Mi tennam ihi, lexla ur texli. Ɣas lkanun-nni yensa, qqiment-d kra n timucuha ; kra seg-sent mazal-iten deg yilsawen ; kra seg-sent beddlent tilin. Tuɣact i tent-yessawalen, wissen amek akken ; kra deg-sent, negrent ; kra, tekcem deg-sent tibbeḥbeḥt yettnaɣen d tusut ; kra deg-sent, sqewqiwent, uɣalent ur ssinent i tmucuha ; kra nniḍen, ur stufant, ɣunfant ula d tutlayt n tmucuha-nni. Ma d tuɣac timaynutin, kra deg-sent, fesxent ; kra, dehnent s wanyaten nniḍen. Lḥasun, ass-a mačči am yiḍelli. Yerna, ass-a, mačči d iḍelli.
Ass-a, idles d tsekla, ha-ten-ad deg yidlisen d wallalen n tettiknulujit. Ass-a, timucuha-nneɣ ufant abrid ɣer yisebtar n udlis. Tamacahut, tbeddel udem ; tura d taɣuri i tt-qqaren. Ɣer yisekkilen, rnant tmelqaḍ (illustrations), kra seg-sent d tiwlafin, kra seg-sen d asuneɣ ; ittusemma, ur yeqqim unamek deg wawalen n tmacahut kan.
Mi tennam ihi, ur texli lexla. Mi tekkat nnda n tatut, llan wid-nni d tid-nni ifaqen. Ḥulfan-as mi tettikiw tkatut. Kkren, akken zemren, akken ufan. Wa d aseskel (transcription), akka i yeggmen ad isider timucuha. Wa, d allus i asent-yules i tmucuha, yefka-asent udem d ajdid ; gar cwiṭ d waṭas, rran-tent deg wanya n tɣuri. Wa, isewweq ɣer leswaq n wiyeḍ, yeqḍa-d timucuha n wiyeḍ, yessekcem-tent-id ɣer teqbaylit. Wa, yesnulfa-d timucuha timaynutin…
Ma nebder-ten-id, tid d wid yekkren i tira n tmucuha, nuggad ad nettu kra. Ma ur ten-id-nebdir, nεemmed i tatut. Meqqar ad d-nebder, ɣas ad nettu ; ma nettu, ččḥen fell-aneɣ, wicqa. Nefhem-iten. Yif-it ma ččḥen fell-aɣ kra wala ad nenkeṛ ifassen n wid d tid ileqqmen timucuha-nneɣ ; xersun ad nebder kra seg-sen : Meryem Day, Meziane U Muḥ, Ferhat Chelmouni, Suad Fidala, Nadia Kacer-Mennad, Sadia Bounadi, Malek Houd, Moussa Larabi, Zoulikha Touati, Tassadit Yahiaoui, Karima Allahoum, Nadia Ben Mouhoub, Sassia Nacib, Nadia Djaber, Nait Djidji, Abdellah Hammane, Akli Azwawi (Kebaili), Hamid Bilek, Sonia Lounis, Ziri At Mɛemmer, Ccix Lyazid, Mourad Irnaten, atg.
Ayen xedmen wigi d tigi, mačči d izli, ɣas tettban-d temsalt fessuset. I as-iḥulfan i tergin ala aḍar yeddan ḥafi…
Mi tennam ihi, deg tmucuha-agi yuran, nnulfan-d yiwudam, d arrac neɣ d tullas. Akken i qqimen yiqdimen i d-lulen yimaynuten. Ɣer Mqidec d Belɛejjuḍ d Silyuna d Lunǧa d Slilwan d Jeḥḥa d Ɛmer nnefṣ d Ḥedd-zzin d Ɛerba d Ɛli bu-tkercet d Meqber-mensi d Ɛica mm-iɣiɣden d Ɛli d Weɛli d Uɛeqqa yessawalen d wiyeḍ, rnan-d yiwudam iɛemṛen timucuha timaynutin am Bisbisa d Bab-idurar d Fufu d Futi d Mila d Medyaz d Tifaggur d Ɛelluca d Faḍma d Seɛdi d Jḥiḥa tahṛamsit d Mciccu amuṭṭis d Bkikuc d Bkikca d Ḥmiṭuc d Duduc d Tewkiljenniwt d Beẓẓi d Bejja d wiyeḍ d wiyeḍ…
Mačči kan daya, iwudam-agi imaynuten, ur qqimen ara kan ḥanun zanun di taddart ; kra seg-sen, kecmen timdinin, unagen ɣer tmura ur yeɛfis uḍar ; ttmeslayen taqbaylit akken ssnen talmant ; ttmeslayen ɣef tezdeg n twennaḍt d yizerfan n yigerdan ; ssnen amek ara seddun iɣerruba akken ssnen ad d-seɣren angalen uffiren ; zemren ad frun tilla di tejmeɛt akken zemren… Nniɣ-awen ; ur texli lexla…
Muḥend Akli Salḥi
