Tidet d tilawt

Nudaɣ ɣef wul yettun lebḥeṛ-is, ufiɣ-t d tilawt yeččan tidet-is. Amek i d-nesnulfa tilawt, tidet d yiwet? Neɣ wissen amek; ayen nettidir d tilawt, tidet d ayen nniḍen. Rziɣ ɣer wexxam anda luleɣ, ur t-ufiɣ ara; steqsaɣ imsaddaren-nneɣ, yal yiwen anda isewweq, yal wa yelha-d d tilawt-is. Akal i ɣ-d-iğğan d awal ar ass-a – ɣas ur nelli – yezga d iṭij i d-ikeččmen gar lecqayeq ɣer wexxam-nni-nneɣ am tafat iteqqsen ilem i ɣ-yettṛajun, ara ɣ-yeggunin. Ay asmi tella tilawt-nni-nneɣ! Ttmeslayeɣ d lmeyytin ur nemmut mi ffɣen wat tudert tudert-nsen.

Wid iṛuḥen nettwali-ten:
Nessutur aman iṭij…
Γas ma nettlejlij
Tiwwura war tisura.
Ixf n targit yessawalen i win ur neṭṭis, d aɣbels-is; aɣbel wayeḍ, d win yebɣan ad yargu, kksen-as iḍes-is. Din tura i teqqim:
Yeffeɣ-aɣ yiḍes nettargu
Skud nettaru
Tilawt ur nessin tidet…
Tidet yettarran tafat i tilawt, d tudert-nni-nniḍen ara teddem tsekla d amezruy. Steqsaɣ ɣef tdukkli n tsusmi, tezga di teɣmeṛt, steqsaɣ ɣef thuski ur nessin temlel, teffeɣ iberdan-is; steqsaɣ ɣef wakud d wadeg, ɣef umeslay d wawal, ufiɣ-ten d tilawt n tidet. Ul n tfekka…d ul n wallaɣ:
Nesseɣres lewhi n tissas…
Ur neffiɣ tilas
Ameslay yeddem-it wawal
Ur d tilawt nettidir i d tidet…tilawt tleḥḥu, tidet d yiwet. Awi-d kan mi d-zgant, tsekla d tmedyezt, d tayuga talsant! Yal wa yessenfalay tidet deg tilawt-is. Awi-d kan ma myussanen, ufeggag d trigli-ines:
Tafekka yettun allaɣ
Tettuɣal d adɣaɣ
Γer wul ma teffeɣ tiɣri