yiseggasen. Syin akkin, tusa-as-d tegnit teḥres cwiṭ fell-as, yeǧǧa leqraya mi yeẓra yugem-d ayen swayes ara iqabel tudert di Fransa. Yexdem Ɛmer Uḥemza, di tazwara deg usečču (restaurant), yuɣal ɣer lkuca (Boulangerie) ; syin akkin yuɣal yexdem d abennay (amasut). Yeqqim akken armi 2002, yuwi-d testaɣt (lantrit).
Si Ɛmer Uḥemza, yeɣra iman-is, ama d tafransist ama d tamaziɣt. Deg yiseggasen imenza n yinig-is yella yettaru-asen-d i yimawlan-is s teqbaylit s yisekkilen n teɛrabt. Segmi i yelmed tafransist d yisekkilen n tlatinit, yuɣal yessexdam-iten. Yelmed tira n tmaziɣt ; yura aṭas n yisefra (yenna-d azal n 200), tuget deg-sen yessekcem-iten-d deg wungalen-ines. Iḥemmel ad iɣer idlisen, wid n umezruy d tsekla uɣen azal ɣur-s. Gar wid yemlal, ɛawnen-t : Muḥya. Yeqqar-d fell-as : “Muḥya, yefka azal i wayen i ttaruɣ, yezga yessebɣas-iyi”.
Yura Ɛmer Uḥemza Kraḍ (03) n wungalen. Amenzu isemma-as : Si tedyant ɣer tayeḍ, yekfa-t s tira di 1992, yeffeɣ-d di 1995. Wis sin, yekfa-t di 1995, azwel-ines : Amɣar amusnaw ; ungal-agi, tazwert-is d Salem Caker (Chaker) i as-tt-id-yuran. Ma d ungal wis kraḍ, yekfa-t s tira di 1998, isemma-as : Aḍu n tezɣent.
Ungal-is amenzu, yettawi-d ɣef tallit n tegrawla d yiseggasen imezwura n uwanek n Lezzayer d wamek i ddren yimdanen di lawan-nni. Ddeqs deg-s yedder-it umeskar, d acu kan ibeddel ismawen n yimdanen (di lebni n yiwudan). Ungal-is wis sin, Amaɣar amusnaw, yettawi-d ɣef usirem swayes i d-yegla Budyaf (Boudiaf). Ma d ungal win kraḍ, yettawi-d ɣef tallit-nni n rrebrab, azwel-ines d tugna n wayen yeḍran di tallit-nni : Aḍu n tezɣent. Ɣas akken sin n wungalen ineggura ur d-ffiɣen ara, isres-iten di temkarḍiyin n tsudda ideg selmaden tamaziɣt, ama di Lezzayer ama di Fransa.
Si Ɛmer Uḥemza, seg yimeskaren ur nettwassen, maca ur yessefk ad ten-nḍerref, ur ilaq ad ten-nettu. Wiyeḍ d tiyeḍ diɣen.
Muḥend Akli Salḥi
