Ddurt-a yezrin, Ageldun aglizi Harry n Susseks yeffɣen tgelda n imawlan-is di 2020 akken ad yidir iman-is d imineg akked tmeṭṭut-is Meghan Markle, tasegbart (actrice) tamarikant, di Kalifurniya (Timura yedduklen n Marikan), degmi yerfa ɣef ugma-s ageldun William d baba-s Charles III, yuɣalen ass-a d agellid n Legliz d tmura n Commonwealth akkad tamettant n yemma-s tagellidt Elizabeth II, yesẓerg-d inelliten-ynes (mémoires) s wazwel Spare ( «arbib» ?, s unamek ameḥqur, Le Suppléant, s tefransist) ar teẓrigin Penguin Random House, s yal talɣa : lkaɣeḍ, anumirik naɣ ameslaw.
Deg wass amenzu u tufɣa-nnsen di 10 yennayer, inelliten-a nzan ugar n 1,4 imelyan n tunɣiltin (copies) anagar di Legliz, Marikan d Kanada war ma yedda-d leḥsab n 16 tutlayin ɣer yettwasuqqel deg umaḍal. Si tefransit, i-d-yefɣen s wazawel Le Suppléant, tiẓrigin Fayard sarsen-t di tnedlisin azal n 210.000 n tunɣiltin, anda theyyin-t ugar n 130.000 n tunɣiltin niḍen ar zdat. Deg udem n yedlisen icban wa naɣ ameslay ɣef tudert n bab-is aneggaru yezenzen aṭas kan i d-iffeɣ d Barak Obama s wedlis-is A Promised Land (Terre promise) …
Ageldun Harry, deg udlis-is amaynut, n 537 isebtaren ur yeǧǧi yiwen s tuqsa-s, baba-s, gma-s, tameṭṭut n baba-s akked d yiman-is. Aṭas i yennan, mačči d lawan i wergaz n 38 iseggasen ad yinni tudert-is mazal teččur s tedyanin n tudert. Acu ddeqs nniḍen, yebḍan gar wid yennan : yessufɣed ar beṛṛa uguren tettidir twacult tageldant n Legliz, d wid yufan deg udlis n ugeldun d tujya n wallaɣ, imi yenna :« Si lmut n yemma, werǧin yerkid wallaɣ-iw naɣ ṣṣebreɣ fell-as…», yakkan anda ywalla tameṭṭut n baba-s tagellidt Kamilya, tekkat ayen s i-tufa ad ttaɣ amur ameqran di tteḍbir n tgelda, naɣ Kate, tameṭṭut n gma-s i ykecmen s tismin di tayri-nnsen, gar-as d Meghan.
Di tallit-a, Buckingham Palace (aɣasir) ur d-nnin ara ameslay ɣef ayen i-d-yura ugeldun-nnsen ɣef twacult-is, ɣas taɣemsa n Legliz, tessufɣ-d awal d akken terfa tessussem. Kra qqaren-d gren-as tiɣri s tuṣra ad yuɣal s axxam, ad msamaḥen. Kra qqaren-d, akken d-yenna The Independant, agellid Charles III, tagellidt Kamilya d William mačči d mmi-tsen Harry ɣef rfan d Meghan iɣuccen, nnan : « Tseḥrit armi yuḍen». Acu ar tura, kra din d : «Yenna wagu, yenna waḍu ».
Harry yefka tidwinitin (interviews) i ddeqs n tiliẓriyin, iɣmisen d rradyut akken ad imeslay ɣef udlis-is seg wanek n Kalifurnya (Marikan), anda yjaḥ si 2020 ar ass-a d Meghan. Tikta-s zzin-t yerra (yebɣa) ad d-yerr tilelli-s d tudert-is gar iffasen-is war ma yḍur yiwen. Ar ɣur-s tira n wedlis-a zun d acetki ara t-yeseḥlun seg wurfan yeččan aqerruy-is.
Di tmurt n Legliz, azal n 64% n imezdaɣ-is εyan si tmucuha-ya n igeldunen yeččuren isalen mi ssellen yal ass anda Harry yesruḥ lεezza-s anagar ilemẓiyen i ɣer yuklal azal wayen i-d-yura.
Harry yurra-d ayen i d-yullin ɣef ul-is. Tamsalt-is tettkemmil imi yestenya naɣ yezmel (signer) d teẓrigin Penguin Random House, ɣef 4 yedlisen niḍen s wazal n 40 melyun $. Mazal asaru yetturar di tgelda n Legliz.
