Uccen, yettaf kan iman-is deg udrar ɣas ma yella asemmid yeddukkel netta d llaẓ, ɣas ma yella taqeḍɛit ɛussen-tt yiqjan, ɣas ma yella « semmumit tẓurin-nni », ɣas ma yella ablaḍ yugar akal, ulac anda ara yekber yiccer. Uccen, d adrar kan i t-itteṣren. Am umsedrar. Am uqbayli.
Adrar a uccen d azwel n wungal i yura Ḥasen Ḥelwan. Yeffeɣ-d ɣer tezrigin Aṭfaluna (Lezzayer) deg useggas-agi. D adlis-ines wis sin, amenzu-ines d ammud n tullisin i umi isemma “Tamekrust d tullisin niḍen” (yeffeɣ-d deg useggas n 2014, d Aseqqamu Unnig n Timuzɣa i t-id-yessuffɣen).
Ungal-a n Ḥasen Ḥelwan, yettawi-d ɣef tuɣalin n umdan ɣer tmurt ideg i d-ilul, tamurt-nni i as-yefkan tummast n tmagit-ines (l’essence de son identité). Ungal-agi, ur yelli ara kan d ccna n tujjmiwin yettaṭṭafen amdan yeffɣen tamurt-is, ur yelli kan d tajmilt i tmurt; ungal-agi d taseɣrut n umdan iwalan azal n tmurt deg wazal n umdan. Acku tamurt mačči d imukan, acku tamurt d inumak : tamurt d tamazirt s yisekla-s d yidɣaɣen-ines d tseɣliyin-ines, tamurt d akal yessewayen iẓuran, yettqewwiten amdan, tamurt d taddart yetteṣren iɛeggalen d twaculin, tamurt d adrar i as-yettaken i umsedrar ayen s wayes ara yerfed aqerru. Inumak-agi akk wa ikeččem deg wayeḍ. Seg wakken ttemyekcamen yinumak-agi deg waygar-asen, yuɣal wawal “tamurt” d azamul n wadeg, d azamul n umezruy, d azamul n timmuda (complétude). S wakka, tettusemma tmurt d aferdis agejdan deg tnaṣlit d tmagit n umdan. Ma ulac aferdis-agi, wissen ma ad ilin wiyeḍ.
Seg tazwara n udlis yettban-d wannect-a : tamezwarut deg tezwart n Ḥamid Bilek (gar sb. 9-12), tis snat deg wawal n umaru n wungal-agi (sb. 13-16) ideg i d-yessefhem acuɣer i d-yura aḍris-agi. Γer umaru (Hasen Ḥelwan), ungal-agi, isemma-t d iɣzer. Tlata n tregwa i t-id-yefkan. Targa tamezwarut d tuɣalin-is netta s timmad-is ɣer tmurt n Leqbayel (netta yeddren temzi-is di Ɛin Wessara, d aselmad n tefransist). Targa tis snat d aḍris i as-sutren ɣef tikti “tamurt”. Targa tis tlata d ayen akken i d-texlef tɣuri yeɣra adlis n Amin Meɛluf “Identités”. Tiregwa-agi, qqlent-as d ssebbat ara t-yawin ɣer tira n « Adrar ay uccen ».
Uccen, yettaf kan iman-is deg udrar ɣas ma yella asemmid yeddukkel netta d llaẓ, ɣas ma yella taqeḍɛit ɛussen-tt yiqjan, ɣas ma yella « semmumit tẓurin-nni », ɣas ma yella ablaḍ yugar akal, ulac anda ara yekber yiccer. Uccen, d adrar kan i t-itteṣren. Am umsedrar. Am uqbayli.
Tira n uḍris-agi n Ḥasen Ḥelwan, tebded ɣef tlata n tfelwin. Takerrist (l’intrigue) n uḍris-agi, teqqen ɣer umsami (contiguïté) n tfelwin-agi.
