Tira tadermant (l’autobiographie) deg-s aṭas n wudmawen. Ayen i ten-yesdukklen d tira n umdan ɣef yiman-is ; tezmer ad tili tira-agi d tibratin (correspondance), d aɣmis animan (journal intime) neɣ d tukutay (Mémoires)… Tadermant d taneqqist tamaqqalt (récit rétrospectif), yura-tt yiwen d tasrit s umata (yella wanida d asefru), yettawi-d ɣef tudert-ines d tilin-ines (Philippe Lejeune, Le pacte autobiographique, Seuil).
Ungal aderman (roman autobiographique) d ṣṣenf n wungal i d-yettawin ɣef tudert n umaru ɣas akken deg waṭas n tikwal itteffer umaru cwiṭ iman-is, yezmer ad as-yefk i uwadem agejdan isem ixulfen isem-ines (am Mulud Ferɛun, isemma i yiman-is deg ungal-is : Furulu). Ittili uḍris d ungal aderman (autobiographique) mi ara yili umaru d netta i d amsawal (narrateur) d netta i d awadem (personnage) n teḥkayt.
Ayen yebḍan ungal aderman (roman autobiographique) ɣef tkutay (Mémoires), yebded ɣef sin n yimenzayen (principes).
Amenzay amenzu, yeqqen ɣer wassaɣ-nsen d usatel n tudert (contexte de la vie). Ungal aderman yettawi-d ɣef tudert n win i t-yuran ; tres tiṭ-is (d amaru, d amsawal neɣ d awadem) ɣef tudert-ines (amek tella d wamek tuɣal). Ma d tikutay, ɣas akken ttawint-d ɣef tudert n win i tt-yuran, zeggrent akkin ɣer usatel n tudert-is. Zemrent ad d-awint diɣen ɣef wayen ur neddi ɛinani d tudert n umaru am umezruy d teḥkayin nniḍen i izemren ad ɛnunt timsal i yexḍan tudert n umaru. Deg tkutay, yezmer umaru ad d-yawi ɣef waktayen(-is) ur nerzi tudert-is s timmad-is meɛna yecfa-asen, qqnen ɣer usatel (contexte) n tudert-is.
Amenzay wis sin ad t-yaf yiwen deg wassaɣ n teḥkayt d tilawt. Deg wungal aderman, texleḍ tilawt d uferriɣ (fiction) ; amaru-amsawal-awadem, yezmer ad ileqqem (akken i as-yehwa) taḥkayt i d-iḥekku s yiferdisen n uferriɣ. Ma di tkutay, yekkat umaru ad d-yesken tidet d tilawt akken i llant, xersum akken i tent-iwala netta.
Muḥend Akli Salḥi
