Tasekla-nneɣ d axxam, d tajmaɛt ideg nettemlili deg zzman-agi ideg nella.
Ma yella zik tesdukkul-aɣ teɛṛust n tejmaɛt neɣ lkanun n wexxam akken ad nargu, ass n wass-a d idlisen, ungalen, isefra, amezgun ara ɣ-yeqqnen ɣer teqbaylit anda nebɣu n nili.
Yal yiwen, ticki ara icedhi tamurt neɣ ara yebɣu ad yerzef ɣer ZIK, ad iḍegger tiṭ-is ɣer yiwen seg wungalen d yedlisen-nneɣ icebḥen, ad yessisen di kra si tenfaliyin n teqbaylit s teqbaylit. Taqbaylit ad tidir, nekkni ad ncudd ɣer-s anda nebɣu nili.
Iminig i yeǧǧan tamurt, ticki yewwi ungalen deg uqrab-ines, amzun akken icerrew-d taddart, iɛebba-tt seddaw tecḍaḍt-is. Mi tt-icedha, ad yedlu fell-as.
Tamurt mačči d iẓra kan, d imdanen i tt-yessidiren. Ticki ddren deg-s, sswayen-tt s tfekkiwin-nsen akked tsekla, idles d tzuri. D wigi i s-yezzuzuren sser, i tt-yettarran tecbeḥ, telha, tettwacedhay. Idles-agi, ass n wass-a, yettefṛuṛux d idlisen, d amezgun, d isefra d wungalen.
Ihi win yebɣan taqbaylit, ad iɣer tasekla-as.
Massen Allioui