Tafelwit tamenzut d tamuɣli ɣef tudert n Ṭiṭi (d twacult-is = nettat d yemma-s d wayetma-s Ḥend d Baati). Baba-s n Ṭiṭi, yeǧǧa-ten, Gma-s ameqqran (uccen azerqaq), yeǧǧa taddart, yezdeɣ tamdint. Atmaten n Ṭiṭi, yiwen d lḥila kan, wayeḍ d ahuẓẓi. Yemma-s n Ṭiṭi (Jeǧǧiga) wessret, tettaǧǧa-tt tezmert.
Tafelwit tis snat d tuɣalin n gma-s ameqqran n Ṭiṭi (uccen azerqqaq) ɣer taddart; tuɣalin-agi isemma-tt bab-is (niqqal) d tirezzaf kan, ad iwali yemma-s s yin akkin ad yuɣal ɣer warraw-is di temdint.
Tafelwit tis tlata d lebɣi n uccen azerqaq ad iɛawed lebni i uxxam aqdim n taddart; yuɣal-it-id wul ɣer tmurt.
Di yal tafelwit, yettfaras umaru tagnit akken ad d-yawi ɣef wayen yebɣa, abeɛda ayen yerzan tamsalt n tmagit (identité). Tikwal s yimi n Ṭiṭi (d amsawal agensay = narrateur intradiégétique), tikwal s taɣect n umsawal aniri (narrateur extradiégétique), ahat d tin n umaru acku acḥal d abrid i d-yessekcem iman-is di tsiwelt (narration), yella wanda i d-yettak ṛṛay-is netta, yella wanda i yebɣa ad yessekcem umsawal (narrateur) imeɣriyen-ines di kra n temsal.
Tamsalt n tmagit (la question de l’identité), yeqqen-itt umsawal (/umaru) ɣer yismawen n yimdanen, ɣer wakal, ɣer wassaɣ n umdan d ugama, ɣer uḥulfu n umdan deg taddart, atg.
Seg wakken yettuqet wawal ɣef tmagit (l’identité) deg uḍris-agi, yuɣal ula amaru yemlal netta d uwadem Ṭiṭi. Mlalen deg yiwen yinaw, yesdukkel-iten, yerra-ten amzun d yiwen. Inaw-agi, ad t-yaf umeɣri di tɣellaft taneggarut n udlis (4ième de la couverture). Inaw-agi, ittusemma d asenked n udlis ; ibded ɣef snat n tessadrin. Tamenzut n umaru, tis snat n uwadem (Ṭiṭi), dukklent deg ugbur d yizen d yinaw (le contenu et le message du discours).
Tutlayt n wungal-agi, tettuqqet deg-s tmawit. D timserreḥt, d tudyizt. Tecbeḥ, deg-s inzan, deg-s iḥulfan, deg-s lbenna n teqbaylit, deg-s telqay n temsal, deg-s lebɣi n tmenna, deg-s tuṣrat n lbaḍna.
Aɣanib n uḍris-agi, iban-iyi-d yebded ɣef snat n tgejda.
Tagejdit tamenzut d askan n waddaden n yiwudan (les états –psychologiques- des personnages), ama d wid yerzan tanefsit-nsen ama d wid yeqqnen ɣer tidmi-nsen (pensée)). Askan-agi n waddaden, yebna ɣef yinaw agensay n yimudan (monologue intérieur des personnages) d uweṣṣef i d-yettweṣṣif umsawal tudert n yiwudan d tudert-nsen. Dagi diɣen i yettemlili umsawal d uwadem deg yinaw (nekk ad d-iniɣ ula deg tmenna n tmagit-nsen).
Tagejdit tis snat, d awehhi i iwehha umsawal, ama d tasiwelt-ines ama d inaw-ines, metwal n umeɣri, amzun akken yebɣa ad t-isekki di teḥkayt d temsalt n tmagit.
Muḥend Akli Salḥi
