Nna Γni d ungal d-yewwin deg yiciwi-s acḥal d idlisen. Deg yidlisen-a uran-d ɣef tɣarma n yImaziɣen d umezruy-nsen maca werǧin slan yis-sen yImaziɣen, llan yidlisen nniḍen uran-ten s yiman-nsen qqimen kan d lmidad di lkaɣeḍ drus wid yerzan fell-asen.
Ungal-a yettawi ɣer yismektiyen n Nna Γni ahat akken yettara amdan ɣer yiḍelli-ynes, i wessekfel n umezruy ṛban wid yebɣan ad imḥu later akken ad ilin nutni. Di teswiεt ɣer tayeḍ yettarra-aɣ ɣer lawan deg-i nella akken ad neḥsu belli akud yelḥa-d, yewwi-d ad t-neḍfer tmacint yettawin ɣer sdat ur aɣ-tettaǧǧa ara.
Yewwi-d useḥbiber ɣef-tutlayt d yidles-nneɣ amek Nna Γni tesseḥbaber ɣef tsenduqt-is, ɣas tatut tečča aṭas di ccfawat maca llan igerrujen d inagan, ddren ad aɣ-sdduqsen, ad nebcen deg yismektiyen. Tamacahutt n Nna Γni d aweṣṣi i weḥraz n umezruy d kra yeqnen s aẓar-nneɣ am tutlayt-nneɣ, tasuta ad tmell-it i tayeḍ am Nna Γni yberken ɣef tasenduqt-is, i as-d-ǧǧan d lamana i tt-tessiweḍ s afus n bab-is. Tatut tkes am yizimer ma ur tt-nqureε ara, ad neqqim d ijeɣlal ma ur aɣ-yeddim waḍu, ad aɣ-ddmen s rkel wid i wumi i d-nezga di nnican.
Laceb yemmeslay-d ɣef tala anda tekksen medden fad, ilefḍan d lxiq, d adeg deg-i d-tettlal tayri gar tid yettaččaren tisebbalin d wid yettganin abrid-is. Di tala ttagment-d aman d wayen iḍarrun di taddart, d win i d aɣmis n tlawin d-ttawint i yirgazen-nsent ma d-uɣalent s axxam.
Ungal yettawwi imeɣri ɣer umaḍal n usnulfu, ɣer wazal n tussna, s tullisin n Isac Asimov yeččuren d timsirin, ahat si sya ɣer sdat ad tennulfu tmacint ara at-steqsiḍ ɣef wayen i ad k-yehwan, ad k-d-terr. Anagar akud ur as-tettizmir ara, ad t-id-terr deffir neɣ ad d-texlaq kra deg wulac. Akken yebɣu umdan yuẓẓa deg usenlfu d tmussni akud ur yettizmir ara, yal wa win deg yella ideg yettalas.
Nna Γni, afrur-is yessaweḍ-aɣ-d ayen i as-d-ulsen neɣ ayen d-yufa deg yidlisen ɣef umezruy n tleṭṭat. Laceb yessenser-d cwiṭ n ccfawat iḥrez-iten deg ungal-a n Nna Γni.
