Ttaruɣ am uderɣal yettnadin tiqqit n tafat neɣ am ugugam yettḥuffun awal d asiwel: ur ẓriɣ ma d tasekla-w i d tamedyezt-iw neɣ ssenfalayeɣ kan s tira-w war ma gaɣ ddhen-iw d acu ara d-iniɣ. Lḥaṣun ttaruɣ s tmaziɣt, s teqbaylit; ayen nniḍen…d amezruy aseklan. Acḥal d abrid i s-nniɣ: d tilelli i s-yettaken tamagit i tugdut, ayen-nni-nniḍen d tigemmi n tigzi ma tecqa-d ɣur-neɣ. Awer yeffeɣ leεqel axemmem-nneɣ!
Akkin i usekkil d awal, d amyag…d aḍris, d adlis. Akkin nnig n dihin, d tira i d amezruy n yimeslayen n tutlayt-nneɣ. Ula d imezwura-nneɣ nnan: ″win yebɣan tamaziɣt, ad yissin tira-s″. Yella waya nnig waya. Ma nerna nedda akkin i tikli: d tira i d tudert n tutlayt.
Lxaṭeṛ-iw
Gaɣ i lxaṭeṛ tixulal
D uffal neɣ d uzzal
Lebɣi terfed-it tsusmi
Ukreɣ targit i lebɣi
D tiɣri n tirɣi
Iles d idles i tira
D tamendidt ziɣ tufa-yi
Tezga d inigi
Tasekla-w teddem asefru
Win yeṭṭsen almi d azal
Yessugut awal
D aɣbel-is i d tifrat-is
Tamettant-nneɣ yeddren
Teggugem tuḍen
Mi temmut tudert-ines
Tessufuɣ targit lewhi
Γer yillel n yigli
Yuki-d yiḍes n tnafa
Yezga yinig d aεessas
Tewser ma tezmer-as?
Ccwi tasekla-s teddem-it
Lḥif yuɣen tilelli-s
Ziɣ amzun d mmi-s
Siwel amezruy n tmagit…
S wawalen-nneɣ nettutlay
Ameslay d aktay
Iṭij…aman d tudert
D asufru-ya i d iyi-d-yettaken azuḥ n tegrayt (conclusion) i tudert n tmettant n umezruy-iw. ꓩriɣ cwiṭ deg tgemmi taseklant tamaḍlant, maca ula d ayen ttaruɣ, i riɣ ad aruɣ s tsusmi-w- d tiram d wakud kan i t-yeğğan- ssarameɣ ad yaf iṭij n tsekla-ines. Win yebɣan tutlayt-is, yissin tira n tgemmi-s. S tira ara tennerni tutlayt-nneɣ…ayen-nni nniḍen d aɣebbbaŗ s allen, d tikli war iswi. Tettcebbiḥ ddunit ussan n yal win yettarun s tutlayt-is…
Moh Laid Deflaoui
