Ungal n teqbaylit yedda-d amecwar xas wezzil, maca yuɣ amḍiq deg tsekla d tmetti. Ladɣa tineggura-a, aṭas n yilmeẓyen i d-ikecmen s annar-a akken ad yeffukti ugar. Uwin-d amaynut ama deg usentel ama deg uɣanib n tira. Maca akken i d-uwin ayen yelhan, i tteccḍen tikwal ɣer kra n temsal ur nelhi ara. Gar temsal-a, ad naf asemres n tudyizt (la poétique) s tussda. Annect-a yettruẓu tasiwelt (narration), yerna ixenneq taqsiṭ, tikwal isruḥuy-as ula d anamek.
Tinfaliyin yettfakkan s tmeɣrut amzun d asefru
Kra n yineggalen nwan acebbeḥ n uɣanib d asemres n tefyar yesɛan yiwet n tmeɣrut. Mi ara teqqareḍ, ad tselleḍ i ssda-nni tettuɣal-d ɣer taggara n yal tafyirt amzun d asefu i teqqareḍ. Maca ilaq ad neḥsu dakken ungal d tasrit mačči d asefru, ihi tameɣrut ur tesɛi ara azal deg wullis, yerna tettruẓu tasiwelt, dɣa ineqqes wazal n lḥir d ccuq ara terjuḍ seg tɣuri, ladɣa ma ulac kra n wazal i d-terna i teqsiṭ. Wagi d amedya kan amectuḥ akken ad negzu taluft.
« Ladɣa yelli-s, tḥar ad t-yessemlil Rebbi d lefɛal-is. I teffer d lbaḍnat tiweḥciyin deg wul-is. Tuwwa teqber kan daxel-is. Ma drus i walant wallen-is. (is) Tettarra-tt kan i nnhati. Tečča ksum n lmeyyet ur tebɣi. Teddaray tiɣemmar. Seg lxuf, textar tasusmi. Yenɣa-tt uɣbel n yemma-s i iɣerqen deg temda ur teḥsi. (i) Yal mi ara d-ɣlint tillas, teqqar-as : « Serwet a zzman bu-tlufa. Ur zeggel tama. Hudd, qleɛ tiseḍsa. Ceṭṭeb asirem, bru-d i temda n lmeḥna. » (a)
Acebbeḥ n wawalen d tektiwin war anamek
Tamsalt-nniḍen i d-ijebden lwelha deg kra n wungalen i ɣriɣ tineggura-a, d turart s wawalen d usdukkel n tektiwin war anamek. Di tazwara, mi ara teqqareḍ, ad ak-d-yettbin uɣanib yecbeḥ, tiktiwin lqayit, maca mi ara tsenniḍ tifyar-nni ta ɣer ta, ad tafeḍ ur qqinent ara deg way-gar-asent, yerna ulac anamek i tent-icerken. Meḥsub d acebbeḥ n wawal kan, maca tikti ur yelli unamek i d-tuwi d amaynut. Aɣanib n tira-a ad t-naf yessed s tenfaliyin d tugniwin n tesnukyest maca ulac tidyanin, d inaw (le discours) i yeṭṭuqten ugar. D annect-a i yettarran ungal-nni ẓẓay i tɣuri, ẓẓay ula i tegzi. Wali tukkist-a :
« Teqleɛ tmacint, yeḥbes lharaj n yiminigen i yettsubbun ttalin i k-yesseɣlayen di lmizan n wakud, yal timlilit ɣer wawal agejdan i d-yettnalen deg lqaɛ ideg ttgamint akk tutlayin i d-yesnulfa leɛqel, yebda lmizan n tsusmi yessenfal i tilawt. »
Teqleɛ tmacint, yeḥbes lharaj : dagi tifyar qqnent u yesdukkelt-itent unamek n unalkam. (Rapport de conséquence).
Ttsubbun ttalin i k-yesseɣlayen di lmizan ? yal timlilit ɣer wawal agejdan (anta timlilit ? ideg ttgamint akk tutlayin (dacu i ttgamint ?lmizan n tsusmi yessenfal i tilawt (dacu n wassaɣ yellan gar tsusmi d tilawt ?) Dacu-tt unamek neɣ tikti i tebɣa ad d-tessiweḍ tukkist-a ?
Ihi yelha wungal ma yerfed aɣanib icebḥen, tinfaliyin akked tugniwin n tiɣunba maca akken kan i yecbeḥ. Ulayɣer tussda d turart s wawal ur nesɛi anamek. Tudyizt tesɛa azal ma yella kan terna-d kra n unamek i tsiwelt akked teqsiṭ.
« Mi ara yedderɣel zzman, ur tneffeɛ la tidet, la imeṭṭawen. Acḥal i tru Nassima, acḥal i teggugem almi i tekcem deg tiselbi n wayen yuran. »
Tamawt : tukkisin-a i d-bedreɣ akken kan ad ilint d amedya, mačči iwakken ad sneqseɣ deg wazal n bab-nsent neɣ deg wazal n tira-nsen. S leqder.
Larbi YAHIOUN
