Tasekla d udem n tmetti win yebγan ad yissin timetti yeldi idlisen-is. Yal amaru d asebtar n umezruy, yal asebtar d taceqquft n cfaya, yal cfaya d tamsirt, yal tamsirt d «tamusni, yuγalen ass-a s idlisen» i yenna Mεemri.
Idlisen d isebbaḍen yal wa yaf lqis-is, lqis n yedlisen d isental. Aṭas i yecnan fell-as daγen aṭas i yuran fell-as. Ta d lγerba iγef yezmer imeγri ad iγer deg ungal Faffa n Racid Σellic, awal-a ilul-d di tala asmi bdan leqbayel ttinigen γer Fṛansa, tin yestqsan tayed di tala γef urgaz-is ad as-tini : « Tewwi-t Faffa! » Imi Fṛansa-nni tamurt tuγal d takna. Deg ungal-a Meẓyan yewqaε gar Fṛansa d Tmurt akken yewqaε gar Jaklin d Faṛṛuǧa di tagara di tlemmast ara d-yegri.
Seg Σellic γer Mεemri s Tewrirt yettawttun (ungal, yerra Σebdaraḥman Bugermuḥ d asaru). Di tesga yettidir Meqran, Tamaεzuzt (Σezzi), Sekura (Ku), Menac…tturaren di tεessast yiwet n texxamt taεlayant dγa asmi mfaraqen fkan tasarutt i Σezzi mεahaden ur tt-leddin ara alma εawden mlalen-d akk, Meqran d Σezzi ad jewjen ku d Brahim daγen ma d Menac ad tent-yaγ tin yettiriden s idammen di tmetti-nneγ imi iḥemmel Dabda, tameṭṭut n Wakli, imeγri ad iḍfer tiqsiḍin-a d tiyaḍ di tewrirt-nni yettu Ṛebbi d wemdan-is akken ad iwali ma teldi tεessast neγ ala. Ala daγen ad iwali tabrat-nni n tagara, iban imeγri ad yettru.
Si Tesga s Iγil N Zzman anda yezdeγ Ureẓqi i yennan deg tejamεt belli ur yettamen ara s Ṛebbi wigad-nni xelεen ssawlen i baba-s iruḥ-d yewwi mmi-s iteddu yettmeslay-as simir ad wexren γef wigad-nni imiren ad t-yeddez.
- Imi ur tettamneḍ ara s Ṛebbi ay Arezqi s wacu tettamneḍ ihi ?
- Ttamnaγ s la logique
- Acu d la logique-a-inek a mmi ?
- Mačči d la logique-iw, d la logique n medden akk ḥala n At Yiγil N Zzman.
Arezqi bu la logique yewweḍ almi yesṛeγ idlisen n imeqqranen n tsekla tarumit aya yella deg Le sommeil du juste.
I wid yemmuten, i wid ittewten, i wid itturegmen, i wid ittuḥebsen di tmurt-nneγ γef tmaziγt d tlelli akken azekka ad γren yilmeẓyen di ccwami-nnsen iberdan yessidiren amdan. I wigi iwumi yehda Saεid Saεdi adlis-is Askuti anda Malḥa tameεcuqt n Meẓyan ad tεeddi ddaw tεekkazt n Popey tucmitt. Tazwert-is yura-tt Lmulud At Mεemmar « ṭṭlam la yetteftutus, tura d tikli ad ifnu yiḍ, attaya tfejrit-nneγ ».
« Baba d akabiču type d ancien moudjahid n 80, d l’indeboulonnable militant n FFCD, d l’autonomiste mi ara t-id-rren leḥyud, d amaziγ s tefransist, d laic, d athee…yettcummu mebla lmaṣṣa, iḥemmel JSK…, yemma daγen d takabičut moderne… fan n Malika Domrane d si Moḥ… » Tagi d tawacult n ubibiḍ awadem agejdan n udlis Tafunast itteẓẓgen pétrole n uneγmas Tahar Weld Σmar, abibiḍ d yemdukal-is asmi walan ibabaten-nsen qqarsen ad kkren γer tegrawla tin llikuc dγa tikemmict-agi n ibibiḍen ad xeddmen ayen ur yexdim ara wecwari n « les adultes ».
Wid iḥemmlen tamdyazt ad terwun deg Poèmes kabyles anciens n Mεemri s Yusef Uqasi, ccix Muḥend neγ si Muḥ U Mḥend.
Di lxater n wid yemḥemmalen yella Salas d Nuja n Brahim Tazaγart, akken yecbaḥ i yeshel i tγuri yerna d ayen iḍerrun di tmetti-nneγ imi Nuja fkan-tt ad tezwej mebla lebγi-s alma d imuras anda ara temlil tayri isem-is Salas d netta i d-yessukksen Nuja seg uγraq dγa ad teddu d Salas mgal tawacult-is ? Ad terwel ? Ad teqbel ad tezwej mebla lebγi mebla tayri?
Tettḍilli-d ur d-tkeččem anta-tt ? d taqbaylit ? d tayri ? d tilelli ? d timunnent ? neγ d Nna Megduda ? d ayen ara iwali imeγri γer tama n Utudert deg ungal n Σmar Mezdad.
Meqran d Σezzi, Arezqi, Meẓyan d Malḥa, Salas d Nuja, abibiḍ d twacult-is d imwansen lεali deg ladγa imi taqbaylit ad tidir ma nettaru-tt neqqar-itt.
Tigrin Nisma
