Ḥmiduc — deg yisem-is aḥeqqani Ḥmed Xeddim — d amedyaz, d acennay, d imesnulfu n uẓawan (auteur-compositeur-interprète) i d-yeǧǧan ammud n ccna ara yeddren i tsutiwin n uzekka. Ilul deg taddart n Ugni n Waklan, di Ɛeṭṭuc, taɣiwant n Makuda(Tizi-Wezzu), ass n 14 ɣuct 1956, deg twacult n 8 n yiɛeggalen. D ababat n 3 n warrac d teqcict; sin deg-sen s yise-nnsen n tẓuri, “Kedym” d “Kooseyl”, imi ḍefren abrid n babat-sen.
Yebda ccna ɣer taggara n yiseggasen n 70. Tasfift-is tamenzut teffeɣ-d deg 1980 s uzwel “Kret ay atma”. Sakin yerna-d tiyiḍ armi yewweḍ 12 n tesfifin, naɣ n 84 n tezlatin. Yemmut ass n 5 yulyu 2002, deg waṭṭan I t-yeṭfen seg 1994, yettwamḍel deg taddart-is.
Ddeqs n tezlatin-is mucaɛit ar ass-a, aṭas deg-sent cennun-tent inaẓuren ama deg tmeɣriwin, ama deg usufeɣ, yakkan : Semmeḥ-as a Wiza, Settac di laɛmer-is, Lemḥibba-w temmut, Tawizet n tnac...
Tayri d lefraq
Tama n yisental ɣef yecna Ḥmiduc aṭas n tezlatin-is n ttawin-d ɣef tayri tayri d wafrayen yellan ger urgaz d tmeṭṭut, akken daɣen tuget deg-sent ur d-ttawint ara ɣef lferḥ, lefraq yella s waṭas n tmitar am usefru Nadya ruḥ, ɣef yiwet it-yeǧǧan tedda d wayeḍ, ayen i yerran amennay ad yeṭṭef aṭṭan. Deg Lemḥibba-w temmut, am tiyaḍ, amseflid ad yegza tayri-is ur tessaweḍ ara ad temmed — yezga yella i tt-iferqen: tiɣawsiwin n tudert neɣ afrayen ur neɛdil ara gar-asen.
Tadukli, ɣer Ḥmiduc, tesɛa azal meqqren. Di tesfifin-is timezwura yerra tajmilt i sin n yimeddukal-is, s tezlatin Ay aḥbib akked Izem i d-trebba tsedda. Yerra tajmilt daɣen i irfiqen-is wukud yella deg Tinduf asmi yesɛedda lɛesker, deg tezlit Lbumba, asmi i lɛesker yuder-iten-id; tajmlit niḍen yerra-tt i baba-s : A baba.
Tamsalt n tmetti
Azɣan n tmetti d tsertit, ur llin ara d imḍerfen deg wammud n Ḥmiduc — d aḥric agejdan. Tasertit, ayen iḥuzan tamurt, yella-yas d aɣbel am tezlit Sidi lmir anda izeɣɣen aselway n usqamu n tɣiwant, yudder-d tiḥila i yesseqdac akken ad yaweḍ s adabu. Naɣ tizlatin Fiḥel ma tettruḍ ay ul , Le parti akked Tusa-d listiqlal, Tamurt yezdeɣ-itt ulac” akked Ini-as, ini-as, anda yir tasertit d sebba n lḥif yuɣen agdud. Asentel n tineslemt, s tezlatin A baba lwali akked A bab igenwan, yesnekta aẓayan n tqbaylit i yellan tettenfufud deg tmurt. Yal tizlit d tamsalt d taluft i d-yettru usefru-s.
Gar tezlatin yennulen timetti, llan-t Kkret ay atma, Ahya ya arrac, Ǧǧet-iyi ad ɣenniɣ. Am wakken yella wanda yesdukkel ger sin n yisental am usentel n tayri d win n tmetti: am tezlit Gulleɣ ɣef zwaǧ anda amennay yeggul ɣef zwaǧ imi tinna iḥemmel fkan-tt yimawlan-is i wemɣar. D asenqed i tikti n yimawlan i yettaken yessis-tsen war ma meyzen; daɣen tizlit Seṭṭac di lɛamer-is yessken-d yiwen wudem n tmetti anda tilemẓit fkan-tt terna ɣef takna, ǧǧan amennay yezɛef imi ur telli d anṣib-is xas ma tezyen.
Lɛesker n Tinduf
Asentel aneggaru, d win n lɛesker. Ḥmiduc yecna ɣef rwaḥ-is ɣer Tinduf, anda yesεedda leɛsker-is s Lmeḥna-w tamezwarut akked Mi bdiɣ abrid s tikli — amuɣben-is deg wexxam-nni yeǧǧa-d lateff deg wammud-is.
Ḥmiduc yeǧǧa-d wammud d ameqqran, yesdukklen tayri, tamsalt n tmetti akked tsertit, s tsekla d ubrid d ussirem. Ccna-s yuklal tamuɣli s telqi ɣer sdat, yakkan, deg tezrawin tisdawanin imi mačči kan d ccna d tamedyazt taqbaylit.
Sifaks Lamuri
