AMAYNUT
« Tadlist-agi d tUNGALt (gar wungal d tullist n usugen awerεi (« Genre nouvelle fantastique »). Tanfust tettales-d tadyant n yiwen ugeswaḥ yeɣwa usaru n lmuḥal, akked Σballac, almi yekcem εemrayen. Yaf-d iman-is am uẓerẓur yeṭṭef unebdu, yewḥel ger tirga d tilawt. Argaz tuɣ-it yettfafa ɣef tewkilin, deqqal-nni teɣli-d fell-as yiwet d tamxaleft.
Tawkilt tamcumt, Rachid Tighilt, Éd. Lulu, 2022
Rachid Tighilt d anaẓur i tent-yesdukklen akk , d amedyaz, d amsunneɣ (artiste peintre), d amaru… Ayen yura akked wayen « d-yenna », yura-t, « yenna-t » s teqbaylit tafessast yeččuren d sser. Widen i iwalan Črek neɣ daɣen Dda Spilu ufan-n aɛeqqa n lemleḥ di tulayt n yisura-nni. Aɛeqqa n lemleḥ-nni adt-naf di Tadwant n Troie, tasuqilt n usaru Troie (n Wolfgang Petersen) d-yefɣen di 2004.
Tawkilt tamcumt, d ṣṣenf n tsekla (nouvelle fantastique) ajdid di temkerḍit tamazaghit, taqbaylit. Ha-t-an ayen yura umaru Rachid Tighilit ɣef cɣel-agi :
« Tadlist-agi d tUNGALt (gar wungal d tullist n usugen awerεi (« Genre nouvelle fantastique »). Tanfust tettales-d tadyant n yiwen ugeswaḥ yeɣwa usaru n lmuḥal, akked Σballac, almi yekcem εemrayen. Yaf-d iman-is am uẓerẓur yeṭṭef unebdu, yewḥel ger tirga d tilawt. Argaz tuɣ-it yettfafa ɣef tewkilin, deqqal-nni teɣli-d fell-as yiwet d tamxaleft. Ula d nettat εni tettwet fell-as. Daɣnetta myufan, myeḥmalen war ma ssan-as-d i tayri n wulawen. Yesεedda yid-s kra n tegnatin ur iqebbel leεqel. Gan ssalima. Taggara tesseεreq-as-tent almi d as-teεreq. Yerra-tt daɣen i unadi… »
Tukkist seg Tawklit tamcumt
« (…)Yekcem-iyi lḥir. Ur ẓriɣ anda ddiɣ wala d acu-t uderdurnni i la iḍerrun. Yeffeɣ-iyi leɛqel. Ad t-yessufeɣ tamara ugejdur-nni yesṭerwicen. Nniɣ-as dayen, εni d tisselbi-nni i d-yedlan felli; tufa-yi-d ssiɣ-as-d. Allen-iw ggummant ad rekdent. Ur ǧǧint timenṭeǧǧit. Ha-t-an kan, ha-t-an kan! Kkes-d tiɣmert ur unint. Ata daɣ tesnager tiṭ-iw s abuqal-nni iɣer yerra ijeǧǧigen dyewwi yesɣi-nni. Ddiɣ fell-as. Ddmeɣ-t-id s leqlala d ṭṭeryis. Cwiṭ niqal d iyi-nsir si ger ifassen-iw yettergigin. Mer d as-serrḥeɣ, ad yeggejgej; ad yebḍu d icwayen. Neṭṭreɣ tameqqunt-nni ijeǧǧigen ɣer lqaεa. Bdiɣ ssurugeɣ ɣef ugernin-iw aman-nni yellan deg-s. Ɣas akken qqlen d arfaẓen, zegzawit amzun teẓmiḍ ɣer-sen taɣiɣact neɣ azegḍuf, ur d-cliεeɣ ara. Nniɣ-as ahaqel d iεenquden-nni ijeǧǧigen i ten-yesluɣen akken. Mer walaɣ kra n lḥila n waman zeddigen, zemreɣ ad ssizedgeɣ yis-sen aman-nni iluɣen swayes bdiɣ ssirideɣ udem-iw. (…) »
_____________
Ha-t-an webrid (le lien) yettawin ɣer wanda d-teffeɣ Tawkilt Tamcumt:
Tiẓrigin Lulu : Tawkilt tamcumt – Rachid Tighilt – 2022.
