Acḥal ayagi i nettṛaǧu ad nissin anwa-ten Buḥu, Musa d Ymuyud, Belɛid Ujiṭṭuḥ, Ẓrureq d wiyaḍ ; tikwal d yiwen kan, war-isem, d aḥerfi. D iseggasen, Ḥmed At Bacir yettaru-d iḍrisen fell-asen. Neɣra tugett di tedyanin-nsen di Fayesbuk. Sya ɣer da alamma yesfeɛfeɛ-aɣ-d s yiwen n wemdan yettcabi ɣer wid i d-nettmagar deg webrid, deg uxeddim, i nessen di temdint neɣ ula deg usugen-nneɣ, ttcabin ɣer-neɣ. Imeddukal i t-iwellhen ɣer usufeɣ-sent, tidyanin-agi d adlis, ur zgilen ara : ad yecṛeh yis-sent yimeɣri. Am wakk-nni i neqqar « ad inezzeh wi ixaqen ! ».
Γer taggara n 2025, dduklen yiwudam-agi di Tidak n tejmaɛt i d-yeffɣen ɣer teẓrigin Kabylie. Adlis-agi, tidyanin iɣef d-yewwi, d taḍwiqt ɣef tmetti taqbaylit d wamek tettxemmim, tikli-s, ajbad d useɣres i tedder, ahat ula ɣef ukuffet-ines sdat yibeddilen iḍerrun deg umaḍal d tmeddurt, ama di tmurt, ama deg yinig. Mass Ḥmed At Bacir yura-d daɣen tisuqilin n kra n tedyanin yeḍran di tmettiyin nniḍen, am Diziri, afellaḥ igellil n tmurt n Likuṣ (fṛ. Ecosse) d uderɣal n tqenṭert n Bruklin (fṛ. Brooklyn) di temdint n Nyu-Yuṛk (fṛ. New-York). Annect-a yesken tazmert n wemyaru ɣef usnerni d usimɣer n yedles, si tama, si tama nniḍen ger cwiṭ d waṭas, imdanen am Buḥu d Ẓrureq llan di ddunnit meṛṛa, yal timetti s wid-is…
Tamawt tamezwarut, di Tidak n tejmaɛt, yal aḍris ur d-iqarr ara s timmad n Yibuḥuten d wiyaḍ iɣef d-yewwi, yemla-aɣ-d tamussni d tikli d tmuɣli-nsen ɣer tilla. Uran d azrar n yeḍrisen, s teqbaylit timserreḥt, d iḥedren iwezzlanen, fessusit i tɣuri d yeẓri.
Adlis-agi d tameddurt n Yibuḥten d wiyaḍ, yuklal tiṭ n umussnaw d tussna, tanṭrupulujt, ara yesnetqden tilufa icudden ɣer wemdan aqbayli di tmettiyin d tallit ur bɛident ara ɣef wemdan n wass-a. d tussna kan ara yerren ɣef yiseqsiyen n ubeddel, igerrez neɣ yecmet, iɣer yessaweḍ. Deg yidis iḍen, tajmilt tamenzut i wemyaru: d inigi ɣef tmeẓzuɣt-is yeslan d tiṭ-is yeẓran. Iger tamawt i Yibuḥuten-agi i s-d-yeččuṛen … temliliyin timagnutin: tignatin n uḥiwec d welqaḍ.
Nnig wannect-a, adlis-agi yessufeɣ-d ɣer tafat kra si teqdimin n zik d tejdidin n tura. Yal tadyant, ssasen-tt-id uɛekki d wesmekti, aqesser d tukksa n lxiq, d uzuzer n tmussni… am wakk-nni i t-id-yura dda Lmulud : « Ay Azwaw, tamussni mačči d lweṛt kan, mačči d agni i wumi d-zzin leṣwaṛ. Awal n tmussni d antag, d tikli ɣer sdat. Ma tgiḍ-as algam, tenɣiḍ-tt ». Yal aḍris yemsel s wawalen n yal ass, mebla ma icebbeḥ-iten s tfukal n tesnukyest am di tsekliwin yufraren. Yeǧǧa tameslayt n uwudem akken tella, d tagamant. Ugaɣ yessuli-ten-id s « ṭṭabya » : yekkes tuccḍiwin, igerrez tifyar, yerra-asen aqeṭṭeb iwulmen akken ad ssiwḍen yeḍrisen izen n tadyant.
Talɣa-agi n tsekla tessew s tidett akken ad taɣ deg wallaɣen, akken ad d-tegri deg umezruy aseklan s yisawen n wid d tid i tt-yeddren.
N. Uqemmum
