Ungal-a d akemmel n wungal Tabrat n uẓekka. Tikkelt-a, d Taseɛdit, tameṭṭut n Meẓyan, akked warraw-is i yunagen ɣer Fransa. Tamentilt n yinig-a, d Jackline ( Jackilne: d tarumit uɣur yella ixeddem Meẓyan, argaz n Taseɛdit), tra ad tsellek tawacult n urgaz i as-yellan i lmendad i tebḥirt-is.
– Jackline, tikkelt ad naf isem-is akka (Jackline), tikkelt “Jacqueline”.
Asmi tewweḍ Taseɛdit akked warraw-is, tessen Davda, Jackilne, Yusef, Akli Akked Suza.
– Davda: isem-is n tidet Dehbia, segmi truḥ ɣer Fransa i tbeddel isem-is.
– Yusef: Amdakel n Meẓyan di Fafa, d netta i as-d-yufan axeddim ɣer Jackline.
– Akli: Yella akked Yusef asmi yemlal d Meẓyan, maɛna yettalas yakan tuḥsift n ttar i Meẓyan…
– Suza: D taspenyulit i yunagen ɣer Fransa akken ad texdem, tufa-d iman-is deg yir iberdan, tettḥelli-d aɣrum s tfekk-as; alammi d-tḥella ula d aṭṭan, tessen yakan Akli, i tt-yewwin ɣer Meẓyan, asmi i as-tessenṭeḍ aṭṭan n Sida deg unnar yellan d usu; dɣa d tin i d tamentilt yewweḍ Meẓyan s aẓekka.
Asmi tessen Taseɛdit imdanen-a, teqqel ula d nettat txeddem di tebḥirt n Jakcline, nnig n waya tqeddec di tdukla akked Davda. Teṭṭef axxam yellan zik n Meẓyan, dɣa dinna i tessen Suza yerzan ɣur-s yiwen wass, temla-as lbaḍna n Meẓyan d wamek tella d abrid-is s anda ur d-yettuɣal, terna temla-as tixidas n Akli… Seg wass-nni, Taseɛdit tger-d Akli gar wallen-is, teggul ur teḥnit ar d-terr ula d nettat ttar n urgaz-is. D tin i yeḍran: Taseɛdit temdi-as i Akli, teṭṭef-it am yizimer yeṭṭef wuccen; teṭṭef-it s tqeffet yemdin s tuzzuft akken yettwaṭṭef urgaz-is.
Taseɛdit terra-d ttar n urgaz-is, terna tekkes aɣbel n Akli i tuggad ad as-yexdem kra i nettat d warraw-is.
– Tadyant-a yeḍran, ɛeddan fell-as sin n wayuren; wiss amek tessaweḍ Taseɛdit tenɣa Akli, temḍel-it, di Fransa, war ma faqen-asƔer taggara, Taseɛdit, tuzen tabrat i xali-s Aɛrab akked xalti-s Layetmas s uzwel Tabrat n yinig, akken ad asen-tmel ayen texdem rnu ad tessifses fell-as tɛekkemt.
Taseεdit, s tebrat-a tekkes taεekkemt i tbubb. Nnig n waya, iban-d waẓar n tagut i d-yuɣen si ttar amcum yezgan yessengar tiwaculin d yiderma.
Gar ttar d yinig, Zahir Meksem iger-d aẓeṭṭa amaynu di tsekla taqbaylit.
Win ara yekfun ungal-a s tɣuri, ad t-yaf d akniw n Tabrat uẓekka, isemmed ayen yebda gma-s. Ilmend n umeskar, sul ad d-yennerni wis 3.
– Tamawt, deg yixf wis sin, ameskar isemma-as : Yusef, Akli d Jackline, maεna mi t-neɣra, ur nufi ara kra i d-yewwin ɣef Jackline! Ahat ur iwulem ara ad d-yeddu yisem-is imi ur tt-id-yewwi ar umeddaḥ di teqsiṭ.
Tukkist seg wungal:
“Ma aẓar seg d-yekker umdan iseggem, igerrez lsas-is, ad igemmu ad yettwenniɛ, ad yaf abrid i tudert, ad yeg anagar ayen yelhan. Ur yesri i wayen-nniḍen. Ma ur yelhi lsas-is, ur yettili wayen ara t-yerren d aterras ara d-yawin kra i talsa. Lmaḍerra d yir lecɣal ad t-ṭṭafaren am tili-s. I yebɣu yeḍlu-t d tasreḍt ad yeqqim yezleg.” (sb. 37)
Nedjmeddine Mouaissi,
It Wertiran, 07/05/2025
———
Azziḍris:
Tabrat n yinig
Zahir Meksem
Ungal
Tiẓrigin Sarahmed ( yennayer 2025)
96 isebtar (10 n yixfawen kfan s yiwet n tebrat umi isemma : Tabrat n yinig).
Taduli: D tawlaft n yiwet n tlemẓit yeqqimen ɣef ufutay i yellan di texxamt, tettḥebbir, teṭṭallay ɣer uzgen-nniḍen n tewlaft anda tella taddart. Ilmend n tɣuri n wungal, tawlaft-a temmal-d Taseɛdit yellan di Fransa, tettḥebbir ɣef wayen teǧǧa di tmurt. Neɣ, d Taseɛdit yettḥebbiren ɣef tebrat i tuzen seg yinig (Fransa) ar tmurt.
