Mi teɣriḍ ungalen, kra jebden-k (kem), tekfiḍ taɣuri-nsen, tecfiḍ fell-asen, ɣas terriḍ-ten d tama, ttuɣalen-d deg wawal-ik/im mi ara tettmeslayeḍ ɣef wungalen yelhan.
Ad asen-tiniḍ i wid/tid ara d-yeslen akken ad t-ɣren ; ad ten-tesmuɣreḍ, ad asen-tgeḍ ccan yelhan. Kra n wungalen nniḍen, ur twalaḍ ara ayen izaden deg-sen, teǧǧiḍ-ten ; ma temmed tɣuri-nsen akken kan ad teẓreḍ amek i tekfa teḥkayt ɣef i d-uwin ; ur (am)ak-d-ttaǧǧan ara tidmi yelhan, wissen ma ad ten-id-tbedreḍ ; yezmer ur tettwessiḍ ara wiyeḍ ad ten-ɣren.
Llan diɣen wungalen, seg wakken lhan, ur tessarameḍ ad tekfu tɣuri-nsen. Ad ten-teqqareḍ ad tḥebbseḍ akken kan ad tedduḍ di lebɣi i yiman-ik. Ad testeqsayeḍ iman, deg yiman-ik(im), ad trennuḍ : amek i as-ixemmem umaru i ta ? Amek i yessaweḍ ɣer telqey n wayen i d-yura ? Amek ara taweḍ temsalt neɣ tayeḍ ? Ad testeqsayeḍ iman-ik(im) ad trennuḍ. Ɣas ur tessawaḍeḍ ara ad d-tafeḍ tiririt i (am)ak-iwulmen, ttusemman yisteqsiyen-nni, si tama, d assaɣen i ken-yetteqqnen wa ɣer wa, si tama nniḍen, d timitar (limarat) n yiḥulfan yelhan i d-yettlalen/d-ilulen deg-k(m) ɣef wungalen-nni. Syin akkin, ad as-tuɣaleḍ am uberraḥ, ad tettberriḥeḍ fell-as i yimeddukkal-ik(im), i yimidawen-ik(im), i wid/tid yeṭṭafaren asebter-inek(inem) n Faysbuk ; ma tettaruḍ, ad d-taruḍ fell-as.
Ungalen-agi, yal yiwen deg-sen amek i yettḥaz, yal yiwen deg-sen amek i yettaččar tiṭ n umeɣri, yal yiwen deg-sen amek i as-tt-itteqqed. Sεan ayen s wayes ad qenεen imeɣriyen. Annect-a akk d amur. Amur wis sin, yerza ameɣri. Ameɣri, yettraju kra seg wungal ; ma yufa-t deg-s, yettḥulfu s tumert, yestummen-as i tɣuri n wungal-nni.
Llan diɣen kra n wungalen, yettaf deg-sen umeɣri ayen ɣef ur inuda, yettaf deg-sen ayen ɣef ur yerǧi ; tikwal, ayen akken i yeqqar/i yeɣra, seg wakken ur yebni fell-as, yettbeddil-as ula d tidmi-ines ɣef wungal d tira d tsekla, tikwal ula d tikli-s d tfelsafit-is di tudert. Ungalen am wigi, mennaɣ-ten/ttmenniɣ-ten i wid/tid yettnadin fell-asen… yiwen wass kan ad ten-afen. Win/tin yeqqaren, yettaf-it(t)-id wungal yelhan. Muḥend Akli Salḥi
